جۇلدەگەر بولساڭ ۇكىمەت باسشىسىمەن تاڭعى اس ىشەسىڭ

ءوز كەزەگىندە «الاش ايناسى» باسىلىمى اتالعان «ساياسي ءمازىردىڭ» «ءدامى» قانداي بولاتىندىعى جونىندە ساراپشىلار پىكىرىن ءبىلىپ كورۋگە تىرىستى...
اتالعان بايگە جوباسىن ۇيىمداستىرۋشى «قازاقستان - 2050» جالپى حالىقتىق قوزعالىسىنىڭ بەلسەندىلەرى بوپ تابىلادى. بۇل ۇيىم ەلباسىمىزدىڭ باستاماسىمەن قۇرىلعانىن باسا ايتا كەتەلىك. ونىڭ جۇمىسقا كىرىسكەنىنە دە كوپ ۋاقىت بولا قويماعان، شامامەن جارتى جىلداي عانا، ءبىراق سوعان قاراماستان ولار قوعامعا وي سالاتىن ءبىرقاتار اكسيا وتكىزىپ ۇلگەرگەن. بۇل جولى «قازاقستان - 2050» قوزعالىسى ەل وڭىرلەرىنىڭ دامۋى بويىنشا ەڭ وزىق باعدارلامانىڭ اۆتورىن ۇكىمەت باسشىسىمەن جولىقتىرۋ ارقىلى ماراپاتتاۋ سىندى جۇلدەنى ويلاستىرىپ قويىپتى.
نۇرلان سەيدىن، ساياساتتانۋشى:
- مەنىڭشە، بۇل «ساياسي ءمازىر» جاعىمدىنى تيىمدىلىكپەن بايلانىستىرۋعا مۇمكىندىك بەرەتىن سەكىلدى. اۋدان جانە وبلىس ورتالىقتارىن دامىتۋ ماسەلەسى - بۇگىندەرى وزەكتى. ال كەز كەلگەن ءوڭىردىڭ ەرەكشەلىگى مەن كەمشىلىگىن ورتالىقتا كابينەتتە وتىرعان ماماندار، عالىمدار، شەندىلەر ونشا بىلە بەرمەيدى. سول ءوڭىردىڭ تۋماسى وسىنداي جوبانى ۇسىنىپ جاتسا، يگى بولار ەدى.
سوندىقتان ونىڭ جالپى رەسپۋبليكا بويىنشا جاريالانۋىن قۇپتايمىن. كوبىنە ايماقتاردان ۇكىمەت باسىنا جولدانعان حاتتار ورتا جولدا جوعالىپ كەتەدى نەمەسە جاۋاپسىز قالىپ جاتادى. ال بۇل رەتتە جوبا اۆتورى ۇكىمەت باسشىسىمەن تىكەلەي سويلەسۋگە مۇمكىندىك الىپ، ءوز ويلارىن اشىق ءارى ىركىلىسسىز ورتاعا سالا الادى. «اقىلداسىپ پىشكەن تون كەلتە بولماس» دەمەكشى، وسى جاعىنان العاندا، مۇنداي جوبانىڭ ومىرشەڭدىك كورسەتكىشى جوعارى بولۋى ءتيىس.
ەراسىل ءابىلقاسىموۆ، قوعام قايراتكەرى:
- قازاقتىڭ كەڭ بايتاق جەرى پايدالانىلىپ جاتقانى كەرەك. ويتپەسە وعان كوزى تۇسكەن بوتەندەر «مىنا بوس جەردى بىزگە جالعا بەر» دەپ قولقالاي بەرەدى. بۇل قاۋىپتى نارسە. سوندىقتان، ءاۋ، باستان، اۋىل- ايماققا ايىرىقشا كوڭىل ءبولىنۋ كەرەك ەدى. الايدا بۇلاي بولمادى. نەگىزىنەن، الماتى مەن استاناعا جانە وبلىس ورتالىقتارىنا جاعداي جاسالدى. ال اۋىل جۇتاڭداي بەردى. مەديسينالىق ورتالىقتان دا، اۋىلشارۋاشىلىعى نىساندارىنان دا جۇرداي بولدى. جاعدايى بولماعان سوڭ اۋىل حالقى قالاعا جوڭكىلىپ كوشە باستادى.
«الەۋمەتتىك جاعدايى ناشار ءوڭىر» دەپ ونداعىلاردى سىباپ تا جاتادى. بۇل دا دۇرىس ەمەس. وندا ينفراقۇرىلىمداردى اپارۋ كەرەك. اۋىل مەن قالا تابىسى اراسىن جاقىنداتۋ ءۇشىن بارلىق مۇمكىندىكتەر قاراستىرىلۋى ءتيىس. سوندا ميگراسيا توقتايدى. اۋىلدا حالىق تۇراقتايدى. سوندىقتان مۇنداي جوباعا بايگە جاريالانعانىن ءوز باسىم قۇپتايمىن. ساياساتكەرمەن شاي ىشكەن- ىشپەگەنى مەن ءۇشىن اسا ماڭىزدى ەمەس. بۇل اتالعان جوبانىڭ جارنامالىق بولىگى عوي.
الاشتىڭ ءتۇيىنى
وليگارحپەن نەمەسە تانىمال اداممەن تۇستەنۋ سىندى جوبا دامىعان ەلدەردە كەڭىنەن قولدانىسقا يە. ءبىراق بۇل ارادا بەدەلدى ادامدارمەن كەزدەسۋ ءۇشىن اقى تولەۋ مىندەتتەلەدى. ال بىزدە ونىڭ اقشامەن ەمەس، جوبامەن، وندا دا ستراتەگيالىق ماڭىزدى باعىتپەن باعالانعانى قۋانتادى. تاعى ءبىر جاعىنان، ساياساتكەردى حالقىنا، ەلدەگى جاعدايعا ەتەنە جاقىن ەتە تۇسۋدە بۇل وڭدى يدەيا سىندى. ال وقىرمان ءسىز بۇعان نە دەيسىز؟
اۆتور: كامشات ساتيەۆا
«الاش ايناسى»