ورالدا «قاراعاندى» كەمەسى سۋعا ءتۇسىرىلدى

سالتاناتتى راسىمدە وبلىس اكىمى نۇرلان نوعايەۆتىڭ اتاپ وتكەنىندەي، بۇل - «ورال «زەنيت» زاۋىتى» ا ق- دا مەملەكەتتىك تاپسىرىسقا سايكەس جاسالعان 22 - كەمە. بۇل ەلباسىمىزدىڭ قازاقستان شەكاراسىن نىق ۇستاۋ جونىندەگى تاپسىرماسىن ورىنداۋعا قوسىلعان ناقتى ۇلەس بولىپ تابىلادى. وسىناۋ ابىرويلى دا جاۋاپتى ءىس الداعى ۋاقىتتا دا جالعاسىن تابادى.
زاۋىتتا بۇدان بۇرىن قۇراستىرىلعان «بۇركىت» جوباسىنىڭ جاڭا، جەتىلدىرىلگەن ءتۇرى بولىپ سانالاتىن كاتەر كاسپي تەڭىزىندە مەملەكەتتىك شەكارانى كۇزەتۋگە ارنالعان. جىلدامدىعى، باسقارۋى، ءجۇزۋ ۇزاقتىعى، دەربەستىگى، ەكيپاجعا جاعداي جاساۋ جاعىنان جاقسارتىلعان كاتەردە جاۋىنگەرلىك قارۋ دا ورناتىلعان.
ق ر ۇ ق ك شەكارا قىزمەتى ديرەكتورىنىڭ ورىنباسارى، پولكوۆنيك كەگەن تۇرسىنبايەۆ ەلباسى تاپسىرماسىنا سايكەس تاپسىرىستى ۋاقتىلى دا ساپالى اتقارعانى ءۇشىن «زەنيت» زاۋىتىنىڭ ۇجىمىنا ريزاشىلىعىن ءبىلدىردى.
«زەنيت» زاۋىتىنىڭ باس ديرەكتورى ۆياچەسلاۆ ۆاليەۆتىڭ ايتۋىنشا، «قازاقستان ينجينيرينگ» ۇ ك» ا ق- نىڭ قۇرامىنا كىرەتىن اتالمىش كاسىپورىندا تاپسىرىس بولعان جاعدايدا سالماعى 600 تونناعا دەيىن باراتىن كەمەلەردى جاساپ شىعارۋعا مۇمكىندىك بار.