پان گي مۋن، ب ۇ ۇ باس حاتشىسى: قازاق حالىقىن، مادەنيەتىن جانىممەن سۇيەمىن دەپ نىق سەنىممەن ايتا الامىن

استانا. قازاقپارات - قازاق - قايتالانباس مادەنيەتى بار، كەرەمەت فولكلورى قالىپتاسقان تالانتتى ادامدارعا تولى ەل.

«دالا اۋەنى» اتتى كونسەرتكە كەلگەن امەريكالىق كورەرمەندەر وسىنداي ويلارىمەن ءبولىستى.

كونسەرتتىك باعدارلاما نيۋ-يورك پەن ۆاشينگتوننىڭ ەڭ تانىمال زالدارىندا بەرىلدى. بۇل شارانىڭ ءبارى ا ق ش-تاعى قازاقستاننىڭ مادەنيەت كۇندەرى اياسىندا ءوتتى.

قۇرمانعازى اتىنداعى وركەستر نيۋ-يورك قالاسىنا ءبىر ەمەس، بىرنەشە قىزىقتى شىعارمانى الىپ كەلىپتى. بايقاۋىمىزشا، ۇيىمداستىرۋشىلار حالىق اۋەندەرىنە كوپ ءمان بەرگەن.

ماقسات - امەريكا حالقىنا قازاقتىڭ ءتول فولكلورىن تانىتۋ. زالدا تاڭقالماعان كورەرمەن بولمادى.

پان گي مۋن، ب ۇ ۇ باس حاتشىسى:

- مەن ءوز باسىم بۇل كونسەرتتەن كەرەمەت اسەر الدىم. شىنىمەن دە عاجاپ بولدى. مەن قازاق ەلىندە ءبىر ەمەس، بىرنەشە رەت بولعان اداممىن. سوندىقتان دا ءسىزدىڭ حالىقتى، ءسىزدىڭ مادەنيەتتى جانىممەن سۇيەمىن دەپ نىق سەنىممەن ايتا الامىن.

نۇرسۇلتان نازاربايەۆتىڭ قول استىنداعى ەل ەكونوميكا مەن ساياساتتا دا، مادەنيەتتە دە جاقسى بەلەستەردى باعىندىرىپ كەلەدى. مىنا كونسەرت سول ءسوزىمنىڭ ايعاعى بولسا كەرەك.

دەلەگاتسيامىزدى تانىستىرعان ۇيىمداستىرۋشىلار ەلىمىزدىڭ جارقىن يميدجى سىرت ەلدەردە وسىنداي مادەني بايلانىستاردىڭ، كونسەرتتىك باعدارلامالاردىڭ كومەگىمەن تانىلادى دەدى.

راس امەريكا حالقى مايرا مۇحامەد قىزى مەن نۇرجامال ۇسەنبايەۆانى، ەدىل قۇساينوۆ سەكىلدى جۇلدىزداردى جاقسى بىلەدى ەكەن. ال بۇل كونسەرت ولارعا جاڭا تالانتتاردىڭ ەسىمىن تانىتتى.

اسقار بورىبايەۆ، ق ر مادەنيەت ءمينيسترىنىڭ ورىنباسارى:

- كورىپ وتىرمىز، مۇندا ب ۇ ۇ-نىڭ وكىلدەرى كەلگەن. ءتىپتى ا ق ش-تا اككرەديتتەلگەن بارلىق-دەرلىك ەلشىلەر دە وسىندا وتىر. مەنىڭ ويىمشا، ولار ءۇشىن بۇگىنگى شارا وتە قىزىقتى ءوتتى.

ەندى ولار العان اسەرلەرىن، قازاقستان مادەنيەتىنىڭ دەڭگەيىن ءوز ورتالارىندا ايتىپ جۇرەتىن بولادى. ال ۆاشينگتوندا ءبىزدىڭ ارتىستەرىمىز كەننەدي ورتالىعىندا ونەر كورسەتتى.

بۇل زالدا نەگىزىنەن، الەمدىك دەڭگەيدەگى مۋزىكانتتار وينايدى ەكەن. كورەرمەندەر قازاق ونەرىنە تىك تۇرىپ، قوشەمەت كورسەتتى.

راۆي پاترا، ۇلت ارالىق زاڭ كومپانياسىنىڭ باسشىسى:

- قازاقستانعا بىزگە سىيلاعان وسى مەرەكە ءۇشىن العىس ايتامىن. كونسەرت وتە كەرەمەت بولدى. ءتانتى بولدىم. ءبىز مۇندا عاجاپ اۋەنگە ەلتىپ، قازاق ەلىنىڭ تالانتتى ورىنداۋشىلارىنا تاڭداي قاقتىق.

ءسويتىپ، قازاق مۋزىكانتتارىنىڭ امەريكا جەرىندە وتكەن ۇلكەن تۋرى ۆاشينگتوندا شىمىلدىعىن جاپتى. ءبىراق بۇنىمەن ا ق ش-تاعى قازاقستاننىڭ مادەنيەت كۇندەرى اياقتالدى دەۋگە بولمايدى. الداعى كۇز ايلارىندا مۇنداعى كورەرمەن «استانا بالەت» پەن «استانا وپەرانىڭ» كونسەرتتىك باعدارلاماسىن توسادى.

kz.24