رەسەي عالىمى قازاق ءتىلىن وقىتۋدىڭ ادىستەمەسىن جاسايدى
بۇل تۋرالى ول ەلوردادا باسپا ءسوز ءماسليحاتىندا ايتتى، - دەپ حابارلايدى Tengrinews.kz ءتىلشىسى.
دراگۋنكين اعىلشىن ءتىلىن وقىتۋدىڭ جاڭاشىل ادىستەمەسىنىڭ اۆتورى رەتىندە بەلگىلى. ول كەدەن وداعى ەلدەرىندە مەملەكەتتىڭ ءبىرىنشى باسشىلارىنا اعىلشىن ءتىلىن ۇيرەتكەن. بىرنەشە جىل بۇرىن ول قازاقستانعا كەلىپ، قازاق تىلىنە قىزىعۋشىلىق تانىتتى، سول كەزدە قازاق ءتىلىن وقىتۋ جونىندەگى وقۋلىقتار ساپاسىنىڭ كوڭىل كونشىتپەيتىنىنە كوز جەتكىزگەن.
«ماعان قازاق ءتىلى ۇناپ قالدى، مەن ونى وقىتۋعا دەگەن قاجەتتىلىك بارىن ءتۇسىندىم. مەن ورىستارعا قازاق ءتىلىن ۇيرەتۋگە ارنالعان نارىقتاعى وقۋلىقتارمەن تانىستىم. فيلولوگ ءارى وقىتۋشى رەتىندە تۋراسىن ايتايىن، وقۋلىقتارعا كوڭىلىم تولمادى. قازاق ءتىلىنىڭ كوپتەگەن ەلەمەنتىنىڭ وزىنەن-ءوزى تۇسىنىكتى جايت رەتىندە ۇيرەتىلەتىنىن بايقادىم. ورىس ءتىلدى وقۋشى ءۇشىن بۇل - ناعىز كۇردەلى ماسەلە، مەن ونى شەشۋدىڭ جولدارىن تاپتىم»، - دەيدى دراگۋنكين.
ايتا كەتەيىك، عالىمنىڭ ءوزى ازىرشە قازاق ءتىلىن بىلمەيدى.
«مەن ازىرشە قازاقشا سويلەمەيمىن، ءبىراق مەن وقۋلىقتى قازاق ءتىلىن بىلەتىن ادامعا جازعىزامىن. قايتالاپ ايتامىن، كاسىبي وقىتۋشى اناۋ ايتقانداي جاقسى بولماۋى مۇمكىن. سوندىقتان ءتىل ۇيرەنۋگە نيەتى بار ادامدارعا قازاق ءتىلىن جىلدام مەڭگەرۋگە كومەكتەسەتىن وقۋلىق جازعىم كەلەدى»، - دەيدى فيلولوگ. ول ءوزىنىڭ بىرەگەي ادىستەمەسى جايلى ەگجەي- تەگجەيلى ايتۋدان باس تارتتى.
«ەگەر مەن ماسەلەنىڭ نەدە ەكەنىن ايتاتىن بولسام، وندا ول نوۋ-حاۋ بولماي قالادى. قازاق تىلىندە ورىستار ءۇشىن ۇلكەن ماسەلە بولىپ كورىنەتىن ۇندەستىك زاڭى قاعيداسى بار ەكەنىن عانا يشارالاعىم كەلەدى، مەن بۇل ماسەلەنى ءداستۇرلى ەمەس جولمەن شەشتىم»، - دەيدى دراگۋنكين. كۇزدە استانادا دراگۋنكين ورتالىعى اشىلماق، فيلولوگ سول كەزدە وقۋلىق جازۋعا كىرىسەدى.
