رەسەي فۋتبول وداعى عيماراتىنا مۇشەقاپ جاۋدىردى

استانا. قازاقپارات  - ءبىر توپ جىگىت رەسەي فۋتبول وداعى (ر ف س) عيماراتىنا شابۋىل جاسادى.

جاستار وداقتىڭ ماسكەۋدەگى نارودنايا كوشەسى، 7- ۇيدە ورنالاسقان كەڭسەسىنىڭ كىرەبەرىسىنە مۇشەقاپتار لاقتىرعان.

ولار وسىلايشا ۇيىمنىڭ باسشىسى نيكولاي تولستىحتىڭ ساياساتىنا نارازىلىق ءبىلدىردى. نارازىلىق شاراسى بەس مينۋتقا جۋىق ۋاقىتقا سوزىلدى.

تارتىپسىزدىك جاساعان توپ وداق باسشىسىنان قىزمەتتەن كەتۋدى تالاپ ەتتى. اقپارات قۇرالدارىنىڭ حابارلاۋىنشا، نارازىلىق شاراسىن ماسكەۋ فۋتبول كلۋبتارىنىڭ ءبىرىنىڭ فاناتتارى ۇيىمداستىرعان.

جانكۇيەرلەر رەسەي قۇراماسىنىڭ 2012 - جىلعى ەۋروپا چەمپيوناتىنداعى ساتسىزدىگىنەن كەيىن دە ۇيىم باسشىسىنا نارازىلىق بىلدىرگەن بولاتىن. ول كەزدە رەسەي فۋتبول وداعىن سەرگەي فۋرسەنكو باسقاردى.

ال نارازىلىق شاراسىن «سپارتاك» فۋتبول كلۋبىنىڭ تابىنۋشىلارى ۇيىمداستىرعان ەدى. ءبىراق ول ۋاقىتتا وداق جەتەكشىلىگى نارازىلىق شاراسىنا ەشقالاي كوڭىل اۋدارعان جوق.

ەسكە سالا كەتەيىك، جۋىردا رەسەي فۋتبول وداعى باسشىلارىن قىزمەتتەن كەتىرۋدى ساياساتكەر، ل د پ ر پارتياسىنىڭ جەتەكشىسى ۆلاديمير جيرينوۆسكي دە ايتقان بولاتىن. جيرينوۆسكي وداق جەتەكشىلەرىن ۇلتتىق قۇراماعا باس باپكەر رەتىندە «اشكوز، قاراقشى» فابيو كاپەللونى سايلاعانى ءۇشىن ايىپتاپ وتىر.

رەسەي قۇراماسى برازيليادا ءوتىپ جاتقان الەم چەمپيوناتىندا توپتىق كەزەڭنەن وتە الماعان بولاتىن. رەسەيلىك فۋتبولشىلار الجير (1:1) ، وڭتۇستىك كورەيا (1:1) كوماندالارىمەن تەڭ تۇسسە، بەلگيا قۇراماسىنان (0:1) جەڭىلىپ قالدى.

tengrinews.kz