التاي قازاقتارى استانا تۇرعىندارىن قالا كۇنىمەن قۇتتىقتادى

«استانالىقتاردى قۇتتىقتاۋ ءۇشىن ءبىز التايدان ارنايى كەلدىك. ارتىستەرىمىز نەگىزىنەن اۋدان جاستارىنىڭ شىعارماشىلىق ۇجىمدارىنان قۇرالعان. كەشكە بارلىق تىلەك بىلدىرۋشىلەردى شاقىردىق»، - دەدى قوساعاش اۋدانىنىڭ باسشىسى اۋەلحان جاتقانباي.
اۋدان باسشىسىنىڭ ايتۋىنشا، قوساعاشتا قازىر ون مىڭعا جۋىق قازاق تۇرادى. وندا قازاق مادەني ورتالىعى جۇمىس ىستەيدى.
«ءبىز بارلىق ۇلتتىق مەرەكەلەردى اتاپ وتەمىز. قازاق مادەني ورتالىعىنىڭ جۇمىسى مەن جەرگىلىكتى بيلىكتىڭ قولداۋى ارقاسىندا ءوزىمىزدىڭ سالت-ءداستۇرىمىزدى، ءتىلىمىز بەن ءدىنىمىزدى ساقتاپ وتىرمىز. بۇگىندە اۋدانداعى ءاربىر قازاق اۋىلىندا مەشىت پەن مەكتەپتەر بار»، - دەدى التايلىق دەلەگاتسيا باسشىسى.
كونسەرتتى ۋنيۆەرسيتەت ستۋدەنتتەرى مەن وقىتۋشىلارى، قالا تۇرعىندارى تاماشالادى. شىعارماشىلىق ۇجىم ەلوردالىقتاردى التايلىق اۆتورلاردىڭ ءار جىلدارداعى ۇلتتىق ساز-اۋەندەرىمەن سۋسىنداتتى.