ەلباسىنىڭ «سەنىممەن اتتانىپ، جەڭىسپەن ورالىڭدار!» دەگەنى ەستە - لوندون وليمپياداسىنىڭ قولا جۇلدەگەرى اقجۇرەك تاڭاتاروۆ

ەلباسى لوندون وليمپياداسىنا قاتىساتىن قازاقستان ۇلتتىق قۇراماسىنىڭ مۇشەلەرىن ارنايى قابىلدادى. مەملەكەت باسشىسى بىزگە ەل كۇتكەن بەلەستەن كورىنۋلەرىمىز كەرەك ەكەنىن باسا ايتىپ، «سەنىممەن اتتانىپ، جەڭىسپەن ورالىڭدار!» دەپ باتاسىن بەردى.
تۇماندى البيونعا استانادان وسىنداي ۇلكەن جاۋاپكەرشىلىكتى ارقالاپ اتتاندىق. ەلباسىنىڭ ءسوزى حالىقتىڭ تىلەگى عوي. بۇنىڭ استارىندا جۇرتتىڭ ارمانى، مەملەكەتتىڭ مۇددەسى جاتقانىن ايقىن تۇيسىنگەن ەدىك ءبارىمىز سول كەزدە. سوندىقتان، بوز كىلەمگە شىققان سايىن سەنىم ۇدەسىنەن شىعۋدى ويلاپ تۇردىم. پرەزيدەنتتىڭ باتاسى قينالعان ساتىمدە بويىما قۋات، كۇش- جىگەر بەردى.
مەملەكەت باسشىسىنىڭ اۋزى دۋالى ەكەن. لوندوندا قازاق سپورتشىلارى پرەزيدەنت سەنىمىن اقتاۋ ءۇشىن بار كۇش-جىگەرلەرىن سارپ ەتىپ، كوپشىلىك كۇتكەن مەجەدەن دە اسىپ تۇسكەنى بارشاعا ايان. 7 التىن، جالپى 13 مەدال ولجالاعان قازاقستان تاريحتا تۇڭعىش رەت وليمپيادا قورىتىندىسى بويىنشا 12- ورىننان كورىندى. بۇل سپورتشىلاردىڭ مەملەكەت باسشىسىنىڭ جاساعان قاناتتى قامقورلىعىنا قايتارعان العىسى ەدى.
جالپى، ەلوردانى ەلباسىنىڭ ەرلىك ءىسىنىڭ كورىنىسى دەسەك، قاتەلەسپەيتىن شىعارمىز. ارقا توسىندە ساناۋلى جىلداردىڭ ىشىندە كورگەن ادام سۇيسىنەر عاجاپ قالا بوي كوتەردى. وسى ەۋرازيا جۇرەگىندە قونىستانعان قالادان مەن ەكى جىل بۇرىن شىلدە ايىندا ارمان ارقالاپ اتتانىپ، ەكى ايدان كەيىن لوندون وليمپياداسىنىڭ قولا جۇلدەگەرى بولىپ ورالدىم. ماعان استانا قيالىما قانات ءبىتىرىپ، كوزدەگەن ماقساتىما جەتكەنىمدە قۋانا باۋىرىنا باسقانى ءۇشىن ىستىق. تاۋەلسىز ەلىمىزدىڭ ايبىنىنا اينالعان استانامىز رەتىندە قىمبات.
لوندوننان ورالعاندا استانا تورىندە ەلباسىمەن تاعى دا جۇزدەستىك. بۇل جولعى كەزدەسۋ ايرىقشا مانگە يە ەدى. سول كۇنگى قابىلداۋ مەن قۇرمەت شەرۋىنىڭ العى ساپىندا وليمپيادا چەمپيوندارى مەن جۇلدەگەرلەرى ءجۇردى. الەكساندر ۆينوكۋروۆ، بوكسشى سەرىك ساپيەۆ جانە اۋىر اتلەت يليا يلين «وتان» وردەنىمەن ماراپاتتالدى. وليمپيادا چەمپيوندارى سۆەتلانا پودوبەدوۆا، ءزۇلفيا چينشانلو، مايا مانەزا جانە ولگا رىپاكوۆا II دارەجەلى «بارىس» وردەنىنە يە بولدى. كۇمىس جۇلدەگەر ادىلبەك نيازىمبەتوۆ، قولا جۇلدەگەرلەر - بالۋان دانيال گادجيەۆ پەن بوكسشى يۆان دىچكو، بالۋان گۋزەل مانيۋروۆا، بوكسشى مارينا ۆولنوۆا «قۇرمەت» وردەنىمەن ماراپاتتالدى. پرەزيدەنتتىڭ قولىنان العان «قۇرمەت» وردەنى مەن ءۇشىن قۇرمەتتىڭ ۇلكەنى بولدى.