قازاقستان فۋتبول كلۋبتارى ەۋروپا دوداسىن ءدۇر سىلكىندىردى

ەۋروپا ليگاسىنىڭ 2014-2015 - جىلدار ماۋسىمىنداعى ءبىرىنشى ەلەكتىك ساتىسىنىڭ العاشقى ويىندارى ءبىز ءۇشىن وتە ءساتتى اياقتالدى. قازاقستاننىڭ ءۇش كلۋبى العاشى ويىندارىن وتكىزىپ، ۇشەۋى دە جەڭىسكە جەتتى. ەكەۋى تۇزدە ويناپ، بىرەۋى ءوز الاڭىندا دوداعا تۇسكەن بولاتىن. ءبىراق ءۇي دەمەي، ءتۇز دەمەي، ءبارى دە ناتيجەلى ويىندارىمەن وتاندىق جانكۇيەرلەردى قۋانتتى.
اسىرەسە، «استانا» جانە «شاحتەر» كلۋبتارى ورنەكتى ويىن ۇلگىسىن كورسەتىپ، ارارات اڭعارىندا ارمەنيانىڭ ەكى كلۋبىن تىزە بۇكتىردى. «استانا» ەريەۆاندا «پيۋنيك» كلۋبىن ويسىراتا جەڭسە، «شاحتەر» گيۋمريدە «شيراكتى» «شالقاسىنان» ءتۇسىردى. راس، ەكەۋى دە ءوز الاڭدارىندا ءبىر گولدان سوقتى. ءبىراق «شيراك» پەن «شاحتەر» اراسىندا ارمياندار جالعىز گولدى كۇدىكتى پەنالتيدەن ەنگىزدى. ءدال سول جەردە 11 مەترلىك ايىپ سوققىسىن سوعۋعا مۇمكىندىك بەرەتىندەي ورەسكەل ەشتەڭە بولا قويعان جوق سياقتى ەدى.
وسى رەتتە ايتا كەتەيىك، اتالعان ەكى ماتچتىڭ الدىندا ارمەنيا كلۋبتارى قۇرامدارىن ءبىراز نىعايتا تۇسكەن بولاتىن. مىسالى، «شيراك» رەسەيدەن بىرنەشە ويىنشى شاقىرتتى، ۋكراينادان دا الدى. ارالارىندا گانا، كوت- د، يۆۋار فۋتبولشىلارى جانە وزدەرىنىڭ ارمەنيالىق ويىنشىلارى دا بار.
ارمەنيانىڭ 10 دۇركىن چەمپيونى، التى مارتە كۋبوگىنىڭ يەگەرى «پيۋنيك» تە قۇرامىنا ەكى ويىنشى قوسىپ، جارتىلاي قورعانىسىن كۇشەيتۋگە تىرىسقان بولاتىن. ءبىراق قانشا تىرىسقاندارىمەن، قازاقستان كلۋبتارىنا شامالارى جەتپەدى.
ال «قايرات» الاتاۋ بوكتەرىندە البانيادان كەلگەن «كۋكەس» كلۋبىن ازەر ۇتتى. الماتى كلۋبىنىڭ جاڭا ويىنشىلارى ءالى سپورتتىق باپتارىنا كەلە الماي ءجۇر مە، جانكۇيەرلەرىن ءبىراز قوبالجىتتى. «كۋكەسيدىڭ» قاقپاسىنا گول سوعا الماي، ءبىراز سەرگەلدەڭگە ءتۇستى. كوماندا ساپىنا جاقىندا قوسىلعان برازيليالىق يساەل دا، افريكالىق گوۋ دا قاقپاعا دوپ توعىتا الماي-اق قويدى.
«قايراتىڭ» ەديگاريان، پليەۆ، باكايەۆ سىندى قىزۋ قاندى ويىنشىلارى باز-بازىندا جۇدىرىقتارىن الا جۇگىرۋدەن قىمسىنبايتىندىقتارىن كورسەتۋدەن اسپادى. جاراقاتىنا بايلانىستى قاتاردان شىعىپ قالعان مومودۋ سيسەيدىڭ ورنى ۇڭىرەيىپ تۇرعانداي بولدى.
دارا گولدى ويىننىڭ سوڭعى مينۋتتارىندا سوعىپ، الماتىلىقتارعا جەڭىس سىيلاعان - ءوزىمىزدىڭ اسلان دارابايەۆ. ءسويتىپ، سەگىز جىلدان كەيىن ەۋرودوداعا قايتا ورالعان «قايرات» ءبىر دوپ ايىرماسىمەن بولسا دا، جەڭىسكە جەتىپ، كەشە كەشكىسىن قازاقستان فۋتبولىنىڭ ابىرويىن ارتتىرۋعا ءوز ۇلەستەرىن قوستى. ەڭ باستىسى، ءوز الاڭىندا گول جىبەرگەن جوق.
قارىمتا ماتچتار 10- شىلدە كۇنى وتەدى. تۇزدە جەڭىسكە جەتكەن «استانا» مەن «شاحتەر» ءوز الاڭدارىندا ءسال باسىمدىلىقتارىن ۋىستارىنان شىعارا قويماس. «ال «قايراتقا» قيىنداۋ بولادى. ايتسە دە، ءۇمىتىمىزدى ۇزبەيمىز.
«پيۋنيك» (ەريەۆان، ارمەنيا) - «استانا» (استانا، قازاقستان) - 1:4
گولدار: نوسەربايەۆ، 40 (0:1) . جولشيەۆ، 67 (0:2) . پاپيكيان، 68 (1:2) . كەتيەۆواما، 71 (1:3) . كۋردوۆ، 84 (1:4) .
«استانا»: ەريچ، پيكالكين، دميترەنكو، انيچيچ، شومكو، كانياس، نۇرداۋلەتوۆ (كۋردوۆ، 46)، جولشيەۆ (بەيسەبەكوۆ، 80)، كەتيەۆواما، جۋكوۆ، نوسەربايەۆ (شاحمەتوۆ، 59).
«شيراك» (گيۋمري، ارمەنيا) - «شاحتەر» (قاراعاندى، قازاقستان) - 1:2
گولدار: توپچاگيچ، 71 (0:1). مالىي، 83 (0:2). دەبلە، 85-پەنالتيدەن (1:2).
«شاحتەر»: موكين، دجيديچ، مالىي، ماسلو، سيمچيەۆيچ، ۆيچيۋس، قونىسبايەۆ (سالوموۆ، 79)، پوكريۆاچ (بايجانوۆ، 90)، كيروۆ، توپچاگيچ (مۋرزويەۆ، 89)، فينونچەنكو.
«كايرات» (الماتى، قازاقستان) - «كۋكەس» (كۋكەس، البانيا) - 1:0
گول: دارابايەۆ، 89.
«قايرات»: حوميچ، پليەۆ، گۋرمان، كيسليتسىن، سماقوۆ، ميحاليك (بايتانا، 82)، يسلامحان، باكايەۆ، ەديگاريان (دارابايەۆ، 66)، گوۋ، يساەل (كنەجيەۆيچ، 66).
اۆتور: نۇرعازى ساسايەۆ
«الاش ايناسى»