قىتايدىڭ تۇڭعىش ۇشاق تاسىعىش كەمەسىندە جۇلدىز اتتى قازاق قىزى قىزمەت ەتەدى

استانا. قازاقپارات - قىتايدىڭ تۇڭعىش تەڭىزدەگى ۇشاق تاسىعىش كەمەسىندە (اۆيا نوسەس) جۇلدىز اتتى قازاق قىزى قىزمەت ەتەدى.

بۇل تۋرالى قىتايلىق ب ا ق حابارلادى.

قىتايدىڭ تۇڭعىش ۇشاق تاسۋشى لياۋنيڭ كەمەسىنە ايەل اسكەريلەر تۇڭعىش رەت الىنىپ وتىر. سوندىقتان جۇرتشىلىق تاراپىنان ولارعا ەرەكشە نازار اۋدارىلۋدا. لياۋنيڭدەگى اسكەري قىزدار تەڭىزدەگى بايلانىس پەن ناۆيگاتسيا سالاسىندا قىزمەت ەتەتىن بولادى.

 ايتا كەتەيىك، جالپى نازىك جاندىلار تۇڭعىش ۇشاق تاسۋشى كەمەدەگى اسكەري قۇرامنىڭ 5 پايىزىن قۇرايدى.

لياۋنيڭ اۆيا تاسىمالداۋشىسىنداعى ايەل اسكەريلەر 9 ۇلت وكىلدەرىنەن قۇرالعان. سولاردىڭ ىشىندە جۇلدىز اتتى قازاق قىزى دا بار. ونىڭ تۋعان جەرى شىنجاڭ ولكەسىنىڭ سانجى قالاسى تەڭىزدەن قاشىق بولعاندىقتان، اسكەر قاتارىنا قابىلدانعانعا دەيىن تەڭىزدى مۇلدە كورمەگەن بولىپ شىقتى.

 «مەن ومىرىمدە تەڭىزدى كورگەن ەمەسپىن. ءتىپتى اق فورما كيىپ، اۆيا تاسىعىشتا اسكەري قىزمەت ەتەم دەپ تە ويلاماعان ەدىم. ەسىمدە، ءبىز مۇندا تۇندە كەلدىك. الىستان ۇلكەن جارىقتار جانىپ تۇردى. مەن كەمەنى سول شامدارعا قاراپ ۇلكەن عيمارات ەكەن دەپ ويلاعانمىن. سويتسەم، ول الپاۋىت اۆياتاسىعىش بولىپ شىقتى» ، - دەيدى جۇلدىز.

اۆتور: ءابۋ- اسقار مەكەش ۇلى