ىشكى باعىتتارعا ىركىلمەي ۇشاسىز

استانا. قازاقپارات - ەلباسى ۇكىمەتكە ەل ىشىندەگى اۋە ساپارلارىن ۇيىمداستىرۋمەن اينالىساتىن «ەير قازاقستان» كومپانياسىن قۇرۋ تۋرالى تاپسىرما بەرگەن بولاتىن. بۇگىندە مەملەكەت وسى جاڭا كومپانيانى قۇرۋعا قىزۋ دايارلىق ۇستىندە.
None
None

«استانا كۇنى» مەرەكەسىندە كولىك جانە كوممۋنيكاتسيالار مينيسترلىگى ەلوردادا «ەير قازاقستانعا» ارنالعان ۇشاقتاردىڭ رەسمي تانىستىرىلىمىن وتكىزدى. قازاقتىڭ ۇلان-بايتاق جەرىنىڭ ءار اتىرابىنا ساياحات جاساعىسى، اۋدان-قالالارىنا اتتانعىسى كەلەتىن ادامدار ەندى كانادالىق ۇشاقتارعا جايعاساتىن بولادى.

اتاپ ايتقاندا، ەل ۇكىمەتى تۇڭلىگىن جاڭادان ءتۇرىپ جاتقان وتاندىق اۋە كومپانياسى ءۇشىن «Bombardier Aerospace» كومپانياسىنىڭ «Q400 NextGen» مودەلدى ۇشاقتارىن ساتىپ الۋدى جوسپارلاۋدا ەكەن. بۇل رەتتە «تەمىر سامۇرىقتىڭ» مۇمكىنشىلىكتەرىمەن تانىسۋ ءۇشىن «ەير قازاقستاننىڭ» جانە اقپارات قۇرالدارىنىڭ وكىلدەرى جاڭا ۇشاققا وتىرىپ، اسپانعا كوتەرىلدى.

-  Q400 NextGen ۇشاعى ورتا ازيانىڭ ءارتۇرلى وڭىرلەرىندە پايدالانۋعا جاقسى جارايدى، -  دەپ ماقتايدى ءوز ونىمدەرىن
 «Bombardier Commercia Aircraft»- ءتىڭ بيزنەستى دامىتۋ جونىندەگى ديرەكتورى مارك گيلبەرت.

-  ول نارىقتاعى ەڭ زاماناۋي تۋربوۆينتى ۇشاق بولىپ سانالادى. ول قازاقستان ىشىندەگى باعدارلاردا قاۋىپسىزدىكتىڭ، سەنىمدىلىكتىڭ جانە جولاۋشىلار ءۇشىن جايلىلىقتىڭ ەڭ جوعارعى ستاندارتتارى بويىنشا قىزمەت كورسەتۋگە لايىق.

ونىڭ سەندىرۋىنشە، ۇشاق وتە ىستىق كليماتتا دا، سونداي-اق ەكسترەمالدى تومەن تەمپەراتۋرالاردا دا قىزمەت ەتە بەرەدى. بۇل ۇشاق 54 گرادۋسقا دەيىنگى سىرتقى اۋا تەمپەراتۋراسىندا ۇشا الاتىنى تۋرالى سەرتيفيكاتقا يە. قازىرگى ۋاقىتتا الەمدە وندىرىلەتىن باسقا 70 ورىندىق ۇشاقتارمەن سالىستىرعاندا، ونى ەكسپلۋاتاتسيالاۋعا كەتەتىن شىعىننىڭ ەلەۋلى تۇردە از ەكەندىگى دە ايتىلدى.

«قازاقستاندىق تاراپپەن كوممەرتسيالىق كەلىسىم اقىرعى كەزەڭىنە شىقتى. بۇگىندە 10 ۇشاق الۋ تۋرالى ءسوز قوزعالۋدا. ۇشاقتىڭ كاتالوگتىك باعاسى شامامەن 30 ميلليون دوللار» دەدى جۋرناليستەردىڭ سۇراعىنا جاۋاپ بەرگەن مارك گيلبەرت. دەگەنمەن، ولار جاڭا كليەنت رەتىندە قازاقتارعا جەڭىلدىك جاساۋعا ءازىر.

