قازاقستاننىڭ ۇلتتىق مۇراجايى الەمدەگى ەڭ ءىرى مۋزەيلەردىڭ العاشقى وندىعىنا ەنىپ وتىر

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگكە قازاقستان رەسپۋبليكاسى ۇلتتىق مۇراجايىنىڭ ديرەكتورى دارحان مىڭباي ءمالىم ەتتى.
ونىڭ ايتۋىنشا، اتالمىش مۇراجايدىڭ ورتالىق ازيادا تەڭدەسى جوق.
«مۇراجايدىڭ ەرەكشەلىكتەرى وتە كوپ. ونىڭ اۋماعىنىڭ ءوزى 74 مىڭ شارشى مەتردى قۇرايدى. ەرميتاج 180 مىڭ شارشى مەتر، لۋۆر - 160 مىڭ، مەتروپوليتەن دەگەن امەريكانىڭ كەرەمەت مۋزەيى - 110 مىڭ شارشى مەتر، ترەتياكوۆ گالەرەياسى 70-75 مىڭداي، كورەيا مۋزەيىنىكى - 135 مىڭ شارشى مەتر. ءبىزدىڭ مۇراجاي جالپى كولەمى جاعىنان الەمدە العاشقى وندىققا كىرەدى»، - دەيدى د. مىڭباي.
مۇراجاي باسشىسىنىڭ سوزىنە قاراعاندا، قازىرگى ۋاقىتتا كەشەننىڭ ءىشىن باعالى ەكسپوناتتارىمەن تولتىرۋ جۇمىستارى قارقىن العان.
«ماسەلە كولەمىن عانا ايتۋ ەمەس، ونداعى ەكسپوناتتاردىڭ مازمۇندىق جاعىنان الدىڭعى قاتارىنا شىعۋىمىز كەرەك. وعان بارلىق مۇمكىندىكتەرىمىز بار. جاقسى جادىگەرلەر ورتاق بولۋى ءتيىس.
سوندىقتان ءبىزدىڭ جەكە كوللەكتسيونەرلەر وسى ۇلتتىق مۇراجايدىڭ قورىنا قۇندى زاتتاردى تاپسىرىپ جاتىر. وعان ۇلكەن العىسىمىزدى بىلدىرەمىز. ول تاريحي قۇندىلىق بولىپ سانالادى. سوندىقتان وزدەرىندە ساقتالماي قالۋى مۇمكىن باعالى زاتتاردى وسى مۇراجايعا كەلىپ تاپسىرىپ جاتىر. بۇل جاقسى ءۇردىس جانە ءداستۇر بولىپ قالۋى ءتيىس»، - دەپ اتاپ ءوتتى ول.
مۇراجايدا زاماناۋي تەحنولوگيالارعا يە ارنايى زەرتحانالار مەن عىلىمي ورتالىقتار اشىلعان. ولار تاريحي جادىگەرلەردى ساقتاۋ، ونى زەرتتەۋ جانە قالپىنا كەلتىرۋ جۇمىستارىمەن اينالىساتىن بولادى. قازىرگى ۋاقىتتا ەۋروپانىڭ، رەسەيدىڭ تانىمال مۇراجايلارىمەن جانە كۋراتورلارىمەن ارىپتەستىك ورناتىلىپ، ءتيىستى كەلىسىم شاتتار جاسالۋدا.
ايتا كەتەيىك، وسىدان بىرەر كۇندەر بۇرىن ق ر پرەزيدەنتى ن. نازاربايەۆتىڭ قاتىسۋىمەن مۇراجايدىڭ اشىلۋ سالتاناتى وتكەن بولاتىن. د. مىڭبايدىڭ حابارلاعانىنداي، كەشەنگە كىرۋ اقىسى زەينەتكەرلەرگە، وقۋشىلارعا جانە مۇگەدەكتەرگە جەڭىلدەتىلگەن باعامەن ساتىلادى.
اۆتور: جاسۇلان جولدىبايەۆ