الەمدىك دوپ دوداسى: كىمنىڭ باعى جانىپ، كىمنىڭ ساعى سىنادى؟

استانا. قازاقپارات - برازيليانىڭ سان-پاۋلۋ قالاسىندا 12 - ماۋسىم كۇنى باستالعان فۋتبولدان الەم چەمپيوناتىنىڭ اياقتالۋىنا ساناۋلى كۇندەر عانا قالدى.
None
None

بىرىنشىلىكتىڭ تۇندىگى تۇرىلگەلى دە بۇگىن تۇپ-تۋرا 25 كۇن بولىپتى. ەندى 8 كۇننەن كەيىن، وسىمەن 20-رەت جالاۋى جەلبىرەگەن الادوپ دوداسى ءوز مارەسىنە جەتەدى.

قازىرگە دەيىن شيرەك فينالدىڭ ويىندارى تولىعىمەن اياقتالدى. كەشە تۇندە جارتىلاي فينالعا شىققان برازيليا مەن گەرمانيانىڭ قاتارىن ارگەنتينا جانە نيدەرلاندى قۇرامالارى تولىقتىردى.

مەسسي باستاعان جىگىتتەر توپتىق كەزەڭدە توعىز ۇپاي جيناپ، ءجۇز پايىزدىق كورسەتكىش كورسەتكەن بولاتىن.

پلەي-وففتا شۆەيتساريانى سوڭعى مينۋتتا ارەڭ ۇتىپ ەدى. ال كەشە بەلگيامەن بولعان ماتچتا دا يگۋايننىڭ سوققان جالعىز گولى سابەليا شاكىرتتەرىنە جەڭىس اكەلدى. جارىستى وسى جەردە اياقتاعان بەلگيا قۇراماسىنا العىستان باسقا ايتارىمىز جوق.

«قىزىل سويقاندار» الەمدىك مۋنديالعا اراعا 12 جىل سالىپ قاتىستى. سوندىقتان بۇل از جەتىستىك ەمەس. ازار، لۋكاكۋ باستاعان جىگىتتەر الداعى دودالاردا بۇدان دا جوعارى ناتيجە كورسەتۋى ءتيىس.

سونىمەن قاتار جاراقاتتار لەگى تولاستاماي تۇر. برازيليا مەن كولۋمبيا ويىنىندا الاڭ يەلەرىنىڭ باستى جۇلدىزى نەيمار جاراقات الىپ، جارىستى جالعاستىرا الماعان. ەندى، مىنە، ارگەنتينا ساپىنان «رەال» كومانداسىنىڭ جارتىلاي قورعاۋشىسى انحەل دي ماريا دا ءبىرىنشى تايمنىڭ ورتا تۇسىندا ءوزىنىڭ ورنىن ارىپتەسى ەنتسو پەرەسكە تاستاپ كەتتى. قاقپالارىنا جىلدام گول جىبەرىپ العان بەلگيا ەسەپتى تەڭەستىرۋگە تىرىسىپ باقتى. ءبىراق، وڭتۇستىك امەريكالىقتاردىڭ قورعانىسىن بۇزىپ جارىپ وتە المادى.

ال نيدەرلاندى مەن كوستا-ريكا كەزدەسۋى 120 مينۋتقا سوزىلدى. وسىعان دەيىن بەس ماتچتا 24 گول سوعىلعان «فونتە-نوۆا» ستاديونىنان وسى جولى گول كورە المادىق. بۇل دا وزىنشە قىزىق ستاتيستيكا.
چەمپيونات باستالعالى سەنساتسياعا تولى بولعان كوستا-ريكا ەرتەگىسى اياقتالدى. دەگەنمەن ولار جانكۇيەرلەرىنىڭ الدىندا باستارىن تىك كوتەرىپ باراتىن بولدى. برازيليا جەرىندە بەس ماتچ وتكىزىپ، سونىڭ ەكەۋىن قوسىمشا ەكسترا-تايمعا دەيىن جەتكىزدى. «تيكوس» (قۇرامانىڭ لاقاپ اتى) گوللانديانىڭ جۇلدىزدى شابۋىلشىلارىن اتتاپ باستىرمادى. كاسيلياستىڭ يەلەگىن بەس رەت كوزدەگەن روببەن مەن پەرسي باستاعان شابۋىلشىلار كەيلور ناۆاستان ايلاسىن اسىرا الماي پۇشايمان بولدى. جالپى، ناۆاس بيىلعى بىرىنشىلىكتە بەس كەزدەسۋ وتكىزىپ، بار-جوعى ەكى گول عانا جىبەردى.

