بەيبىت ىستىبايەۆ: جەڭىلگەنىمە ايەلىمنىڭ ەش كىناسى جوق

استانا.قازاقپارات - قازاق كۇرەسىنەن «قازاقستان بارىسى» ءتۋرنيرى ءوز مارەسىنە جەتتى. ءتورتىنشى مارتە وتكەن بۇل ءدۇبىرلى دودادا بيىل ەل كۇتپەگەن ءجايتتار، ياعني سەنساتسيالار كوپ بولدى.
None
None

 ونىڭ ءبىرى 2012 - جىلى «قازاقستان بارىسى» ، 2013 - جىلى «ەۋرازيا بارىسى» اتانعان بەيبىت ىستىبايەۆتىڭ ەكىنشى بەلدەسۋىندە جەڭىلىپ قالعانى، دەپ جازادى «الاش ايناسى» گازەتى.

 بەيبىت ءبىرىنشى بەلدەسۋدە اقمولا وبلىسىنىڭ الىبى نۇرلان جامالوۆتى قينالماي جەڭگەن ەدى. ءسويتىپ، جامبىل وبلىسىنىڭ جامپوزى بابىندا ەكەنىن كوپشىلىككە ءبىر دالەلدەپ بەرگەندەي بولدى. ءبىراق، ول ەكىنشى اينالىمدا كۇتپەگەن جەردەن شىعىس قازاقستان وبلىسىنىڭ بالۋانى مۇحيت تۇرسىنوۆتان جەڭىلىپ قالدى.

 بەلدەسۋدى بەيبىت بەلسەندى باستاعان ەدى. وزىنەن شامامەن 35-40 كەلىدەي جەڭىل مۇحيتتى ول الىپ ۇرام دەگەن سەنىممەن شىقسا كەرەك، بوز كىلەمدە وزىنە سەنىمدى بولدى. دەگەنمەن، ءوز- وزىنە دەگەن سەنىمدىلىك بەيبىتتى تۇبىندە ساتسىزدىككە الىپ كەلدى. ۇرىمتال تۇستاردىڭ ءبىرىن ءساتتى پايدالانعان «جالىن» لاقاپ اتتى مۇحيت قارسىلاسىنىڭ اياعىنان شالىپ، جەڭىسكە جەتتى. ءدال وسى ساتتە «سارىارقا» ۆەلوترەگىنە جينالعان جانكۇيەر «گۋ» ەتە قالدى. ويتكەنى، بەلدەسۋدىڭ سوڭعى سەكۋندتتارى ءوتىپ، بەيبىتتىڭ جەڭىستى جۇلىپ الۋىنا ۋاقىت تا جەتپەيتىنىن ءبىلىپ تۇردى. بۇل ناعىز سەنساتسيا، ناعىز كۇتپەگەن ءجايت- تۇعىن.

جەكپە- جەك اياقتالعان سوڭ بەيبىت ەرىكسىز ءوزىنىڭ «قاسقىر باستى» تەرىسىن قارسىلاسىنا بەرىپ، تۋرنيردى ەكىنشى اينالىمنان اياقتادى. ىستىبايەۆ جەڭىلگەننەن كەيىن ەل اراسىندا ءبىرشاما الىپ- قاشپا اڭگىمە دە باستالىپ كەتتى. سول ءۇشىن دە «الاش ايناسىنىڭ» ءتىلشىسى بالۋاننىڭ وزىنە حابارلاسىپ، كىشى -گىرىم سۇحباتتاسقان بولاتىن.

- بەيبىت، ءتورتىنشى رەت وتكەن «قازاقستان بارىسى» تۋرالى پىكىرىڭىزدى ايتاساڭىز؟ ..

- بيىلعى «قازاقستان بارىسى» جوعارى دەڭگەيدە ءوتتى. ونى بالۋاندار تۇگىلى، شەت ەلدەن كەلگەن قوناقتار دا ايتىپ جاتىر. ۇيىمداستىرىلۋ دەڭگەيى دە، تۋرنيردىڭ ءوتۋ دەڭگەيى دە جوعارى. بالۋانداردىڭ دەڭگەيى ءوسىپ قالعانى قاتتى بايقالادى. سول ءۇشىن دە الدىڭعى جىلدارعا قاراعاندا بيىل باسەكەلەستىك تە جوعارى بولدى دەپ ەسەپتەيمىن.

