ءتورت بالانى كوپسىنەم دەپ، ءبىر بالاعا زار بولعان ايەلدىڭ وكىنىشى

وسىدان ءبىر ەكى كۇن بۇرىن جيددا قالاسىنىڭ تۇرعىنى قاسيەتتى رامازان ايىندا ءوزىنىڭ وسىدان 8 جىل بۇرىن جاساعان ۇرلىعى ءۇشىن كەشىرىم سۇراپ، يەسىنە ۇرلاپ العان زاتىنىڭ قۇنىن تولەپ بەرگەنىن ەستىگەن ەدىك.
ال، بۇگىن ءوز ەلىمىزدە بولعان، جوعارىداعى وقيعاعا ۇقساپ قالاتىن تاعى ءبىر وقيعانىڭ كۋاسى بولىپ وتىرمىز. بۇل تىپتەن قىزىق. قىزىعى سول - وقيعا الاشقا اتى بەلگىلى ايتىس ءدۇلدۇلى اينۇر تۇرسىنبايەۆامەن بايلانىستى . بۇل تۋرالى kazaitys.kz پورتالى جازدى .
اتالمىش سايتتىڭ قابارلاۋىنشا فەيسبۋك الەۋمەتتىك جەلىسىن قولدانۋشىلاردىڭ ءبىرى اينۇر تۇرسىنبايەۆاعا تومەندەگىدەي حات جازىپ جىبەرىپتى.
«اسسالاۋماعالەيكۋم، اينۇر، سىزگە كوپتەن جازعىم كەلىپ ءجۇر ەدى. قىزعانىش پا بىلمەيمىن، كۇيەۋىم ماقتاي باستاسا، قويشى سول ساقاۋ قىزدى دەپ جاقتىرمايتىنمىن. قازىر قىزىم ەكى جاسقا كەلدى، دارگەرلەر مىلقاۋ دەپ دياگنوز قويدى. ەندى ويلايمىن، ءوزىمنىڭ تىلدەن تاپقان قايعىم سياقتى. مەنى كەشىرىڭىز اللاحتىڭ رازىلىعى ءۇشىن!» .
ال اينۇر وعان: «اللاح سابىر بەرسىن، دۇعا ەتىڭىز، اللاح بار سىناقتى ۋاقىتشا دەگەن. سىزگە ەش رەنجىمەيمىن. مەن ساقاۋمىن دەپ قاپالانبايمىن، 42 ءارىپتى تولىق ايتپاسام دا التى الاشتى اۋزىما قاراتقان اللاحقا سانسىز ماقتاۋلار ايتامىن! ادامنىڭ باقىتى تىلگە تىرەلىپ تۇرعان جوق، ءالى- اق ءتىلاشار تويىن جاسايسىز! مەنى شاقىرۋدى ۇمىتپاڭىز! قىزىڭىزدىڭ دا، ءسىزدىڭ دە بەتىڭىزدەن ءسۇيدىم!!!» ، - دەپ جاۋاپ جازىپتى.
مىنە، وسىنداي ادەتتەگى كۇندەرى ەسكەرىلە بەرمەيتىن كەيبىر توسىن جاعدايلار، وقيعالار وسى قاسيەتتى ورازا ايىندا ەرىكسىز ەسكە تۇسەدى. وسى جوعارىداعى اقپاراتتاردى وقىعاننان كەيىن، مەنىڭ دە ەسىمە وسىدان 3 جىل بۇرىن بولعان ءبىر وقيعا ءتۇسىپ كەتتى.
ول بىلاي ەدى. استاناداعى مومىش ۇلى كوشەسىنىڭ بويىنداعى كوپ قاباتتى تۇرعىن ۇيلەردىڭ بىرىندە ەكى بولمەلى پاتەردى ەكى وتباسى جالداپ تۇرىپ جاتتىق.
كورشى بولمەدەگى كىسىلەردىڭ 4 بالاسى بار- تۇعىن. ءبىر كۇنى ايەلىممەن بىرگە جۇمىس ىستەيتىن ءبىر جاس كەلىنشەك ۇيگە ەرە كەلدى. ءوزى اۋىراياق ەكەن. ولار ەسىكتەن كىرە بەرگەن دە كورشىنىڭ ءتورت بالاسى بىرىنەن كەيىن ءبىرى سۋىرىلىپ كىرە بەرىسكە شىعا كەلدى.
