ق ر اسكەري سوتىندا «قورعاس ءىسى» بويىنشا اپەللياتسيالىق شاعىم قارالۋدا

سوت وتىرىسى سوتتالعانداردىڭ قاتىسۋىنسىز وتۋدە. بۇل تۋرالى ق ر اسكەري سوتىنىڭ باسپا ءسوز حاتشىسى امانگەلدى جۇلقايناروۆ ءمالىم ەتتى.
اپەللياتسيالىق شاعىمدى ق ر اسكەري سوتىنىڭ سۋدياسى ا. م. نۇربەكوۆ قاراۋدا.
ەستەرىڭىزگە سالا كەتەيىك، تاۋەلسىز قازاقستان تاريحىنداعى سىبايلاس جەمقورلىققا قارسى ەڭ ءىرى ءىس بويىنشا ۇكىم 12 - ساۋىردە شىعارىلعان ەدى.
«قورعاس ءىسى» بويىنشا 45 ادام سوتتى بولعان. ولاردىڭ 42 سى قاماۋعا الىندى. ايىپتالۋشىلاردىڭ كوبى - كەدەن قىزمەتىنىڭ ايماقتىق ورگاندارى مەن ۇلتتىق قاۋىپسىزدىك كوميتەتىندە جوعارى لاۋازىمدى شەنەۋنىكتەرى.
ءىستىڭ باستى ايىپتالۋشىلارىن - «ۇيىمداسقان قىلمىستىق توپ جەتەكشىلەرى» تالعات قايىربايەۆ پەن باقىت وتاربايەۆتى قىلمىستىق توپتى ۇيىمداستىرعانى جانە جەتەكشىلىك ەتكەنى، ەكونوميكالىق كونتراباندا، قاراجاتتى زاڭداستىرعانى، قىلمىسقا دايىندىق جاساپ، ازىرلەنگەنى، پارا بەرگەندەرى ءۇشىن ايىپتى دەپ تاپتى. ولار - ءىستىڭ باستى ايىپتالۋشىلارى، ءارى «ۇيىمداسقان قىلمىستىق توپتىڭ جەتەكشىلەرى» بولىپ اتالدى. تالعات قايىربايەۆ باس بوستاندىعىنان 16 جىلعا، ال باقىت وتاربايەۆ 13 جىلعا ايىرىلدى.
سوتتىڭ ايىپتاۋى بويىنشا، «قورعاس» كەدەن بەكەتىندەگى الاياقتىق ارەكەتتەردى ۇلتتىق قاۋىپسىزدىك كوميتەتىنىڭ جوعارى لاۋازىمدى تۇلعالارى جاسىرىپ كەلگەن. ولاردىڭ اراسىندا پولكوۆنيك تالعات جاقايەۆ، پودپولكوۆنيك يرلان ءابدىراحمانوۆ جانە اقمولا وبلىسى بويىنشا ۇ ق ك دەپارتامەنتى باسشىسىنىڭ ورىنباسارى، پولكوۆنيك باقىتبەك قۇرماناليەۆ بار.
جاقايەۆ پەن ءابدىراحمانوۆتىڭ ەكەۋى دە 17 جىلعا باس بوستاندىعىنان ايىرىلدى. ال قۇرماناليەۆ 16 جىلعا سوتتالدى. الماتى وبلىسى بويىنشا كەدەندىك كوميتەت دەپارتامەنتىنىڭ بۇرىنعى باسشىسى، پولكوۆنيك قۇرمانبەك ارتىقبايەۆ 14 جىلعا سوتتالدى. ولاردىڭ ءبارى اسكەري اتاقتارىنان ايىرىلدى. بۇعان قوسا سوت قازاقستان پرەزيدەنتىنە ولاردى مەملەكەتتىك ماراپاتتارىنان ايىرۋ تۋرالى ۇسىنىس جاسادى.
«قورعاس» كەدەن بەكەتىنىڭ بۇرىنعى باسشىسى، كەدەن قىزمەتىنىڭ پودپولكوۆنيگى باقىتجان بەس جارىم جىلىن تەمىر توردىڭ ار جاعىندا وتكىزەتىن بولدى. ال ايداروۆقا ەلدەن كەتپەۋ جايلى الدىن كەسۋ شاراسى قولدانىلعان. الايدا ول تۇتقىنداۋعا وزگەرتىلدى. ونىڭ قولىنا كىسەن سوت زالىندا سالىندى. «قالجات» كەدەن بەكەتىنىڭ بۇرىنعى باسشىسى ميندۋللا ۇمبەتقاليەۆ 9 جىلعا سوتتالدى. «الاتاۋ- س ت و» كەدەن بەكەتىنىڭ بۇرىنعى باسشىسى ميحايل ۆويتوۆيچ 8 جىلعا باس بوستاندىعىنان ايىرىلدى.
اۆتور: گۇلميرا عوسمانالي