لاۋازىمدى تۇلعالار سوگىس الدى

"پرەزيدەنت اكىمشىلىگى جەتەكشى لاۋازىمدى تۇلعالاردىڭ مەملەكەت باسشىسى بەرگەن تاپسىرمالاردى ىسكە اسىرۋداعى دەربەس جاۋاپكەرشىلىگىن كۇشەيتۋ جونىندەگى ساياساتتى جالعاستىرادى.
كەزەكتى ەسەپتىڭ قورىتىندىسى بويىنشا پرەزيدەنتتىڭ 2010 - جىلدىڭ 27 - ساۋىرىندەگى № 976 جارلىعىنا سايكەس، مەملەكەت باسشىسى تاپسىرمالارىن ساپاسىز ورىنداعانى ءۇشىن بەس ساياسي قىزمەتكەر تارتىپتىك جاۋاپكەرشىلىككە تارتىلدى.
پرەمەر-ءمينيستردىڭ وكىمىمەن پرەزيدەنتتىڭ "2020 - جىلعا دەيىنگى ەلدىڭ اگروونەركاسىپ كەشەنىن دامىتۋ تۋرالى باعدارلامانى دايىنداۋ تۋرالى" تاپسىرماسىن ساپاسىز ورىنداعانى ءۇشىن اۋىل شارۋاشىلىعى ۆيتسە-ءمينيسترى ساپارحان وماروۆقا ەسكەرتۋ جاريالاندى"، - دەپ جازادى باسىلىم.
سونداي-اق، استانا قالاسى، شىعىس قازاقستان، قاراعاندى، ماڭعىستاۋ وبلىستارى اكىمدەرىنىڭ وكىمىمەن ءبىرقاتار اكىم ورىنباسارى جازالاندى. مەملەكەت باسشىسىنىڭ "كوممۋنالدىق تولەمدەرگە ارنالعان ءبىرىڭعاي تولەم قۇجاتىن ەنگىزۋ جانە "جەرۇيىق" پاركىن قۇرۋ تۋرالى" تاپسىرماسىن دۇرىس ورىنداماعانى ءۇشىن استانا قالاسى اكىمىنىڭ ورىنباسارى ۆاسيلي كرىلوۆقا سوگىس جاريالاندى.
وسكەمەن قالاسىندا قان ورتالىعى قۇرىلىسىن اياقتاۋ مەرزىمىن بىرنەشە مارتە شەگەرگەنى ءۇشىن، سونداي-اق مەملەكەت باسشىسىنىڭ "350 دارىگەرلىك امبۋلاتوريا مەن ەمحانا سالۋ تۋرالى" تاپسىرماسى اياسىندا دەنساۋلىق ساقتاۋ نىساندارى قۇجاتىن دەر كەزىندە جاساماعانى ءۇشىن شىعىس قازاقستان وبلىسى اكىمىنىڭ ورىنباسارى ەرلان تەكەشوۆقا قاتاڭ سوگىس جاريالاندى، قاراعاندى وبلىسى اكىمىنىڭ ورىنباسارى عابيت مۇحامبەتوۆكە سوگىس جاريالاندى، ماڭعىستاۋ وبلىسى اكىمىنىڭ ءبىرىنشى ورىنباسارى سۇيىندىك الداشوۆقا ەسكەرتۋ جاسالدى.
پرەمەر-ءمينيسترى كەڭسەسى جەتەكشىلىگىنىڭ، مينيسترلەر ورىنباسارلارىنىڭ، جاۋاپتى حاتشىلاردىڭ جانە ۇلتتىق كومپانيا جەتەكشىلەرىنىڭ مەملەكەت باسشىسىنىڭ اكتىلەرى مەن تاپسىرمالارىن ساپالى ءارى ءوز ۋاقىتىندا ورىنداۋ جونىندەگى جۇمىستارى تۋرالى ەسەپتەرى اپتا سايىن تىڭدالادى. پرەزيدەنت اكىمشىلىگى مەن ۇكىمەت ەلباسى تاپسىرمالارىنىڭ ورىندالۋىن قاداعالاۋ جونىندە بىرلەسكەن جۇمىستى جالعاستىراتىن بولادى.