سول- اق ەدى، الگى كەلىنشەك: «مىنا بالانىڭ بارلىعى كىمدىكى؟ ويباي نەدەگەن كوپ بالا، ءبىر ءۇيدىڭ بالاسى ما؟ » دەپ بىزگە سۇراق جاۋدارا باستادى. مەن قوناعىمنىڭ سۇراعىنا قاراي ازىلدەي ءتىل قاتتىم. كوڭىلىمدە ەشتەڭە جوق. «بۇل ءتورت بالا كوپ ەمەس، ءبىز ءبىر اكە- شەشەدەن ون ءتورتبىز. ءبىراق، كوپتىگىمىز بىلىنبەيدى، سىزگە مەنىڭ انامنىڭ التىن قۇرساعىن بەرسىن» دەدىم جاي عانا.. .
انا كەلىنشەكتىڭ كوزى سىرتىنا شىعىپ كەتە جازدادى. «قۇداي ساقتاسىن، قۇداي ساقتاسىن! ءتۇبا، ءتۇبا! ونداي كوپ بالادان قۇداي ساقتاسىن! ونداي كوپ بالانى باسىما بەرمەسىن» ، - دەپ جەرگە قايتا- قايتا تۇكىرىنىپ، ۇستەلدى سۇق ساۋساعىمەن ءتۇيىپ- ءتۇيىپ تاستادى.
ۇيىمە كەلگەن قوناعىمنىڭ بۇل ءىس- ارەكەتىنە قاراپ ءوزىم ىڭعايسىزدانىپ قالدىم. ءتىپتى، ول كەتكەننەن كەيىن، وزىمە- ءوزىم «ءبىز كوپپىز بە؟ » دەگەن سۇراق تا قويدىم. جوق، شىنىمەن كوپتىگىمىز بىلىنبەيدى. ءار قايسىمىز ءوز الدىمىزعا جەكە- جەكە ءۇي بولىپ كەتتىك. قازىر ءبىر رۋلى ەلدەيمىز. حوش!
الگى كەلىنشەك ۇيىمە كەلىپ كەتكەننەن كەيىن ءبىر كۇن ءوتتى، ەكى كۇن ءوتتى، تۋرا ءۇشىنشى كۇنى قۇرساعىنداعى 4-5 ايلىق بالاسىنىڭ ءتۇسىپ قالعانىن ەستىدىم.
اللانىڭ قۇدىرەتىن كوردىڭىز بە؟ سودان بىرنەشە كۇن بۇرىن 3-4 بالانى كوپسىنىپ وتىر ەدى. سول كەزدە ومىرگە ءبىرىنشى رەت اكەلگەلى وتىرعان قۇرساعىنداعى سابيىنەن وپ- وڭاي ايىرىلىپ قالاتىنىن سەزبەدى- اۋ! كەيىننەن سول ايتقان سوزدەرى ءۇشىن مەنەن كەشىرىم دە سۇرادى.
سودان بەرى ءۇش جىل ءوتتى. ايەلىم ەكەۋى ءالى سول ءبىر جەردە جۇمىس ىستەيدى. ءالى بالا كوتەرە الماي، ءبىر پەرەزەنتكە زار بولىپ ءجۇر. كەيدە، مەنىڭ ايەلىممەن وڭاشا قالعاندا سىرىن ءبولىسىپ، «ەندى اللا- تاعالا 10 بالا بەرسە 10 بالا، ودان كوپ بەرسە ودان دا كوپ بالا تۋۋعا دايىنمىن» دەپ ايتاتىن كورىنەدى.
مىنە، قاسيەتتى ورازا ايىندا مەن دە وسى وقيعانى وقىرمان نازارىنا ۇسىنعاندى ءجون سانادىم. ءسىز بەن ءبىزدى اللا بىردەي ەتىپ جاراتتى. جالپىمىزعا ورتاق جەر بەتى ، اسپان استىنان نەسىبە سىيلادى . ولاي بولسا، اللاعا العىس- ماقتاۋ ايتۋدان جالىقپايىق، ارتىق كۇپىر ءسوز ايتۋدان ساق بولايىق اعايىن.
اۆتور: كۇنسۇلتان وتارباي