قىزىلوردا وبلىسىنىڭ اكىمى «قازاقستان بارىسى» پالۋاندارىنا پاتەر سىيعا تارتتى
«ءار سپورت جارىسىنىڭ وزىندىك ورنى بار. سونىڭ ىشىندە، ءتول سپورتىمىز - قازاق كۇرەسىنىڭ ءاربىر قازاق ءۇشىن ورنى ەرەكشە. ەل نامىسىن قورعاپ جۇرگەن ساڭىلاقتارىمىزعا قولداۋ كورسەتۋىمىز كەرەك»، - دەدى وبلىس اكىمى ق. كوشەربايەۆ.
وزدەرىڭىزگە بەلگىلى، ءتورتىنشى مارتە ۇيىمداستىرىلعان باسەكەدە رۋسلان ءابدىرازاقوۆ ۇزدىك ۇشتىكتەن كورىندى. ونىڭ اعاسى ۇلان رىسقۇل تۇڭعىش ۇيىمداستىرىلعان دودادا توپ جارعان بولاتىن. قوس سپورتشىعا الداعى سايىستاردا ءساتتى ونەر كورسەتۋگە تىلەكتەستىگىن بىلدىرگەن ايماق باسشىسى سالتاناتتى تۇردە پاتەر كىلتتەرىن تابىس ەتتى.
«نەگىزى دايىندىعىم جاقسى بولدى. ءوز-وزىمە جەڭىستىڭ بيىك تۇعىرىنان كورىنۋگە ۋادە بەرگەنمىن. ءبىراق ءسال ساتتىلىك جەتىسپەدى. كەلەر جىلى باس جۇلدەنى يەلەنۋ ءۇشىن بارىمدى سالامىن»، - دەدى رۋسلان ءابدىرازاقوۆ.
ر.ءابدىرازاقوۆ جۋرناليستەرگە بەرگەن سۇحباتىندا الدا الەم چەمپيوناتىنا دايىندالىپ جاتقانىن ايتتى.
اۆتور: ەلۋباي اۋەزوۆ