ال «ەير قازاقستان» جاڭا اۋە كومپانياسىنىڭ پرەزيدەنتى نۇرجان شاكىروۆ بارلىعى 10 ۇشاقتىڭ ەلىمىزگە «كەلەسى جىل بويى» اكەلىنەتىندىگىن ناقتىلادى: «2015 - جىل بەدەرىندە ۇشاقتار توپ-توبىمەن جەتكىزىلەدى: الدىمەن 4 نە 6, ارى قاراي تاعى 6 نە 4 ۇشاق كەلىپ جەتەدى. كەلەر جىلدىڭ ناۋرىز-ساۋىرىندە العاشقى جاڭا ۇشاقتاردى الامىز دەپ ويلايمىز. الداعى جىلدىڭ ءبىرىنشى جارتىسىنىڭ اياعىندا ۇشۋدى باستايمىز. بۇل ىسكە «سامۇرىق-قازىنا» مەن Bombardier قاتىسادى، سوڭعىسى كونسۋلتاتيۆتىك قولداۋ كورسەتەدى» .

«ەير قازاقستان» باسشىلىعى ءوز تاڭداۋلارىنىڭ ءدال وسى اۋە كولىگىنە تۇسكەندىگىن ايتادى. ايتپەسە، نارىقتارى شەكتەلە باستاعان رەسەيلىك وندىرۋشىلەر دە ءوز ۇشاقتارىن «وداقتاستىڭ» جاڭا كومپانياسىنا وتكىزۋگە قۇشتارلانىپتى. «ەگەر ءبىزدىڭ كليماتتىق، گەوگرافيالىق ەرەكشەلىگىمىزدى ەسكەرسەك، تۇساۋى كەسىلىپ وتىرعان ۇشاق -  ەڭ ۇزدىگى، -  دەيدى ن. شاكىروۆ. -  بۇل -  بارلىق تالاپتارعا جاۋاپ بەرەتىن جالعىز ۇشاق».

«ەير قازاقستان» باسشىسىنىڭ مالىمەتىنشە «Q400 NextGen»  باسقاراتىن ۇشقىشتارىمىز كانادادا دايارلاناتىن بولادى. «باستاپقىدا باتىستىق پيلوتتاردى تارتاتىن بولامىز، ويتكەنى جەتكىلىكتى كولەمدە ۇشقىشتار بولماي تۇر. بىرتە-بىرتە ءوز ۇشقىشتارىمىزدى قاتارعا قوسا بەرەمىز دە، ءبىرىنشى جىل بەدەرىندە ەكيپاجدىڭ ءبىر بولىگىن جەرگىلىكتى كادرلاردان قۇرايمىز» دەدى ول. ۇشاق ساتۋشى شەتەلدىك كومپانيا قاراجاتىنا وتاندىق مامانداردى وقىتۋ بويىنشا اۆياتسيالىق-تەحنيكالىق ورتالىق قۇرىلادى دەپ كۇتىلۋدە.

«ەير قازاقستان» مەن «ەير استانا» ءوڭىرارالىق ىشكى رەيستەردە ءبىر-بىرىمەن ارىپتەستىكتە جۇمىس جاسايدى.

«ءبىز «Air Astana» - عا كومەكتەسەمىز، جولاۋشىلاردى ونىڭ نەگىزگى حابتارىنىڭ ورنالاسقان جەرىنە دەيىن جەتكىزىپ وتىرامىز. ياعني الماتى، استانا جانە اتىراۋعا ءارتۇرلى قالالارىمىزدان قاتىنايتىن بولامىز. سونداي- اق قانداي دا ءبىر سەبەپتەرمەن «ەير استانا» ۇشپايتىن نە جەتكىلىكتى تۇردە ءجيى ۇشپايتىن قالالارعا باعىت سالامىز» دەدى ن. شاكىروۆ.

 ودان جۋرناليستەر «ەير قازاقستاننىڭ» بيلەتىنىڭ باعاسىن بىلۋگە تىرىستى. «ۇشاقتاردىڭ ۇنەمدى ەكەندىگىن ەسكەرسەك، ىشكى وڭىرلىك باعىتتاردىڭ ءتاريفى تومەن بولادى دەپ جوسپارلاپ وتىرمىز، ءبىراق قانشاعا ارزان بولاتىنىن قازىر بولجاۋ قيىن. قالاي بولعاندا، ول حالىقتىڭ ءار الۋان توپتارىنا قولجەتىمدى بولۋعا ءتيىس، ءسويتىپ، ءبىز نارىقتا وتەلمەي تۇرعان قاجەتتىلىكتى جابۋعا نيەتتىمىز» دەدى «Air Kazakhstan» باسشىسى.

«ايقىن»

 

سوڭعى جاڭالىقتار