17:09, 12 - شىلدە 2014 | GMT +5
شۇعىل: اقمولا وبلىسىندا ات بايگەدە ەكى شاباندوز اتتان قۇلاپ، بىرەۋى مەرت بولدى
كوكشەتاۋ. قازاقپارات - اقمولا وبلىسىندا ساندىقتاۋ اۋدانى كۇنى مەرەكەسىن تويلاۋ كەزىندە ۇيىمداستىرىلعان بايگە جارىسىندا ەكى شابوندوز استىنداعى تۇلپارلارىمەن بىرگە قۇلاپ، بىرەۋى سول جەردە اجال قۇشتى.

قايعىلى وقيعا 11 شاقىرىمدىق توق بايگە كەزىندە ورىن الدى.
بايگە باستالىسىمەن تۇرا شاپقان قىزۋ قاندى تۇلپارلاردىڭ ءبىرى ءسۇرىنىپ، ونىڭ ۇستىنە ەكىنشىسى كەلىپ قۇلاعان. ناتيجەسىندە ەكى شابوندوزدىڭ ءبىرى سول جەردە جان ءتاسىلىم ەتتى. ال، ەكىنشىسى اۋىر حالدە جەدەل جاردەم كولىگىمەن اۋداندىق اۋرۋحاناعا جونەلتىلدى.
كۋاگەرلەردىڭ ايتۋىنشا، مەرت بولعان شابوندوز ستەپنوگور قالاسىنا قاراستى بەستوبە كەنتىنەن كەلگەن 12-15 جاسار بالا كورىنەدى.
وسى قايعىلى جاعدايعا بايلانىستى وزگە جارىستار دا دوعارىلدى.
ەسكە سالا كەتسەك، بۇگىن ساندىقتاۋ اۋدانى كۇنىنە بايلانىستى سپورتتىڭ بىرنەشە ءتۇرى بويىنشا جارىستار وتۋدە. اسىرەسە، بايگە جارىسىنا بەس بىردەي اۆتوكولىك تىگىلىپ، وعان ەلىمىزدىڭ ءار وڭىرىنەن كەلگەن سايگۇلىكتەر قاتىسۋدا.
اۆتور: اسلان وسپانوۆ