استانادا «ماڭگىلىك ەل - ۇلت مۇراتى» اتتى رەسپۋبليكالىق جىر ءمۇشايراسىنىڭ جۇلدەگەرلەرى ماراپاتتالدى

استانا. قازاقپارات - استانا قالاسى اكىمدىگى استانا كۇنى مەرەكەسىنە وراي ۇيىمداستىرعان، وسىمەن ءتورتىنشى رەت وتكىزىلىپ وتىرعان ءداستۇرلى جىر بايگەسى مارەگە جەتتى.  
None
None

«ماڭگىلىك ەل - ۇلت مۇراتى» اتتى جىر ءمۇشايراسىنا ەلىمىزدىڭ اقىندارىمەن قاتار،  قىتاي حالىق رەسپۋبليكاسىندا، مونعوليادا تۇراتىن قانداستارىمىزدا قاتىستى. اقىندار ەلىمىزدىڭ وتكەنى مەن بۇگىنىن، كەمەلدى كەلەشەگىن ايشىقتى جىرلارىمەن  اسپەتتەپ، تۇعىرى بيىك، ىرگەسى بەكەم تاۋەلسىز قازاق ەلىنىڭ مۇراتى بيىك ماڭگىلىك ەل بولىپ قالا بەرەتىنىن ولەڭدەرىنە ارقاۋ ەتتى.

 جىر بايگەسىنىڭ باس قازىسى اكادەميك سەيىت قاسقاباسوۆ بولدى. جازۋشى قويشىعارا سالعارا ۇلى، اقىن نەسىپبەك ايت ۇلى، حالىقارالىق «الاش» سىيلىعىنىڭ يەگەرى سەرىك اقسۇڭقار ۇلى، اقىن، «تۇمار» جۋرنالىنىڭ باس رەداكتورى وڭايگۇل تۇرجان قاتارلى قازىلار القاسى اقىنداردى سارالاي كەلىپ سوڭعى شەشىمدى شىعاردى.  
 باس جۇلدە - تەمىر تۇلپاردى سەمەيلىك جاس اقىن ارمان شەريزاتوۆ تاقىمىنا باستى. ءبىرىنشى ورىندى (1 ميلليون 500 مىڭ تەڭگە) الماتىلىق تالانتتى قىزىمىز اقسۇيرىك ءىزمۇقانوۆا قانجىعاسىنا بايلاندى. ەكى ەكىنشى ورىندى (800 مىڭ تەڭگەدەن) قاراعاندىلىق قوس اقىن - ابزال بوكەن مەن ءىلياس مۇقايەۆ يەلەندى. ءۇشىنشى ورىنعا تىگىلگەن ءۇش جۇلدەنى (400 مىڭ تەڭگەدەن) حالىقارالىق «الاش» سىيلىعىنىڭ يەگەرى، «شەشەنستاننىڭ حالىق باتىرى» ، الماتىلىق رافاەل نيازبەكوۆ، جەزقازعاندىق كەنجەباي احمەتوۆ جانە استانالىق بەلگىلى اقىن تالعات ەشەن ۇلى ءوزارا ءبولىستى.

بەس ىنتالاندىرۋ سىيلىعىن (150 مىڭ تەڭگەدەن) مونعوليالىق قارت اقىن شىناي راحمەت ۇلى، الماتىلىق باتىق ءماجيت ۇلى، قىتاي حالىق رەسپۋبليكاسىنىڭ ازاماتى سەرىك ءتۇسىپحان ۇلى، اقتوبەلىك بالتابەك نۇرعاليەۆ، اياگوزدىك جاس تالاپكەر ءبىرجان احمەر قاتارلى اقىندار ەنشىلەدى. سونداي- اق، ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، استانا قالالىق ءتىل باسقارماسىنىڭ باستىعى ەربول تىلەشيەۆ، استاناداعى «فوليانت» باسپاسىنىڭ ديرەكتورى نۇرلان يسابەكوۆ تاعايىنداعان ءۇش ارنايى سىيلىق (100 مىڭ تەڭگەدەن) استانالىق باقىتجان توباياقوۆقا، شىمكەنتتىك جارىلقاسىن بورانبايەۆقا، اقتوبەلىك گۇلجاينار قالديناعا بۇيىردى.   

 جۇلدە العان جانە ءمۇشايرا قورجىنىنا كەلىپ تۇسكەن 70- كە جۋىق اقىننىڭ شىعارمالارىنىڭ تاڭداۋلىلارى جىل اياعىنا دەيىن جەكە كىتاپ بولىپ باسىلادى.   سونىمەن بىرگە، «التىن تامىر» جۋرنالىندا جاريالانادى. 

 اۆتور: باقىتجول كاكەش ۇلى

سوڭعى جاڭالىقتار