تاپقىرلىقتىڭ ءبارى قىتايداعى قانداستارىمىزدىڭ عانا ماڭدايىنا بۇيىرعان باق پا؟

استانا. قازاقپارات - قىتايداعى قازاقتاردىڭ ءبىرى «Zerde» اتتى سمارتفون ويلاپ تاۋىپتى.
None
None

سول «Zerde» اتتى سمارتفون ءونىمىنىڭ ەرەكشە دەمەۋىندە 21 جاستاعى قۋاناقىن سەرىك ۇلى اتتى ازامات دۇنيەدەگى ەڭ ءىرى كوشپەلى قۇمدى ءشول تاكلا-ماكاندى جاياۋ كەسىپ ءوتىپ، گيننەستىڭ رەكوردتار كىتابىنا ەنىپتى.

 تاكلا-ماكاننىڭ قايدا ەكەنىن كوزى قاراقتى وقىرمان جاقسى بىلەدى.

ول - ساحارا شولىنەن كەيىنگى ەكىنشى ءىرى قۇمدى ءشول جانە الەمدەگى ەڭ كوشپەلى شولدەردىڭ ءبىرى. ءبىزدىڭ قانداسىمىزدىڭ بۇل «اجال تەڭىزى» اتتى قۇمدى شولدەگى ساپارى 560 شاقىرىمعا سوزىلىپتى.

قۋاناتىنىمىز - سمارتفوندى ويلاپ تاپقان جىگىتتىڭ قازاق بولعانى. جۇباتاتىنى - ۇيالى تەلەفون مازىرىندەگى ۇياشىقتاردىڭ بارلىعى دەرلىك توتە جازۋمەن قازاق تىلىندە جازىلعاندىعى. ءارى سمارتفون WI-FI جەلىسىنە قوسىلا الاتىنى ءارى ۇلتتىق ناقىشتاعى ويۋ-ورنەكپەن ورىلگەندىگى.

اقپارات كوزدەرىنە سۇيەنسەك، «زەردەنىڭ» جاي قالتافون عانا ەمەس، كىتاپ وقۋعا بولاتىندىعى، ەرتەگىلەردىڭ جيناقتالعانى، قازاقتىڭ تاڭدامالى 100 ءانىنىڭ ەنگىزىلگەنى ايتىلعان. سونداي-اق سمارتفوننان اباي، مۇقاعالي ولەڭدەرىن تاباسىز. قازاقتىڭ باتالارى مەن ناقىل سوزدەرى دە سمارتفوندا شوعىرلانعان ەكەن.

قانداستارىمىزدىڭ سمارتفون ويلاپ تابۋى، تاكلا-ماكاندى جاياۋ كەسىپ، گيننەستىڭ رەكوردتار كىتابىنا ەنۋى قۋانتارلىق جايت ارينە. الايدا سوڭعى جىلدارى گيننەستىڭ رەكوردتار كىتابىنا ەنگىزىلگەن دۇنيەلەردىڭ كوبىن الىپ قاراساق، شەتتە جۇرگەن قانداستارىمىزدىڭ ەڭبەگى. ەستەرىڭىزدە بولسا، شىنجاڭ ولكەسىندەگى تولى اۋدانىنىڭ 10 مىڭ قازاعى حالىق كۇيى «كەڭەستى» ورىنداپ، گيننەستىڭ رەكوردتار كىتابىنا ەنبەپ پە ەدى. «قارا جورعانى» دا گيننەستىڭ رەكوردتار كىتابىنا ەنگىزگەن التايداعى شىڭگىل قازاقتارى بولاتىن. قازاقتىڭ قازىسى دا ءبىر شاقىرىمنان اسىپ جىعىلىپ، رەكورد جاسادى. ونى دا ەندىرگەن - شىنجاڭ قازاقتارى.

قانداستارىمىز قارا دومبىرانى رەكوردتار كىتابىنا ەنگىزدى. بوركىمىزدى اسپانعا اتتىق. قازاق قازىسىنىڭ ءبىر شاقىرىمعا شۇباتىلىپ جاتقانىن كورىپ، تاڭدانباعاندار كەمدە-كەم. ونى دا ويلاپ تاپقان - قانداستارىمىز. اۋ، سوندا بۇل «تاپقىرلىقتىڭ» ءبارى قانداستارىمىزدىڭ عانا ماڭدايىنا بۇيىرعان باق پا؟ جەرىمىز كەڭ، كوڭىلىمىز دارقان... ءبىز شە؟

كەيدە «مىقتىمىز» دەپ كەۋدە سوققاندا... سۇمدىق بولامىز. كىپ-كىشكەنتاي 45 ميلليمەترلىك دومبىرانى ويلاپ تاپقان قانداسىمىز بولاتبەك كارىمحان ۇلىنىڭ تابىسىنا قۋانىپ، قۋاناقىن سەرىك ۇلىنىڭ سمارتفونىنا مالدانىپ جۇرە بەرگەندى جانىمىز سۇيەدى.

ويتكەنى ولاردى قازاق، قازاق دەپ الدايمىز ءوزىمىزدى. شىندىعىندا، ەلدى-جەردى، ۇلتتى ءسۇيۋدى، ۇلتتىق دۇنيەنى شەتتە جۇرگەن قانداستارىمىز كوبىرەك باعالايتىن سياقتى كورىنەدى كەيدە. ويتكەنى ولار وتانىنا جەتە الماي ءجۇر. تۋعان جەرگە دەگەن ولاردىڭ شەكسىز ماحابباتى ۇلتتىق قۇندىلىقتاردى قۇرمەتتەۋگە جەتەلەيدى.

ءبىز وسى حاكىم اباي ايتقانداي «قارنىمىز توق، ۋايىمىز جوقتىقتان» ازىپ، توزىپ جۇرگەن جوقپىز با؟

اۆتور: گۇلزينا بەكتاس

«ايقىن»

سوڭعى جاڭالىقتار