تورەشىلەر جاعىنان بۇرا تارتۋشىلىق بولعان جوق - مارات جاقىتوۆ، «قازاقستان بارىسى» تۋرنيرىنىڭ باس تورەشىسى

  استانا. قازاقپارات -  كەشە   «قازاقستان بارىسى» تۋرنيرى اياقتالعاننان كەيىن  باس تورەشىنىڭ بىرەر اۋىز پىكىرىن بىلدىك.  
None
None

 -   بيىل تورەشىلەر جاعىنان ادىلدىكتى بايقادىق. ءوزىڭىز جاۋاپتى سىندا باس تورەشى بولدىڭىز. تورەلىك جاساۋ وڭايعا سوقپاعان بولار ؟..

- بىلتىرعى تورەشىلىك جۇرتشىلىق تاراپىنان ۇلكەن سىنعا ۇشىراعاندىقتان، بيىل جىل باسىنان ەلىمىزدىڭ تۇكپىر-تۇكپىرىنەن ەڭ ۇزدىك دەگەن تورەشىلەردى ىرىكتەپ، ارنايى سەمينار-كەڭەستەر وتكىزدىك. 50-60 ماماننىڭ اراسىنان 12 سىن ىرىكتەدىك تە، سولاردىڭ ىشىندە فينالدا  6  تورەشى تورەلىك ەتتى. جاۋاپتى مىندەت جۇكتەلگەن سوڭ ونى قولدان كەلگەنشە ابىرويمەن اتقارىپ، سەنىمدى اقتاۋ كەرەك. كورەرمەندەردىڭ ىقىلاسىنا قاراعاندا، قىزمەتىمىزدى ءتيىستى دەڭگەيدە ورىنداپ شىققان ءتارىزدىمىز. رەسەيلىك قوناقتار دا ريزاشىلىعىن ءبىلدىرىپ جاتتى. «قازاقتاردان ۇيرەنەر تۇسىمىز كوپ ەكەن» دەيدى. ەندى وسى مەجەدەن تۇسپەۋىمىز كەرەك.

- ءسىز وسىعان دەيىن  «قازاقستان بارىسى» تۋرنيرىندە باس تورەشىنىڭ كومەكشىسى قىزمەتىن اتقارىپ كەلدىڭىز. سول كەزدەردە، ناقتىراق ايتساق، 2012 جانە 2013 - جىلى تورەشىلەر ءوزىنىڭ جەرلەستەرىن، نەمەسە، بۇرىنعى جەڭىمپازدى تاعى دا العا قاراي سۇيرەيتىن. ادىلدىكتى بەلدەن باسىپ، جاس بالۋانداردى جولدان قاعاتىن. مويىندايسىز با ؟

- ارينە، ونداي جاعدايلار بولاتىن. مىنە، بيىل باس تورەلىكتى ماعان تاپسىردى. ونداي بۇراتارتۋشىلىق بولعان جوق. مەن بارىنشا ءادىل بولۋعا تىرىستىم. ءادىل شەشتىم دەپ ويلايمىن. حالىق   تارازى بولىپ جاتىر.   مىنە، بيىل 70 جاسقا كەلىپ جاتىرمىن. سوندا دا قازاقتىڭ ءتول كۇرەسىن دامىتسام دەگەن جالعىز نيەتپەن جانتالاسىپ جۇرگەن جايىمىز بار.  ماقساتىمىز - قازاق كۇرەسىن ازيادا جانە وليمپيادا ويىندارىنا قوسۋ.

- بۇگىنگى ەشكىم ويلاماعان جاس بالۋانداردىڭ جەڭىس تۇعىرىنان كوتەرىلۋى وسى  ادىلدىكتىڭ جەمىسى دەۋگە كەلىسەسىز بە ؟

- ارينە، كەلىسەم.  ناعىز مىقتى ادىلدىك بار جەردە جەڭىسكە جەتەدى.  سۋبەكتيۆتى پىكىر دەگەن بولادى. كەيبىر تورەشىلەر وزىنە ۇناعان بالۋاندى فينالعا قاراي سۇيرەلەيتىنى راس. ءبىزدى قۇرتاتىن وسى. بۇل قازاق كۇرەسىنىڭ ەتەگىنەن كەرى تارتپاسا، كوسەگەسىن كوگەرتپەيدى. ال ءبىر تورەشىلەر فينالدا الىپ دەنەلى، ءىرى بالۋاندار بەلدەسسە  تارتىستى،   قىزىقتى   ءوتۋى مۇمكىن دەگەن كوزقاراسپەن جاس ءارى دەنە ءبىتىمى جاعىنان شاعىن بالۋانداردىڭ جولىن بوگەپ جاتادى.  مىنە، بارلىق داۋ وسىدان باستالادى.

- ەندى الداعى ۋاقىتتا بۇل ءداستۇر جالعاسىن تابادى عوي...

- ارينە! بۇدان بىلاي دا كەز كەلگەن جارىستا ءادىل بولۋعا تىرىسامىز.  الداعى ۋاقىتتا   ونداي كەمشىلىكتەر ءبىرجولا جويىلادى دەگەن سەنىمدەمىن.






اۆتور: سۇلتان  وتار

سوڭعى جاڭالىقتار