ەلوردادا قوعامدىق ۆەلوسيپەد پايدالانۋعا بەرىلدى

ەندى ەلوردالىقتار سول جاعالاۋدا ورىن تەپكەن 40 پۋنكتتىڭ بىرىنەن ۆەلوسيپەدتى جالعا الىپ، سول جاعالاۋداعى كەز كەلگەن اۋدانعا قاتىناي الادى. مۇنداي باعدارلامالار ەۋروپالىق جانە سولتۇستك امەريكالىق ەلدەردە باياعىدا- اق ەنگىزىلگەن. «سامۇرىق- قازىنا» ۇلتتىق ءال- اۋقات قورى قولعا الىپ وتىرعان جوبا «استانا bike« دەپ اتالادى.
تاريفتەرگە كەلەتىن بولساق، العاشقى 30 مينۋتتى تەگىن تەبۋگە بولادى. 1 ساعات - 100 تەڭگە، 2 ساعات - 250 تەڭگە، 3 ساعات - 500 تەڭگە، 4 جانە ودان كەيىنگى ءاربىر ساعات - 1000 تەڭگەدەن تۇسەدى.
«استانا baike« نەگىزىنەن ۆەلوسيپەدتى كوڭىل كوتەرۋ ەمەس، جەتۋ قۇرالى رەتىندە پايدالاناتىن جۇرت ءۇشىن اسا ىڭعايلى بولماق. جوبانىڭ بۇگىنگى تانىستىرىلىمى بارىسىندا "سامۇرىق- قازىنا" كومپانياسىنىڭ وكىلدەرى دە وسى ماسەلەگە كوپ ءمان بەردى. سەبەبى بۇل باستاما الەۋمەتتىك سيپاتقا يە.
ەڭ باستىسى، تۇراقتى پايدالانۋشىلارعا ارنالعان كارتانى ساتىپ الۋ كەرەك. ونىڭ قۇنى 6500 تەڭگە تۇرادى. سونىڭ 5000 تەڭگەسى ءساۋىر مەن قاراشاعا دەيىن جالعاساتىن ءبىر ۆەلو ماۋسىمنىڭ ابونەنتتىك تولەمى رەتىندە الىنسا، 500 تەڭگە پايدالانۋشىنىڭ تەڭگەرىمىن تولتىرۋعا جۇمسالادى. بولاشاقتا جوبا اۆتورلارى كارتاداعى تەڭگەرىمدى تەرمينالدار ارقىلى سالۋعا بولادى دەپ وتىر.
كارتا ءاربىر ادامنىڭ اتىنا جازىلادى، ەگەر كولىك 24 ساعاتتىڭ ىشىندە قايتارىلماسا، ول ۇرلاندى دەپ ەسەپتەلەدى جانە ۆەلوسيپەدتىڭ ءرولى تايمەردىڭ كومەگىمەن اۆتوماتتى تۇردە بۇعاۋلانادى. سونىمەن قاتار وندا ارنايى GPS قوندىرعى ورناتىلعان، سوندىقتان ونىڭ قايدا تۇرعانىن انىقتاۋ قيىنعا سوقپايدى. ەگەر ۆەلوسيپەدتى جوعالتىپ نەمەسە سىندىرىپ الساڭىز، 100 مىڭ تەڭگە وتەۋگە تۋرا كەلمەك.
ازىرگە ۆەلوسيپەدتى جالعا الۋعا بولاتىن 40 ستانسا قالانىڭ سول جاعالاۋىنا عانا ورناتىلىپ وتىر. قولدانىسقا 200 ۆەلوكولىك بەرىلدى. كەلەسى كەزەڭدە تاعى 100 تۇراق اشىلادى جانە قوسىمشا 1000 ۆەلوسيپەد پايدالانۋعا بەرىلمەك. بۇل ءوز كەزەگىندە وڭ جاعالاۋدى دا قامتۋعا مۇمكىندىك بەرەدى.
ۆەلوستانسالار كۇن باتارەياسىنان قۋات الادى. ايتا كەتەيىك، ۆەلوسيپەد فرانسيادا جاسالعان جانە ونىڭ بولشەكتەرى ۆاندالدارعا قارسى قۇراستىرىلعان. ەگەر ونى كەڭسەڭىزدىڭ جانىنا ۋاقىتشا قالدىرىپ كەتكىڭىز كەلسە، رولدە ارنايى سىم قۇلىپ بار.
2015 - جىلى بۇل جوبا تولىقتاي سول جاعالاۋ مەن وڭ جاعالاۋدىڭ ءبىرقاتار بولىگىن قامتيدى دەپ جوسپارلانۋدا. ال 2016-2017 -جىلدارى ەكسپو-2017 حالىقارالىق كورمەسىنىڭ اۋماعىندا ەنگىزىلەدى دەپ كۇتىلۋدە.