الماتى مەن قىتايدىڭ حۋبي ولكەسى ءوزارا ىنتىماقتاستىعى نىعايا تۇسپەك

الماتى. قازاقپارات - بۇگىن الماتى قالاسىنىڭ اكىمى احمەتجان ەسىموۆ حۋبي (قىتاي) ولكەسى كوممۋنيستىك پارتيا كوميتەتىنىڭ حاتشىسى لي حۋنچجۋن مىرزانى قابىلدادى.

 بۇل تۋرالى الماتى قالاسى اكىمىنىڭ باسپا ءسوز قىزمەتىنەن حابارلادى.

كەزدەسۋ بارىسىندا وڭتۇستىك استانانىڭ باسشىسى قازاقستان مەن قىتاي اراسىندا جوعارى دەڭگەيدە ستراتەگيالىق ارىپتەستىك ورناعاندىعىن جەتكىزدى.

«بيىل ماۋسىم ايىندا قازاقستان پرەزيدەنتى مەملەكەتتىك ىسساپارمەن قىتايدا بولىپ قايتتى. وسى ساپار بارىسىندا ەلباسى الماتى قالاسىن جاڭا «جىبەك جولىنىڭ» ورتالىعىنا اينالدىرۋ تۋرالى يدەيانى العا تارتتى. بۇل - ەكى ەل اراسىنداعى قارىم- قاتىناسقا جاڭا سەرپىن بەرەر ەدى» ، - دەدى ءوز سوزىندە احمەتجان ەسىموۆ.

الماتى مەن قىتاي اراسىنداعى تاۋار اينالىمى 2013 - جىلى 35 پايىزعا ۇلعايىپ، 5,5 ميلليارد  ا ق ش دوللارىن قۇرادى. ال 2014 -جىلدىڭ العاشقى توقسانىندا تاۋار اينالىمىنىڭ كولەمى 1 ميلليارد  63 ميلليون  ا ق ش دوللارىنا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 7 پايىزعا ارتىق.

الماتى قالاسىنىڭ اكىمى وسى مالىمەتتەردى ايتا كەلە، قالادا تۋريستىك كلاستەردىڭ دامىپ جاتقاندىعىن جانە ول ءۇشىن بارلىق جاعدايدىڭ جاسالعاندىعىن جەتكىزدى.

ءوز كەزەگىندە لي حۋنچجۋن مىرزا قىتاي دەلەگاسياسىنىڭ الماتىعا كەلۋدەگى ماقساتى - ەكىجاقتى قارىم- قاتىناستى ودان ءارى دامىتۋ ەكەندىگىن ەرەكشە اتاپ كورسەتتى. سونداي- اق قىتايدىڭ الماتى قالاسىنا ەرەكشە كوڭىل بولەتىندىگىن جانە قازاقستانمەن اراداعى ىنتىماقتاستىقتى جوعارى باعالايتىندىعىن ايتا كەلە، ءوزارا ءتيىمدى ارىپتەستىكتى ەكونوميكا جانە ساۋدا سالاسىندا عانا ەمەس، تۋريزم جانە ءبىلىم بەرۋ سالاسىندا دا دامىتۋدى ۇسىندى.

كەزدەسۋ سوڭىندا تاراپتار جان- جاقتى ىنتىماقاستىقتى ودان ءارى دامىتۋ بويىنشا ارنايى كەلىسىم دايىنداۋعا كەلىستى.

اۆتور: جاپپاربەرگەن ايبوتا