الماتىدا «حيزبۋت-تاحرير» ۇيىمىنىڭ يدەولوگياسىن ناسيحاتتادى دەپ ايىپتالعاندارعا قاتىستى سوت ۇكىمى شىقتى

سۋديا اشكەيەۆا رايحان سوتتالۋشىلاردى ق ر ق ك 164-بابىنىڭ 2-بولىمىمەن، 170-بابىنىڭ 1-ءبولىمى، 337-1-تارماعىنىڭ 1-ءبولىمى، 233-1-بابىنىڭ 2-ءبولىمى بويىنشا ايىپتى دەپ تاۋىپ، مۇساقوجانوۆ مۇحيتتى 7 جىل 6 ايعا، وسپانوۆ ەربولاتتى 6 جىلعا، سارسەنبايەۆ اسحاتتى 6 جىلعا، دۇيسەنباي وڭلاسىندى 6 جىلعا، بوتبايەۆ قۋانىشتى 6 جىلعا باس بوستاندىعىنان ايىرۋ تۋرالى ۇكىم شىعاردى.
«ۇيىمنىڭ الماتىداعى باستى سەركەسى» مۇساقوجانوۆ مۇحيت قوسىمشا ق ر ق ك 164-بابىنىڭ 1-ءبولىمى بويىنشا دا ايىپتى دەپ تانىلدى.
سوتتالعاندار جازاسىن جالپى كولونياداعى رەجيمدە وتكىزەتىن بولادى. ايىپتاۋشى تاراپ سوتتالۋشىلاردىڭ ايىبى تولىعىمەن دالەلدەنىپ، ءادىل جازاسىن الدى دەپ سانايدى.
«2013 - جىلعى شىلدە ايىندا «حيزبۋت-تاحرير ءال يسلامي» ءدىني ەكسترەميستىك پارتياسىنىڭ بەلدى مۇشەسى ءارى الماتى وڭىرىندەگى وكىلدىگىنىڭ باسشىسى «مينتاحا ماسۋل» ب. س. الكەيەۆتىڭ قىلمىسى اشكەرەلەنىپ، ول سوتتالعانننان كەيىن اتالمىش ەكسترەميستىك پارتيانىڭ قىزمەتىن ۇيىمداستىرۋ ءۇشىن پارتيا مۇشەلەرىنىڭ جاسىرىن جيىنىندا مۇحيت مۇساقوجانوۆ «مينتاحا ماسۋل» لاۋازىمىنا تاعايىندالعان.
استانا قالالىق سوتىنىڭ 2005 - جىلدىڭ ناۋرىزىندا زاڭدى كۇشىنە ەنگەن شەشىمىمەن ەكسترەميزمدى جۇزەگە اسىرۋعا بايلانىستى قىزمەتىنە قاتاڭ تىيىم سالىنعان «حيزبۋت-تاحرير» ءدىني-ەكسترەميستىك پارتياسىنىڭ قىزمەتىن ۇيىمداستىرۋ ماقساتىندا مۇساقوجانوۆ اتالمىش پارتيا مۇشەلەرىنىڭ باسىن قوسۋ جانە مۇشەلىككە جاڭا ادامدار تارتۋ ارقىلى قۇپيا جيىندار وتكىزىپ، ءدىني ەكسترەميستىك، تەرروريستىك، جالپى ۇيىمنىڭ دەسترۋكتيۆتى يدەولوگياسىن ناسيحاتتاۋدى تىكەلەي ماقسات ەتىپ قويعان.
وسى ماقساتتا وتكىزىلگەن جيىندار بارىسى مەن ناتيجەلەرى ق ر ۇ ق ك الماتى بويىنشا دەپارتامەنت قىزمەتكەرلەرى تاراپىنان پروكۋرور رۇقساتى نەگىزىندە جۇرگىزىلگەن ارنايى جەدەل ىزدەستىرۋ شارالارى كەزىندە اۋديو-بەينە تاسپالارعا ارنايى جازىلىپ الىنعان»، - دەدى المالى اۋداندىق پروكۋرورىنىڭ كومەكشىسى راحيموۆ جاندوس.
سوت ۇكىمى زاڭدى كۇشىنە ەنگەن جوق. قورعاۋشى تولەگەن بەرلىقوجايەۆ سوت ۇكىمىنە نارازىلىعىن ءبىلدىرىپ، اپەللياتسيالىق شاعىم تۇسىرەتىنىن ايتتى.
«مەنىڭ قورعاۋىمداعى سوتتالۋشىلار وزگەلەرمەن بىرگە اۋىزاشارعا بارىپ، ناماز تۋرالى اڭگىمە ايتقانى ءۇشىن كىنالى بولىپ وتىر. ايىپتاۋشى تاراپ ۇگىت-ناسيحات جۇرگىزىلگەنىن راستايتىن ءبىر دە ءبىر كۋا كەلتىرمەدى. ولاردىڭ ايىبى دالەلدەنگەن جوق. سونداي-اق قازاقستان زاڭناماسى ءوز ەركىمەن اداسقانىن ايتىپ، رايىنان قايتقان ازاماتتاردىڭ جازاسىن جەڭىلدەتۋگە دە رۇقسات بەرەدى»، - دەدى تولەگەن بەرلىقوجايەۆ.
ايتا كەتەرلىگى، سوت وتىرىسى بارىسىندا سوتتالۋشى مۇحيت مۇساقوجانوۆ سوت ۇكىمىنە اشىق قارسىلىعىن ءبىلدىرىپ، وقشاۋلاۋ ورنىن ءوزىنىڭ باسىمەن ۇرعىلاي باستادى. بۇلىكتىڭ كەسىرىنەن سوت ۇكىمى 1-ساعاتقا كەشىكتىرىلىپ وقىلدى.
اۆتور: گۇلميرا عوسمانالي