رۋحاني جاڭارۋ ايى - رامازان قۇتتى بولسىن

استانا. قازاقپارات - بۇگىن قاسيەتتى رامازان - مۇسىلمانداردىڭ بەس پارىزىنىڭ ءبىرى ورازا ايى باستالدى.
None
None

  مىڭ ايدان دا قايىرلى بولعان ساۋاپ ايى - رامازاندى اسىعا كۇتكەن بارشا قازاقستاندىق مۇسىلمان وسى تاڭدا نيەت ەتىپ، اۋىز بەكىتىپ، ۇلى قۇلشىلىق قامىنا كىرىسەدى.

بۇل ايدا جاسالعان ءناپىل ناماز، زىكىر، ساداقا جانە بۇكىل ءناپىل عيباداتتارعا بەرىلەتىن ساۋاپ باسقا ايلاردا جاسالاتىن پارىزداردىڭ ساۋابىنا تەڭ. بۇل ايدا جاسالعان ءبىر پارىز باسقا ايلاردا جاسالاتىن جەتپىس پارىزداي بولادى. بۇل ايدا اۋىز بەكىتكەن ءبىر ادامعا يفتار بەرىپ، اۋىز اشتىرعان ادامنىڭ كۇنالارى كەشىرىلەدى، جاھاننام وتىنان قۇتىلادى، توزاقتان ازات بولادى. سول ورازا تۇتقان ادامنىڭ ساۋابىنداي ساۋاپ اۋىزاشتىرۋشىعا دا جازىلادى جانە ورازا تۇتقان ادامنىڭ ساۋابى مۇلدەم كەمىمەيدى.

***

«قازاقپارات» ح ا ا وسىناۋ اللانىڭ راحىمى تۇسكەن ورازا ايىنىڭ باستالۋىنا وراي، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلىنىڭ قازاقستان حالقىنا قۇتتىقتاۋىن وقىرماندار نازارىنا ۇسىنادى.

مەيىرىمدى، راقىمدى اللانىڭ اتىمەن باستايمىن!

بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرشىلىك ايتامىز.

قۇرمەتتى مۇسىلمان باۋىرلار!

الەم مۇسىلماندارى مۇباراك رامازاندا اللانىڭ راقىمىنا بولەنۋدى ءۇمىت ەتىپ، ساۋابى مول ىزگى امالداردى اتقارۋعا نيەتتى. سىزدەردى ءبىر اي بويى جالعاساتىن ۇلىق رامازان ايىنىڭ كەلۋىمەن قۇتتىقتايمىن! اللانىڭ راقىمى مەن كەشىرىمىنە بولەيتىن، ءار يگى امال ەسەلەنىپ جازىلاتىن رامازاندى اسىعا كۇتكەن بارشامىزعا بۇل قاسيەتتى اي قۇتتى بولسىن!

قۇران كارىمدە ايتىلعان رامازان ايىنىڭ ەرەكشەلىگى سول، بۇل مەزگىلدە جاسالعان كەز كەلگەن قايىرلى امالدىڭ ساۋابىن ساناۋ مۇمكىن ەمەس.

 سوندىقتان ايلاردىڭ سۇلتانى بولعان رامازان - اللا تاعالانىڭ مۇسىلماندارعا بەرگەن سىيى ءارى نىعمەتى. قاسيەتى مەن شاراپاتى مول ايدا كۇنالارىمىزدان ارىلىپ، ساۋاپ جيناۋعا، ىشكى دۇنيەمىزدى تازارتىپ، جاراتۋشىعا جاقىنداۋعا بەرىلگەن مۇمكىندىكتەر كوپ. مۇباراك رامازاننىڭ قۇندىلىقتارى مەن قادىر، قاسيەتىن جاقسى تۇسىنگەن ىزگى ادامدار ورازاعا التى اي قالعان ساتتەن باستاپ:

 «ءراببىمىز، ءبىزدى رامازان ايىنا امان-ەسەن جەتكىزە گور!» - دەپ دۇعا جاساپ، جاراتۋشىمىزعا جالبارىنعان. ويتكەنى، ادامنىڭ وسى ايدا ۇستاعان ورازاسى، قوسىمشا قۇلشىلىقتارى، وزگەلەرگە جاساعان قايىرىمدىلىعى، بارلىق ساۋاپتى امالدارى اللانىڭ مەيىرىمىنە بولەپ، رازىلىعىن الۋعا جاقىنداتا تۇسپەك.

