گەرمانيا- الجير: شيۋررلە مەن ءوزىلدىڭ «التىن گولدارى» نەمىستەرگە جەڭىس اكەلدى

استانا. قازاقپارات - بۇگىن برازيليادا فۋتبولدان الەم چەمپيوناتىنىڭ 1/8 فينالىندا گەرمانيا مەن الجير قۇراما كوماندالارى كەزدەستى.
None
None

بۇل ماتچتا 2:1 ەسەبىمەن نەمىستەر جەڭىسكە جەتتى.

دەگەنمەن ايتا كەتۋ كەرەك، وسى جەڭىس گەرمانيالىقتارعا اسا اۋىر ءتۇستى. قارقىندى شابۋىلدارعا تولى بولعان ويىندا گول نەگىزگى ۋاقىت اياقتالعانشا سوعىلماي كەلدى.

كوماندالاردىڭ ءوزارا تارتىسى وۆەرتايمعا ويىستى. وندا اندرە شيۋررلە 92- مينۋتتا «التىن گول» سالىپ، «نەمىس ماشينەسىن» العا شىعارسا، 119- مينۋتتا سوعىلعان مەسۋت ءوزىلدىڭ تاعى ءبىر گولى گەرمانيانى شيرەك فينالعا شىعاردى. 120- مينۋتتا سوعىلعان دجابۋدىڭ جاۋاپ گولى الجيرلىكتەرگە ازدىق ەتتى. ەندى 4 - شىلدەدە 1/4 فينال ويىندارى اياسىندا گەرمانيالىقتار فرانسيا قۇراماسىمەن كۇش سىناسادى.



ال وسىنىڭ الدىندا الەم چەمپيوناتىنىڭ 1/8 فينالىندا فرانسيا مەن نيگەريا قۇرامالارى باق سىناسقان بولاتىن.

وتە تارتىستى وتكەن ويىندا ەسەپ 79- مينۋتتا اشىلدى جانە العاشقى دوپتى فرانسۋز فۋتبولشىسى پول پوگبا سالدى. ال 90- مينۋتتا نيگەريالىق قۇرامانىڭ قورعاۋشىسى يوبو اۆتوگول اۆتورى اتاندى. ايتا كەتەيىك، اتالمىش دوپ مۋنديالداعى 10- اۆتوگول جانە بۇل بۇرىن- سوڭدى بولماعان رەكورد رەتىندە تىركەلدى.

وسىلايشا فرانسۋزدار ¼ فينالعا ءوتتى.

سوڭعى جاڭالىقتار