قازاقستان ازيا-تىنىق مۇحيتى مەن پارسى شىعاناعى ەلدەرى نارىعىنا تىكەلەي شىعا الاتىن بىرەگەي دەرجاۆاعا اينالادى - ن. نازاربايەۆ

بۇل تۋرالى بۇگىن ەلدىڭ ۇدەمەلى يندۋستريالىق- يننوۆاتسيالىق دامۋ مەملەكەتتىك باعدارلاماسىن ىسكە اسىرۋ بويىنشا ۇكىمەتتىڭ ەسەبىمەن تانىسۋى بارىسىندا ەلباسى نۇرسۇلتان نازاربايەۆ ءمالىم ەتتى.
«تەرمينال سالۋدامىز. تىنىق مۇحيتىنداعى ليانيۋنگان پورتىنان قازاقستانعا قاراي، باتىسقا تاۋار تاسىمالداۋدامىز. بۇل قىتايدان انتۆەرپەنگە دەيىنگى تەڭىز جولىن 35 تاۋلىكتەن 2 اپتاعا قىسقارتادى. ياعني، قازىردىڭ وزىندە كەلىسىمشارت جاسالىپ، وسى جەلى ارقىلى 250 مىڭ كونتەينەر وتەتىن بولادى. بۇل بىزگە دە جاقسى، لوگيستيكا ءۇشىن دە جاقسى. 2020 - جىلعا قاراي وسى تەرمينالدىڭ قۋاتى 2 ەسەگە ارتاتىندىعى بولجانۋدا. سونىڭ ارقاسىندا ءبىزدىڭ ەلىمىز ورتالىق ازياداعى ازيا- تىنىق مۇحيتى ءوڭىرى مەن پارسى شىعاناعى ەلدەرى نارىعىنا تىكەلەي شىعا الاتىن بىرەگەي دەرجاۆاعا اينالادى» ، - دەدى ەلباسى.
ن. نازاربايەۆ ەنەرگيا ۇنەمدەۋدى وڭتۇستىك كورەيادان ۇيرەنۋگە شاقىرادى
ەنەرگيانى ۇنەمدەۋدى ۇيرەنبەسەك، الدىڭعى قاتارلى 30 ەلدىڭ قۇرامىنا كىرۋدى ويلاۋدىڭ ءوزى ارتىق. «ەنەرگيانى ءتيىمدى پايدالانۋ، ەنەرگيانى ۇنەمدەي ءبىلۋ قازاقستان ءۇشىن بۇگىنگى كۇنى اۋاداي قاجەت. ەنەرگيا مەن گازدىڭ قۇنى بۇدان بىلاي وسپەسە، تومەندەمەيدى، ءبىز قالايىق، قالامايىق، ولاردىڭ باعاسى الەمدىك باعاعا جاقىنداۋى زاڭدىلىق. ياعني، ءبىزدىڭ بولاشاعىمىز تەك ەنەرگيانى ۇنەمدەۋدە، ەنەرگيانى از پايدالاناتىن قۇرىلعىلاردى پايدالانۋدا جاتىر. «جاسىل ەكونوميكا» دەگەنىمىز دە وسىدان شىعادى. ەنەرگيانى ۇنەمدەۋدى ۇيرەنبەسەك، الدىڭعى قاتارلى 30 ەلدىڭ قۇرامىنا كىرۋدى ويلاۋدىڭ ءوزى ارتىق»، - دەدى ەلباسى.
نۇرسۇلتان ءابىش ۇلى ەنەرگيانى ۇنەمدەۋدى ۇيرەنۋ ءۇشىن وڭتۇستىك كورەيانىڭ تاجىريبەسىن العا تارتتى.
«مەن بۇرىنىراقتا تاپسىرما بەرگەن ەدىم. تاسىمالداۋ كەزىندە ەنەرگيانى جوعالتۋ دەڭگەيىن تومەندەتۋ كەرەك دەدىم. ال ونىمەن ەشكىم اينالىسىپ جاتقان جوق. ءبىز ءوزىمىز شىعارعان ەنەرگيانى تاسىمالداۋ كەزىندە 20 پايىزىن جوعالتامىز. ال وڭتۇستىك كورەيا 7-8 پايىزىن عانا شىعىندايدى. ويتكەنى ولار ەنەرگيا جوعالتۋدى دەرەۋ تومەندەتەتىن تەحنولوگيانى پايدالانادى. بىزگە دە ەلەكتر ستانسالارىن سالۋدى ەمەس، سول ەنەرگيانى ۇنەمدەۋگە كومەكتەسەتىن جاڭاشىلدىقتاردى ەنگىزىپ، زاۋىتتار مەن كاسىپورىنداردى جاڭا قۇرىلعىلارمەن جابدىقتاۋ قاجەت»، - دەدى پرەزيدەنت.
اۆتور: ءابۋ- اسقار مەكەش ۇلى