جاس كەلىن... جالاڭاش يىق
ارت جاعى ءتىپتى، جاۋىرىندارى بولەكتەنىپ، بەلىنە دەيىن جالاڭاشتانىپ تۇراتىندارى دا بار...
بۇعان ونىڭ كۇيەۋى، اتا-ەنەسى، اكە-شەشە، تۋىستارى قالاي بىلق ەتپەي تۇرا بەرەدى؟
ولارعا ءبارى ءبىر مە؟ ورىستىڭ ويىنا كەلگەنىن ىستەگەنى، باتىستىڭ بالدىر-باتپاعى قازاققا قاسيەتتى مە؟ جوق، ولاردىڭ ءبارى «وركەندەپ»، «دامىپ» كەتكەن دە، مەن عانا «قالىپ» كەتكەن اداممىن با؟
جاس كەلىن... جالاڭاش يىق... يىق، كەۋدە تۇگىل ءبىزدىڭ وڭتۇستىكتە شاشىن دا كورسەتپەي اق جاۋلىق سالادى عوي... سول سياقتى جاس جۇبايلاردى قازاقشا كيىندىرۋ قانداي اسەم، قانداي اسەرلى بولاتىنىنا ۇلتتىق داستۇردە وتكەن تويلاردا كۋا بولىپ ءجۇرمىز. قازاقتىڭ ۇلتتىق كيىمىنە، اسىرەسە قىزداردىڭ كيىمىنىڭ اسەمدىگىنە الەمدە ەل جەتپەيدى!
ساتيريك مۇحتار شەرىمنىڭ ۇلتتىق ءداستۇرىمىزدى قورعاشتاۋىن قۇپتاعاندىقتان تۋىپ جاتقان وي عوي بۇل...
قىز ۇزاتۋداعى قىزدى اكەسىمەن بيلەتەتىن اۋمەسەر اسابالاردىڭ ميسىزدىعىنا ميىقتان قاراپ قانا قويماي، ونى توقتاتۋ ءۇشىن وسىلاي قوعامدىق پىكىر تۋدىرۋ دا جەمىسىن كورسەتەتىنى ءسوزسىز.
قۇدا مەن قۇداعيدى بيلەتە عوي قالاعانىڭشا... قۇدالارعا ءتوس ءتۇيىستىر! ال ۇزاتىلاتىن قىزدى اكەسىمەن بيلەتىپ، كۇيەۋ بالانى قايىن ەنەسىنىڭ بەلىنەن قۇشاقتاتىپ قويۋ، اسابانىڭ عانا اقىماقتىعى ەمەس، توي يەلەرىنىڭ دە بەيامال بەيشارالىعى!
سول سەكىلدى جات جۇرتتىڭ قاڭسىعىن تاڭسىق كورىپ، كەلىن مەن كۇيەۋ تورت كەسىپ الىپ، اتا-انالارىنىڭ اۋزىنا تىققىشتاپ، ولاردىڭ ۇرتتارى بۇلتىڭداپ شايناڭداپ جاتۋى - ءتىپتى ەرسى قىلىق ەمەس پە؟ قازاقتىڭ كەلىنگە ءتاتتى ءشاي قۇيدىراتىن ءتالىمدى ءراسىمىن جاساعان جاراسىمدى تويلاردى دا كورىپ قالعان ەدىك، سونى جاپپاي جالعاستىرۋ كەرەك دەپ بىلەمىز.
ق. جارىلقاسىن ۇلى
qazaquni.kz
