قىزىلوردا وبلىسىنىڭ اكىمى ايتىسكەر اقىن م. نيازوۆقا ءۇش بولمەلى پاتەر كىلتىن تابىستادى

قىزىلوردا. قازاقپارات - بۇگىن العاشقى «التىن دومبىرا» يەگەرى، ايتىسكەر اقىن مۇحتار نيازوۆتى وبلىس اكىمى قىرىمبەك كوشەربايەۆ قابىلداپ، ءۇش بولمەلى پاتەردىڭ كىلتىن بەردى، دەپ حابارلادى وبلىس اكىمدىگىنىڭ باسپا ءسوز قىزمەتىنەن.

«سىر ەلى، جىر ەلى» دەگەن قاعيدانى جالعاستىرىپ كەلە جاتقان ونەر يەسى رەسپۋبليكالىق الامان دودالاردا تالاي رەت توپ جاردى. وتكىر تىلىمەن قوعامنىڭ وزەكتى ماسەلەلەردى قوزعاپ، كورەرمەننىڭ كوشەمەتىنە بولەنىپ جۇرگەن ايتىسكەر اقىنعا وسىلايشا قۇرمەت كورسەتىلدى.

 - ايتىس ۇلى ونەر. قازىر تەحنولوگيانىڭ دامىعان ۋاقىتى. دەگەنمەن، رۋحاني قۇندىلىقتى دا ۇمىت قالدىرماي قولداۋ كورسەتۋىمىز كەرەك. كيەلى ونەردى جالعاستىرۋشى مۇحتار بۇگىندە شاكىرت تاربيەلەپ، ۇستازدىقپەن اينالىسۋدا. سىر ءوڭىرى ونەر يەلەرىنە كەندە ەمەس. ەندى مۇحتاردىڭ مەكتەبىنەن شىققان تالانتتار كوبەيسىن، - دەدى ءوڭىر باسشىسى.

ورەلى ونەر يەسى وزىنە كورسەتىلىپ جاتقان قۇرمەتكە ريزاشىلىعىن ءبىلدىردى.

 - بۇل مەنىڭ عانا ەمەس، جاناشىر، ۇستاز اعالارىمنىڭ جەتىستىگى. از-كەم ەڭبەك باعالانىپ جاتىر. الداعى ۋاقىتتا دا ابىروي بيىگىنەن كورىنۋ ءۇشىن تالماي جۇمىس جاسايمىن. ونەر سالاسىندا سىر ءوڭىرىنىڭ باعىندىرعان بەلەسى بيىك. سول ۇدەدەن تۇسىرمەۋ بىزگە جۇكتەلىپ وتىر، - دەدى مۇحتار نيازوۆ.

اۆتور: ەلۋباي اۋەزوۆ