- ال، «قازاقستان بارىسىنداعى» ءوز ونەرىڭىزدى قالاي باعالايسىز؟

 -  ارينە، بيىلعى دوداداعى ءوز ونەرىم كوڭىلىمنەن شىقتى دەپ باعالاي المايمىن. ويتكەنى، ءاۋ باستا مەن كەمىندە فينالعا جەتەمىن دەپ جوسپارلادىم. ءبىراق، ءىس- جۇزىندە ءبارى دە كەرىسىنشە بولدى. ول ءۇشىن مەن ەشكىمگە كىنا تاققىم كەلمەيدى. تاعدىر عوي. مەن 2012 - جىلى «التىن تۇياقتى» قانجىعاما باسقان ەدىم. بيىل وكىنىشكە قاراي وعان قول جەتكىزە المادىم. مۇمكىن سولاي بولۋى كەرەك تە شىعار. ەندى الداعى دودالارعا ەكى نە ءۇش ەسە جىگەرىلەنىپ دايىندالاتىن بولامىن. ال، قارسىلاسىما كەلەتىن بولسام، مۇحيت جاقسى جىگىت. ناعىز قارا كۇشتىڭ يەسى. وزدەرىڭىز دە كورگەن شىعارسىزدار، ول وزىنەن 35-40 كەلى اۋىر سالماقتاعى بالۋانداردى الىپ جىعىپ جاتتى. مەن ونىڭ جەڭىسى ءۇشىن وتە قۋانىشتىمىن.

 نەگىزى، ماعان شەكەسى تىرىسىپ جۇرەتىندەر ۇنامايدى، ولاردى كورسەم ءبىر نۇقىپ العىم كەلەدى، جالپىسىندا ادام دەگەن كوڭىلدى ءجۇرۋى كەرەك قوي، ءوزىم كوڭىلدى جۇرگەندى ۇناتامىن. سوندىقتان دا بۇل تۋرنيردە جەڭىلدىم مەن دەپ ءۇنجىرعامدى تۇسىرمەيمىن.

- ءسىزدىڭ بيىلعى «قازاقستان بارىسىندا» ءساتسىز ونەر كورسەتكەنىڭىزدى اركىم ءارتۇرلى ءتۇسىندىرىپ جاتىر. بىرەۋى بابىندا بولمادى دەسە، ەكىنشى ءبىرى باسقا فاكتورلار اسەر ەتتى دەيدى. ءسىز بۇل جونىندە نە ايتاسىز؟

- قاشاندا حالىق كوپ ءۇمىت ارتىپ وتىرعان ادام سۇرىنسە، ونى اقتاپ نە داتتاپ الۋدىڭ امالىن قاراستىرادى جۇرت. مەنىڭ جاعدايىم دا ءدال سولاي. جەڭىلگەنىمە ەشكىمدى كىنالامايمىن. قازىر، الەۋمەتتىك جەلىلەردە «بەيبىت وتاۋ قۇرعان سوڭ كۇشى كەمىپ قالىپتى» دەگەن اڭگىمەنىڭ دە ءجۇرىپ جاتقانىن بىلەمىن. ءبىراق، جەڭىلگەنىمە وتباسىمنىڭ دا، ايەلىمنىڭ دە كىناسى جوق! ول ءوزىمنىڭ قاتەلىگىم. كەيبىر جەرلەردە تاكتيكام دا دۇرىس بولمادى. سوندىقتان دا جەڭىلدىم. ايتقىم كەلەتىنى، كىنالى ادامدى ىزدەۋدىڭ قاجەتى جوق. ونىڭ ورنىنا جاتتىعۋ جۇمىستارىن جاساپ، كەلەسى تۋرنيرلەرگە تىڭعىلىقتى دايىندالۋ كەرەك.

- وقىرماندارىمىزعا الداعى جوسپارلارىڭىز تۋرالى ايتىپ بەرسەڭىز .. .

- مەنىڭ باستى جوسپارىم «قازاقستان بارىسىندا» مۇمكىندىگىنشە ءساتتى ونەر كورسەتۋ ەدى. وزدەرىڭىز كوردىڭىزدەر، ولاي بولماي شىقتى. ەندى شامالى دەمالىپ الامىن. وتباسىممەن بىرگە بولامىن. سوسىن جاتتىعۋ جۇمىستارىنا قايتا كىرىسەمىن.

- اڭگىمەڭىزگە راقمەت!

 اۆتور: ۋاليحان قوسانباي 

سوڭعى جاڭالىقتار