شىمكەنتتە جۇرتشىلىققا «ەلەكتروندى قازاق ءۇي» تانىستىرىلدى

استانا. قازاقپارات - بۇگىن وبلىستىق ىشكى ساياسات باسقارماسىنىڭ قولداۋىمەن «وڭتۇستىك قازاقستان» گازەتىنىڭ باسپا ءسوز ورتالىعىندا ۇلتتىق رۋحتىڭ جارشىسى - «ەلەكتروندى قازاق ءۇي» ءونىمىنىڭ تانىستىرىلىمى ءوتتى.  

وعان وبلىستىق ىشكى ساياسات باسقارماسىنىڭ باسشىسى ب. ءۋالي مەن مادەنيەت باسقارماسىنىڭ باسشىسى ك. ايداربەكوۆا، جازۋشى م. بايعۇت پەن جوبانىڭ جاۋاپتى رەداكتورى ج. سالەن ۇلى جانە ب ا ق وكىلدەرى قاتىستى.

«ەلەكتروندى قازاق ءۇي» - ءيىسى قازاقتىڭ يگىلىگىنە جارايتىن تاڭداۋلى زاماناۋي تاربيە قۇرالى. كيەلى ءۇيدىڭ كىشىرەيتىلگەن نۇسقاسىنا بەسىك جىرى، ەرتەگىلەر، بالالار اندەرى، حالىق جانە حالىق كومپوزيتورلارىنىڭ ءان- كۇيلەرى، تەرمە- تولعاۋلار، وتانشىلدىق رۋحتاعى اندەر، ابايدىڭ 45 قارا ءسوزىن قامتىعان 1200 مازمۇن ەنگىزىلگەن ەكەن. ول - بابالارىمىزدىڭ بىزگە جەتكەن باي رۋحاني مۇرالارىن بۇگىنگى جانە كەلەشەك ۇرپاققا جالعايتىن ءداستۇرلى ۇلگىدەگى زاماناۋي ەلەكتروندى قۇرال. 
  
  ەلەكتروندى قازاق ءۇي 4 نەگىزگى بولىمنەن تۇرادى. ءبىرىنشى ءبولىم - ەرتەگىلەردە 150 ەرتەگىنى قازاققا تانىمال اكتەر ايدوس بەكتەمىر مەن التى الاشقا اتى ءمالىم ايگىلى ديكتور ساۋىق جاقان وقىعان. بالا ساناسىنا ادامي قاسيەتتەردى ءسىڭىرىپ، قازاقتىڭ باي فولكلورلىق مۇرالارىمەن سۋسىنداتىپ، تىلدىك قورى مەن ادەبي جاسامپازدىق قۋاتىن ارتتىرادى.   

 ەكىنشى ءبولىم - بالالار ءانى. كەڭ كولەمدە جيناقتالعان بالالارعا ارنالعان 167 ءان ەنگىزىلگەن. ورىنداۋشىلاردىڭ دەنى تالانتتى جاسوسپىرىم جانە تانىمال انشىلەر. ال ءۇشىنشى بولىمدە كۇيلەردە داۋلەسكەر كۇيشىلەرىمىزدىڭ تۋىندىلارى قامتىلعان. 15 دومبىرا، 34 وركەسترمەن ورىندالعان كۇي، 20 قوبىز، 20 سىبىزعى، 12 جەتىگەن، سازسىرناي، شاڭقوبىز، ادىرنا، شەرتەر، 8 سازسىرنايمەن ورىندالعان شىعارما ەنگىزىلگەن.

ءتورتىنشى ءبولىم - ءداستۇرلى ءان، تەرمە- تولعاۋلار، بەسىك جىرلارى جانە اباي اتامىزدىڭ 45 قارا ءسوزى. 114 حالىق ءانى، 202 حالىق ءانشى- كومپوزيتورلارىنىڭ اندەرى، 62 تەرمە- تولعاۋ، 26 وتانشىلدىق رۋحتاعى ءان، 7 بەسىك جىرى، حاكىم ابايدىڭ 45 قارا ءسوزى بار.  
 
 سونداي- اق راديو تىڭداپ، ءوزىڭىزدىڭ قۇرىلعىلارىڭىزداعى (USB فلەش كارتاسى جانە تەلەفون كارتاسى) اندەردى قوسىپ، تىڭداي الاسىز. ۇرپاقتى ۇلتتىق رۋحتا تاربيەلەيتىن ءونىم پاتەنتتەلگەن، اۆتورلىق قۇقىعى قورعالعان. ق ر مادەنيەت مينيسترلىگىنىڭ ساراپتاۋىنان وتكەن «ەلەكتروندى قازاق ءۇيىنىڭ» ساپاسى جوعارى، مازمۇنى سان الۋان، ۇلتتىق ناقىشپەن بەزەندىرىلگەن.

 جوبانىڭ جۇزەگە اسىرىلۋىنا ءۇش جىل ۋاقىت جۇمسالعان. ونىڭ ءساتتى شىعۋىنا دۇنيەءجۇزى قازاقتارىنىڭ قاۋىمداستىعى، م. اۋەزوۆ اتىنداعى ادەبيەت جانە ونەر ينستيتۋتى، تانىمال ءانشى- كومپوزيتورلار، اقىندار مەن قالامگەرلەر قولداۋ ءبىلدىرىپ، اقىل- كەڭەستەرىن بەرگەن، دەپ حابارلايدى و ق و اكىمى اپپاراتىنىڭ باسپا ءسوز قىزمەتىنەن.