نيدەرلاندى قۇراماسىنىڭ باس باپكەرى لۋي ۆان گال ءوزىنىڭ كەرەمەت تاكتيك ەكەنىن تاعى ءبىر مارتە دالەلدەدى. 120 مينۋت بويى گول سوعىلماعان سوڭ، جەڭىمپاز پەنالتي سەرياسىندا انىقتالدى. ءدال وسى پەنالتيدى قايتارۋ ءۇشىن ياسپەر سيللەسسەننىڭ ورنىنا تيم كرۋل شىقتى. باپكەر تۇيسىگى الداماپتى. كرۋل بەس سوققىنىڭ ەكەۋىن قايتارىپ، قۇراماسىن جارتىلاي فينالعا الىپ شىقتى.

قاقپاشىدان ايلاسىن اسىرا الماعان كوستاريكالىق برايان رۋيس پەن مايكل ۋمانيا بولدى. گوللانديا ساپىنان جۇلدىزداردىڭ بارلىعى دەرلىك مەرگەندىك تانىتتى. ولار: ۆان پەرسي، ارەن روببەن، ۋەسلي سنەيدەر جانە ديرك كەيت.

ەندى جارتىلاي فينالدىڭ ويىندارى 9-10 - شىلدەگە جوسپارلانعان. العاشقى جۇپ برازيليا - گەرمانيا كەزدەسۋى بەلۋ-وريزونتي قالاسىندا وتەدى. ەكىنشى جۇپتا ارگەنتينا مەن گوللانديا سىنعا تۇسەدى. ولار سان-پاۋلۋ قالاسىندا فينالعا كىمنىڭ لايىق ەكەنىن انىقتايدى.

مەرگەندەر كوشىن ازىرگە كولۋمبيا قۇراماسىنىڭ فۋتبولشىسى حامەس رودريگەس باستاپ تۇر. ونىڭ ەنشىسىندە التى دوپ بار. حامەستى قۋىپ جەتۋگە ەكى فۋتبولشىنىڭ مۇمكىندىگى بار. ولار - گەرمانيا قۇراماسىنان توماس ميۋلللەر جانە ارگەنتينالىق ليونەل مەسسي. 

***
جالپى، بيىلعى الەم چەمپيوناتى كوپتەگەن توسىن وقيعالارمەن ەستە قالارى داۋسىز. بيىل ناعىز سەنساتسياعا تولى بىرىنشىلىك بولدى. سونىمەن قاتار ءبىرقاتار رەكوردتىق كورسەتكىشتەر دە ورىن الدى. ەندى وسى جايىندا ازداپ توقتالىپ وتسەك.

بيىل الەم چەمپيوناتىنا جالپى 32 كوماندا قاتىستى. تارقاتىپ ايتساق، ەۋروپانىڭ - 13، وڭتۇستىك امەريكانىڭ - 6، افريكانىڭ - 5، سولتۇستىك امەريكا جانە ازيا مەن مۇحيتتار ايماعىنان 4 كوماندا جارىس جولىنا اتتانعان بولاتىن. وسىلاردىڭ اراسىندا ازيالىقتاردىڭ بىردە- بىرەۋى پلەي-وفف دوداسىنا جولداما الا المادى.

ازيالىقتارعا قاراعاندا افريكا ەلدەرىنىڭ كوماندالارى ءبىرشاما ءتاۋىر ونەر كورسەتتى. قارا قۇرلىقتان كەلگەن نيگەريا مەن الجير 1/8 فينالعا دەيىن شىقتى. ەكەۋى دە ازۋلى قارسى¬لاستارعا جولىققانىمەن، ولارعا قاسقايىپ قارسى تۇرا ءبىلدى. نيگەريا فرانسيامەن تەرەزەسى تەڭ ونەر كورسەتىپ، سوڭعى 10-15 مينۋت¬تا ەسە جىبەردى. الجير گەرمانياعا تويتارىس بەرىپ، تەك قوسىمشا ۋاقىتتا ۇتىلدى.

سولتۇستىك امەريكانىڭ ءۇش كومانداسى پلەي-وفف كەزەڭىنە شىقتى. مەكسيكا مەن ا ق ش 1/8 فينالدا سۇرىنسە، كوستا-ريكا شيرەك فينالعا دەيىن جەتتى.

وڭتۇستىك امەريكا وكىلدەرى اراسىنان بەس كوماندا 1/8 فينالعا دەيىن قينالماي جەتتى. بۇل تۋرالى تىزە بەرسەك، ايتىلار اڭگىمە وتە كوپ.

