ەلوردا حالقى مەن قوناقتارى استانانىڭ تۋعان كۇنىن تويلاۋدا - فوتو رەپورتاج

كەشە ەلوردانىڭ ءار جەرىندە ءارالۋان شارالار وتكىزىلدى. قاي جاققا باس سۇقساڭ دا، مەرەكەلىك دۋمانعا تاپ بولاسىڭ.
اتاپ ايتقاندا، «حان شاتىر» ماڭىندا «مىڭجىلدىقتار توعىسىنداعى استانا» كوشپەندىلەر فەستيۆالى قانات جايدى، «استانا شاتتىق» اۆتوكەرۋەنى قالا ماڭىنداعى كەنتتەردى ارالاپ، شەتتەگى حالىقتى مەرەكەدەن شەت قالدىرمادى. ال تاماققا تالعامپاز جاندار ءۇشىن اسپازدار فەستيۆالى ءوتتى. جالىنداعان جاستار كوشە ءبيى فەستيۆالىن تاماشالاپ، ءبىر سەرپىلىپ قالدى. مىنە، وسى سىندى مەرەكەلىك شارالار قالانىڭ شىرايىن كەلتىردى.
قالالىق ساياباقتاردا دا سەرۋەن قۇرعاندار كوپ. ەلوردانىڭ 4 ءىرى پاركىندە تەاترلاندىرىلعان قويىلىمدار كورسەتىلىپ، سپورتتىق سايىستار ۇيىمداستىرىلىپ، بارلىق ۇلتتىڭ مادەنيەتىنە تەرەڭ بويلاۋعا جاعداي جاسالدى. ودان بولەك قالاداعى تياترلاردا جاڭا قويىلىمداردىڭ تۇساۋى كەسىلىپ، ءبىرقاتار كونسەرتتىك باعدارلامالار ءوتىپ جاتىر. جالپى، قالا كۇنىن مەرەكەلەۋ اياسىنداعى ءىس- شارالارعا 20 مىڭنان استام ادام قاتىسقان.
سالتاناتتى شارالار «قازاق ەلى» مونۋمەنتىنىڭ الدىنداعى نۇرشاشۋمەن اياقتالدى. ءسويتىپ استانانىڭ تۇنگى اسپانىندا ءبىر مەزەتتە سان مىڭداعان وت جاعىلىپ، قازاقستاننىڭ وزگە وڭىرلەرىنە ساليۋتپەن سالەم جولداعانداي بولدى!