11:40, 10 - شىلدە 2014 | GMT +5
يسلامشىل توپ جاساقشىلارى يادرولىق ونىمدەردى قولدى قىلدى
استانا. قازاقپارات - يراك بيلىگى ب ۇ ۇ-عا «يسلام مەملەكەتى» توبىنىڭ سودىرلارى ەلدىڭ سولتۇستىگىندەگى زەرتحانادان ۋران ۇرلاعاندىقتارىن ءمالىم ەتىپ، ونىڭ قولدانىلۋ قاۋپىنىڭ الدىن الۋعا شاقىردى، دەپ حابارلادى شەتەلدىك ب ا ق.

يراكتىڭ ب ۇ ۇ جانىنداعى ەلشىسى موحاممەد ءالي ءال-حاكيمنىڭ پان گي مۋنعا جازعان حاتىندا موسۋل قالاسىنداعى ۋنيۆەرسيتەت اۋماعىندا ساقتالعان شامامەن 40 كەلى ۋران قوسپاسىنىڭ ەكسترەميستەردىڭ قولىنا تۇسكەندىگى ايتىلعان. «لاڭكەستىك توپ بيلىك باقىلاۋىنان شىعىپ كەتكەن نىساننان يادرولىق ماتەريالداردى باسىپ الدى»، - دەلىنگەن ءال- حاكيم حاتىندا.
ديپلوماتتىڭ اتاپ وتۋىنشە، مۇنداي ماتەريال جاپپاي قىرىپ-جوياتىن قارۋدى جاساۋ بارىسىندا كادەگە جاراۋى مۇمكىن. سونىمەن قاتار ول ۇرلانعان يادرولىق زاتتىڭ ەل اۋماعىنان تىسقارى شىعارىلۋ قاۋپى بار ەكەندىگىن دە اتاپ وتكەن.
ال ا ق ش بيلىگىنە قاتىسى بار دەرەكوزدىڭ سوزىنە قاراعاندا، سودىرلار ۇرلاپ كەتكەن ۋران بايىتىلماعان. سول سەبەپتى ول يادرولىق قارۋ جاساۋعا جارامسىز.
اۆتور: مارلان جيەمباي