بيىلعى بىرىنشىلىكتە توپتىق كەزەڭنىڭ وزىندە ءبىرقاتار اتى اڭىزعا اينالعان ال¬پاۋىت كوماندالار جەڭىلىستىڭ كەرمەك ءدامىن تاتىپ، جارىستى ەرتە اياقتادى. اتاپ ايتساق، الەمنىڭ 4 دۇركىن چەمپيونى يتاليا مەن 1966 - جىلعى الەم چەمپيونى انگليا قۇرامالارىن ەشكىم وڭاي شاعىلاتىن جاڭعاق دەپ ويلاعان جوق. ەكەۋى دە جارىستى ەرتە اياقتادى. «D» توبىندا سىنعا تۇسكەن اپەننين تۇبەگىنىڭ تۇلەكتەرى ءۇش ۇپايعا عانا قول جەتكىزسە، تۇماندى البيون ەلىنىڭ وكىلدەرى بار-جوعى ءبىر ۇپايدى قاناعات تۇتتى.

يسپانيا فۋتبولشىلارى دا الىسقا شابا العان جوق. ولار 2010 - جىلعى الەم چەمپيوناتىندا، 2008 جانە 2012 - جىلدارى ەۋروپا بىرىنشىلىگىندە قارسىلاس شاق كەلتىرمەي، باس جۇلدەنى ەنشىلەگەن بولاتىن. وكىنىشكە قاراي، پيرەنەي تۇبەگىنىڭ تاس تۇلەكتەرىنىڭ باسىنا برازيليادا قارا بۇلت ءۇيىرىلدى. ولار ءوز توبىندا گوللانديادان 1:5 ەسەبىمەن ويسىراي ۇتىلسا، چيليگە 0:2 ەسەبىمەن ەسە جىبەردى. سونداي- اق قۇرامىندا كريش¬تيانۋ رونالدۋ سىندى الەمنىڭ ەڭ ۇزدىك فۋتبولشىسى بار پورتۋگاليا قۇراماسى دا توپتىق تۋر¬نيردەن ارى اسا المادى. ولار گەرما¬نيادان ۇتىلدى، ا ق ش-پەن تەڭ ءتۇستى جانە گانانى ۇتتى. دوپ ايىرماشىلىعى جاعى¬نان پاۋلۋ بەنتۋ شاكىرتتەرى امەري- كالىقتارعا جول بەردى. مىنە، وسىنداي قىزىقتارعا تولى بىرىنشىلىكتىڭ اياقتالۋىنا از عانا ۋاقىت قالدى.

برازيلياداعى دوپ دوداسى وسى كۇنى كۇللى الەمنىڭ نازارىندا. بۇل كۇندەرى جارىستىڭ ناسيحاتى دا، قىزىعى مەن شىجىعى دا اسىپ-تاسىپ وتىر. 20 مىڭنان استام جۋرناليست 10 مىڭداي ەرىكتى، جالپى سانى 4 ميلليونعا جەتەقابىل جانكۇيەرلەر بارلىعى دا برازيليانىڭ 12 قالاسىندا ۇلكەن تويدىڭ ورتاسىندا باسەكەنىڭ كورىگىمەن بىرگە قىزىپ، بىتە قايناسىپ جاتىر.

الەم چەمپيوناتىندا توپ جارعان قۇراماعا 35 ميلليون دوللار بۇيىرادى. ەكىنشى ورىن العان كوماندا 25 ميلليون السا، ۇزدىك ۇشتىكتىڭ قاتارىنان كورىنگەن ۇجىم 22 ميلليون دوللار الادى. بيىل كىمنىڭ باعى جانىپ تۇر؟ قاي كوماندا تەڭدەسسىز اتانادى؟ ول تۋرالى الدىن الا بولجام جاساماي تۇرا تۇرايىق. ناعىز مىقتىنى الداعى ۋاقىت كورسەتە جاتار. ول كۇندەر دە از قالدى.

ەستەرىڭىزگە سالا كەتەيىك، 2014 - جىلعى مۋنديالدىڭ ماتچتارى برازيليانىڭ 12 قالاسىندا: ريو- دە-جانەيرو، رەسيفي، سالۆادور، سان-پاۋلۋ، پورتۋ-الەگري، ماناۋس، فورتالەزا، ناتال، بەلۋ-وريزونتي، برازيليا، كۋيابا، كۋريتيبا ستاديوندارىندا ءوتىپ جاتىر.

اۆتور: كۇنسۇلتان وتارباي

سوڭعى جاڭالىقتار