اقوردادا بىلىعى ازايماعان ءبىلىم سالاسىنداعى جەمقورلىق ماسەلەسى تالقىلاندى
جاتاقحانادان ورىن الۋ ءۇشىن دە ۇزدىك ستۋدەنت بولۋدىڭ قاجەتى جوق.
اقىسىن تولەسەڭ بولعانى. ق ر ءبىلىم جانە عىلىم ءمينيسترى اسلان ءسارىنجىپوۆتىڭ ءوزى مۇنى جاسىرمايدى.
وتكەن جىلى سالادا جەڭ ۇشىنان جالعاسقان جەمقورلىق دەرەكتەرىنە قاتىستى 221 قىلمىس تىركەلدى. بيىلدىڭ العاشقى توقسانىندا بۇل كورسەتكىش 125 دەرەككە جەتتى.
بۇل تۋرالى بۇگىن اقوردادا وتكەن ق ر پرەزيدەنتى جانىنداعى سىبايلاس جەمقورلىققا قارسى كۇرەس جونىندەگى كوميسسيانىڭ كەڭەيتىلگەن وتىرىسىندا ايتىلدى.
بىلىعى ازايماعان ءبىلىم سالاسى تاعى دا باستى نازاردا. جۇيەدەگى جەمقورلىق بالاباقشادان باستاپ مينيسترلىككە دەيىن ەتەك جايعان. ءبىر عانا «بالاپان» باعدارلاماسىن ىسكە اسىرۋ بارىسىندا 30 قىلمىستىق ءىس قوزعالىپ، 9 تۇلعا ءىستى بولعان.
ال مينيستر قاراماعىنداعىلاردىڭ «بارماق باستى، كوز قىستىلىققا» بارۋى جالاقىنىڭ تومەندىگىنەن دەپ وتىر.
اسلان ءسارىنجىپوۆ، ق ر ءبىلىم جانە عىلىم ءمينيسترى:
- بۇگىندە مۇعالىمدەردىڭ جالاقىسى - 75500 تەڭگە. بۇل رەسپۋبليكا بويىنشا بەكىتىلگەن تومەن جالاقى كولەمىنەن 30 پايىزعا از. مەكتەپتەردى قارجىلاندىرۋدىڭ ازدىعى دا جەمقورلىق دەرەكتەرىنىڭ ارتۋىنا سەپ بولۋدا. ماماندار تاپشىلىعىن دا قوسىڭىز. وسى جايتتاردىڭ بارلىعى سالاداعى سىبايلاستىقتىڭ ءسوزىن جويۋعا كەدەرگى بولىپ وتىر. جەگى قۇرتقا اينالعان وسى ءبىر قاتەرلى دەرتپەن كۇرەسۋدە باسشىلاردى جازاعا تارتۋ - تىندىرىلار شارۋانىڭ ءبىر تۇسى عانا. ويتكەنى جەمقورلىق ەكى جولاقتى جول ىسپەتتەس. بەرەتىندەردىڭ سانى ازايسا، الاقان جايعانداردىڭ دا كورسەتكىشى كەمىر ەدى دەيدى مۇندا جينالعاندار.
ادىلبەك جاقسىبەكوۆ، ق ر مەملەكەتتىك حاتشىسى:
- شەنەۋنىكتەرگە پارا بەرەتىن كىم؟ كەزەك كۇتپەي، شارۋاسىن تەز ارادا تىندىرعىسى كەلەتىندەر. بۇل ءبىر تاراپتىڭ قاتىسۋىمەن عانا بولاتىن زاڭبۇزۋشىلىق ەمەس. سوندىقتان قوعامدى تاربيەلەۋ كەرەك. ءوڭىر باسشىلارى ازاماتتىق قوعام ينستيتۋتتارىمەن تىعىز قارىم-قاتىناستى ورناتۋعا زەر سالۋى قاجەت.
ادەتتە جابىق تۇردە وتەتىن كوميسسيانىڭ بۇل جولعى وتىرىسىنا ازاماتتىق اليانس مۇشەلەرى، قوعام بەلسەندىلەرى قاتىستى. ال وڭىردەگى اكىم-باسشىلار تىكەلەي ترانسلياتسيا ارقىلى قوسىلدى. كوميسسيا مۇشەلەرى تىركەلگەن بارلىق دەرەكتەر بويىنشا زاڭبۇزۋشىلىققا جول بەرگەن جاۋاپتى تۇلعالار جازاسىز قالماسىن دەپ ەسكەرتتى.
نۇرلان ەرىمبەتوۆ، ساياساتتانۋشى:
- شىنىن ايتۋ كەرەك، بۇگىن بىرنەشە ادام سوگىس الدى. ماعان ۇناعانى - ءار ازاماتتىڭ، تۇرعىننىڭ جاۋاپكەرشىلىگى جونىندە جاقسى اڭگىمە باستالدى. بۇعان تەك ۇكىمەت ەمەس، مەملەكەت ەمەس، ءارقايسىمىزدىڭ جاۋاپكەرشىلىگىمىز بولۋى كەرەك. مەملەكەت باسشىسىنىڭ تاپسىرماسىمەن ساياسي جانە مەملەكەتتىك قىزمەتكەرلەرگە قاتىستى تارتىپتىك ىستەر دە ەندى جاڭا ەرەجەلەر بويىنشا قارالاتىن بولادى. بۇل جاڭاشىلدىق ازىرگە پىسىقتالۋدا. ال جاڭا نورماتيۆتىك بازا بەكىتىلگەننەن كەيىن كوميسسيا مۇشەلەرى جەرگىلىكتى جەرلەردەگى جەتەكشىلەردىڭ ءتارتىبىن قاداعالاۋدا قۇزىرەتتەرىن ارتتىرماق.
اۆتورلارى: مانشۇك ماقسۇت قىزى، ومىربەك ءىزىموۆ
24.kz
