جەرلەستەرى «قازاقستان بارىسىن» قوشەمەتپەن قارسى الدى

استانا. قازاقپارات - بۇگىن شىعىس ءوڭىرىنىڭ جۇرتشىلىعى «قازاقستان بارىسى» اتاعىنا يە بولعان جەرلەستەرى مۇحيت تۇرسىنوۆتى زور قوشەمەتپەن قارسى الدى.

ءدۇبىرلى دودادا بارلىق قارسىلاستارىن ويسىراتا جەڭگەن بالۋان ءبىزدىڭ تىلشىلەرگە بەرگەن سۇحباتىندا جەڭىمپاز اتانۋىنا ءوز جەرلەستەرى مەن ايماق باسشىسى بەردىبەك ساپاربايەۆ قولداۋ بولعانىن ايتتى.

وسكەمەننىڭ اۋەجايى بۇگىن ەرەكشە ءسان-سالاتاناتقا تولى. باتىر ۇلدارىن كۇتىپ الۋعا جينالعان حالىقتىڭ قاراسى دا كوپ. شىعىس جۇرتى التىن اسىقتاي اردا ۇلدارىن الاقانعا سالىپ، توبەسىنە كوتەردى.

كوتەرمەي قايتسىن، ەلدىڭ نامىسىن ارقالاعان ۇلاندارى ابىرويمەن ورالسا. ال بالۋان ەڭ الدىمەن ءوزىنىڭ جەڭىسىنە كامىل سەنگەن جەرلەستەرىنە العىسىن جەتكىزدى.

مۇحيت تۇرسىنوۆ، «قازاقستان بارىسى-2014» جەڭىمپازى:

- وتكەن جىلى جەرلەسىمىز ايبەك نۇعىماروۆ التىن بەلبەۋگە يە بولىپ، ءوڭىردىڭ ابىرويىن اسقاقتاتتى. سوندىقتان بيىل ءبىزدىڭ الدىمىزدا سول تابىستى تاعى دا قايتالاۋ مىندەتى تۇردى.

قازاق دالاسىنىڭ ءار ايماعىنان جينالىپ، سايدىڭ تاسىنداي ىرىكتەلگەن 28 وعلان باس جۇلدەگە تىگىلگەن تايتۇياق التىن مەن 150 مىڭ ا ق ش دوللارىن ساراپقا سالدى.

جان الىسىپ، جان بەرىسكەندەي ايقاستا بوز كىلەمنىڭ ورتاسىندا ويقاستاپ، قارسىلاس شاق كەلتىرمەگەن شىعىستىڭ شيىرشىق اتقان شىمىر ۇلى مۇحيت تۇرسىنوۆ «قازاقستان بارىسى-2014» اتاعىنا يە بولدى. ول سپورتتاعى ءىرى جەڭىسىمەن كوزگە تۇسكەن شىعىس قازاقستان وبلىسىنىڭ العاشقى وكىلى ەمەس. بۇل ءوڭىر -  ەرتەدەن-اق باتىرلار مەن بالۋانداردىڭ مەكەنى. ساپاسىنا سىنا قاعىلمايتىن سپورت مەكتەپتەرى تالاي سايىپ قىران ساڭلاقتاردىڭ توماعاسىن سىپىرعان سپورتتاعى جۇلدىزىن جاقتى.

ءابىل دونبايەۆ، وبلىستىق دەنە شىنىقتىرۋ جانە سپورت باسقارماسىنىڭ باسشىسى:

- ءتورت جىلدان بەرى ءوتىپ جاتقان جارىستىڭ 4 ەۋىندە دە ءبىزدىڭ جىگىتتەر جۇلدە الىپ كەلىپ جاتىر. ەكى جىلدان بەرى «قازاقستان بارىسى» اتاعىن ءبىزدىڭ جىگىتتەر الىپ جاتىر. بەرىلەتىن 800 گرام تاياتۇياق تەك ءبىزدىڭ ەلگە قاراي جىلجىپ جاتىر. بىزدە رەزەرۆ بار، كەلەسى جىلى دا دايىندالىپ، ۇتامىز دەگەن ۇمىتتەمىز. كۇرەستە كۇش  اتاسىن تانىمايتىنىن وسى جولى بوز كىلەمدە بەلدەسكەن بالۋاندار تاعى ءبىر دالەلدەدى.

نامىس نايزاعايىن ويناتىپ، اراسالماقتىڭ الشاقتىعىنا قاراماي، الىپ تا، شالىپ تا جىققان ورەندەردىڭ ونەرىنە سۇيسىنبەسكە شاراڭىز جوق. شىن مىقتىعا تۇساۋ جوق ەكەنىن مۇحيت تا مويىنداتتى. بارلىق ماراپاتقا قول جەتكىزىپ، ەلىنە مارقايىپ ورالدى. مارعاسقا ۇلدىڭ جەڭىسىمەن بۇكىل شىعىس جۇرتى ماقتانادى. وبلىس اكىمى بەردىبەك ساپاربايەۆ جاڭا شەتەلدىك اۆتوكولىك پەن ءۇش بولمەلى پاتەردىڭ كىلتىن تابىس ەتتى. ۇلى ابايدىڭ «سۇيەر ۇلىڭ بولسا، سەن ءسۇي، سۇيىنەرگە جارار ول» دەگەنى وسى بولسا كەرەك.

24.kz