قازاقستانعا بالالار ويىنشىقتارىن اكەلۋگە شەكتەۋ قويىلدى

ق ر تۇتىنۋشىلار قۇقىعىن قورعاۋ اگەنتتىگى قازاقستانعا بالالار ويىنشىقتارىن اكەلۋگە جانە ولاردى ەل اۋماعىندا ساتۋعا شەكتەۋ ەنگىزدى، دەپ حابارلايدى DKNews ۆەدومستۆونىڭ باسپا ءسوز قىزمەتىنە سىلتەمە جاساپ.
«ق ر تۇتىنۋشىلار قۇقىعىن قورعاۋ اگەنتتىگى 2014 - جىلدىڭ 10 - شىلدەسىنەن باستاپ قازاقستان رەسپۋبليكاسىنىڭ اۋماعىنا كەدەندىك وداقتىڭ تەحنيكالىق رەگلامەنتتەرىندە بەلگىلەنگەن تالاپتارعا ساي كەلمەيتىن بالالار ويىنشىقتارى مەن ويىندارىن اكەلۋ مەن ساتۋعا شەكتەۋ قويۋ بويىنشا ۋاقىتشا سانيتارلىق شارالاردى ەنگىزدى»، - دەلىنگەن حابارلامادا.
حابارلامادا اتاپ وتىلگەندەي، مونيتورينگ ناتيجەسىندە اگەنتتىك رەسپۋبليكانىڭ تۇتىنۋشىلىق نارىعىندا ساتىلىپ جاتقان وندىرىلگەن ورنى بەلگىسىز ويىنشىقتاردىڭ قۇرامىندا فورمالدەگيدتىڭ شەكتى مولشەرى - 6 ەسەگە، فەنول - 9 ەسەگە، شەكتى دىبىس دەڭگەيىنىڭ كورسەتكىشى - 1,5 ەسەگە ارتىق ەكەنىن انىقتاعان. سونداي-اق بۇل ويىنشىقتار ورگانولەپتيكالىق كورسەتكىشتەر (ءتۇس، بوياۋ، ءيىس ت. ب.) بويىنشا دا تالاپتارعا سايكەس كەلمەگەن.
وسىعان بايلانىستى ق ر تۇتىنۋشىلار قۇقىعىن قورعاۋ اگەنتتىگى قازاقستاندىقتاردى ويىنشىقتاردى ساتىپ الار الدىندا سايكەستىك سەرتيفيكاتىن نەمەسە باسقا دا قوسالقى قۇجاتتاردى تالاپ ەتۋلەرىن جانە ءونىمنىڭ ساپاسى مەن تاڭبالانۋىنا نازار اۋدارۋلارىن سۇرايدى. قاۋىپتى ءارى ساپاسىز ويىنشىقتى ساتىپ العان جاعدايدا تۇتىنۋشىلار اگەنتتىككە شاعىم بىلدىرە الادى.