ب ە ك: تەمىرجولدارداعى جۇك اينالىمى قىتايدان كەيىن ەكىنشى ورىنعا شىقتى

ەۋرازيالىق دامۋ بانكىنىڭ ساراپشىلارى وسىنداي قورىتىندىعا كەلدى. ولار «ءبىرىڭعاي ەكونوميكالىق كەڭىستىكتىڭ تەمىرجول تاسىمالى نارىعىنىڭ دامۋ كەلەشەگى» اتتى تاقىرىپتا زەرتتەۋ جۇرگىزگەن بولاتىن. وندا ساراپشىلار جۇكتىك جانە جولاۋشىلىق تەمىرجول تاسىمالىنىڭ كەلەشەگىنە، اتالمىش سالاداعى رەفورمالار، باسەكەلەستىكتەر جانە ينتەگراتسيالىق ۇدەرىستەرگە تالداۋ جاساعان.
ب ە ك مەملەكەتتەرىنىڭ جالپى قولدانىستاعى بارلىق كولىك ءتۇرىنىڭ 43 پايىزدان استامى تەمىرجول كولىگىنىڭ ۇلەسىنە تيەسىلى ەكەن.
اسىرەسە، قازاقستاندا جۇك تاسىمالىنىڭ كولەمى سەرپىندى تۇردە ارتۋدا. بۇگىنگى تاڭدا بەك اياسىندا تەمىرجولداردىڭ جالپى ۇزىندىعى سوڭعى مالىمەتتەر بويىنشا 105 مىڭ شاقىرىمعا جەتكەن.
قازىرگى تاڭدا جۇك تاسىمالى نارىعىندا جىلجىمالى قۇرامنىڭ مەنشىك يەلەرىنىڭ سانى دا ارتا تۇسكەن. مىسالى، ءبىر عانا رەسەيدىڭ وزىندە 700 جۋىق وپەراتور-كومپانيالار جۇمىس ىستەسە، قازاقستاندا جۇك ۆاگوندارى پاركىنىڭ 94 پايىزى جەكە بيزنەسكە تيەسىلى. ال بەلارۋس ەلىندە ۆاگوندىق پاركتىڭ 75 پايىزى بەلارۋس تەمىرجول كومپانياسىنىڭ مەنشىگىندە.
جۇك ۆاگوندارىنىڭ سانى ءبىرىڭعاي ەكونوميكالىق كەڭىستىك اياسىندا 2008 - جىلى 600 مىڭ بولسا، 2013 - جىلعا قاراي ولاردىڭ سانى 1120 مىڭعا جەتكەن.
دەگەنمەن، رەسەيدەگى ەكونوميكالىق باسەڭدەۋدىڭ سالدارىنان 2014 - جىلى جۇك تاسىمالىنىڭ كولەمى ەداۋىر تومەندەيدى. ال 2015 - جىلدان باستاپ كەرىسىنشە، ارتا باستايدى. ءسويتىپ، 2020 - جىلعا قاراي تەمىرجول تاسىمالىنداعى جۇك اينالىمى ءبىرىڭعاي ەكونوميكالىق كەڭىستىكتە 2,7 تريلليون توننا-شاقىرىمدى قۇرايدى. ياعني ءوسىم 9,4 پايىزعا جەتەدى.
جالپى، ءبىرىڭعاي ەكونوميكالىق كەڭىستىك اياسىندا جولاۋشىلىق تەمىرجول تاسىمالى نارىعى ءار باعىتتا داميتىن بولادى. رەسەيدە 2014-2015 - جىلدارى جولاۋشى تاسىمالى قىسقاراتىن بولسا، قازاقستاندا كەرىسىنشە، ارتا تۇسپەك. ال 2020 - جىلعا قاراي جولاۋشىلار تاسىمالىنىڭ كولەمى 2013 -جىلعا قاراعاندا 32 پايىزعا ارتىپ، 1.6 ميلليارد ادامدى قۇرايدى دەپ كۇتىلۋدە.
اۆتور: جاپپاربەرگەن ايبوتا