ورازا - اللا مەن ادامنىڭ اراسىنداعى ريياسىز قۇلشىلىق، تەك ءراببىمىزدىڭ رازىلىعىن كوزدەيتىن ۇلىق عيبادات. قۇدسي حاديستە اللا تاعالا: «اۋزى بەرىك ادام ءىشىپ-جەۋىن مەن ءۇشىن دوعاردى. ورازا - مەنى مەن قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن عانا بەرەمىن. اۋزى بەرىك قۇلىمنىڭ اشتىق پەن شولدەگەندە شىعاتىن اۋزىنىڭ ءيسى مەن ءۇشىن ميسكتەن دە ارتىق»، - دەيدى.

رامازان - رۋحاني جاڭارۋ ايى. جەردى مەكەن ەتكەن اڭ مەن قۇستىڭ، بارلىق تىرشىلىك يەسىنىڭ جىل مەزگىلدەرىندە جاڭارۋ، تۇلەۋ، وزگەرۋ ۇدەرىسىنەن وتەتىنى بەلگىلى. ال اللانىڭ ادام بالاسىنا بەرگەن شەكسىز نىعمەتى، تەڭدەسسىز سىيى سانالعان ورازا - كۇناعا بەتپە-بەت كەلۋدەن ساقتايتىن، جان-دۇنيەمىزدى، مىنەز-قۇلقىمىزدى جاقسىلىققا تاربيەلەيتىن، رۋحاني تۇلەپ شىعاتىن قۇلشىلىق. اۋىز بەكىتۋدىڭ ادام ءومىرىن ىزگىلىككە باستايتىنىن بىلگەن پەندەنىڭ ودان، استە باس تارتۋى مۇمكىن بە؟! ولاي بولسا، ورازا ۇستاپ، ۇلى عيباداتتىڭ ساۋابىنان قۇر قالمايىق، باۋىرلار!

يمان جولى سابىرلىق پەن تاقۋالىقتى تالاپ ەتەدى. ورازا ناعىز، شىنايى تاقۋالىق پەن سابىرلىققا جەتەلەيدى. قۇراندا اللا تاعالا: «ەي، مۇمىندەر! سەندەرگە بۇرىنعىلارعا پارىز ەتىلگەندەي ورازا پارىز ەتىلدى. ارينە، ساقتانارسىڭدار» («باقارا» سۇرەسى، 183-ايات)، - دەپ بۇيىرعان.

بيىل شىلىڭگىر شىلدەگە تۇسپا-تۇس كەلگەن ورازادا اۋىز بەكىتۋگە كۇننىڭ ىستىعى نەمەسە باسقا دا سەبەپتەر كەدەرگى بولا المايدى دەپ سەنەمىز. سەبەبى، يماننىڭ بال ءدامىن تاتقان جان اللانىڭ تەڭدەسسىز سىيىنان شەت قالعىسى كەلمەيتىنى حاق. پايعامبارىمىز مۇحاممەد (س.ع.س.) ءبىر حاديسىندە: «راسىندا، ءار ادامعا ءوزىنىڭ نيەت ەتكەن نارسەسى بەرىلەدى»، - دەگەن. بۇل - ادام بالاسى ءوزىنىڭ نيەتىنە وراي، ماقساتىنا جەتەدى دەگەن ءسوز. كىمدە-كىم ساۋابىن اللادان ءۇمىت ەتىپ، ورازا ۇستاسا، كۇنالارى كەشىرىلىپ، ونىڭ ريزالىعىنا بولەنەدى. ەكى دۇنيەدە دە اللانىڭ ريزالىعىنا كەنەلۋدەن ارتىق باقىت جوق.      

قادىرلى اعايىن!

قاسيەتتى رامازان ايى قۇتتى بولسىن! ۇستاعان ورازالارىڭىز بەن دۇعا-تىلەكتەرىڭىز قابىل بولعاي! رامازان ايىندا جاساعان يگى ىستەرىڭىز ساۋاپتان جازىلىپ، اللا تاعالا ەلىمىزگە، جەرىمىزگە بەرەكەسىن، مول ريزىعىن جاۋدىرعاي! مۇراتىمىز اسىل، دۇعامىز قابىل بولعاي!

اۋمين!

سوڭعى جاڭالىقتار