قازاقستان اۋماعى ارقىلى رەسەي مۇنايى قىتايعا تاسىمالدانادى - پارلامەنت

اتالعان كەلىسىم 2013 - جىلدىڭ 24 - جەلتوقسانىندا ماسكەۋ قالاسىندا جاسالعان بولاتىن ءارى قۇجاتتىڭ ماقساتى قازاقستان اۋماعى ارقىلى رەسەيلىك مۇنايدى قىتايعا تاسىمالداۋ بولىپ تابىلادى.
بۇل رەتتە تاراپتار رەسەيلىك مۇنايدى جىلىنا 7 ميلليون توننا كولەمىندە ۇزاق مەرزىمدى تاسىمالداۋى ءۇشىن جاعداي جاسايدى. ال ونىڭ كولەمى كەلەشەكتە ون ميلليون تونناعا دەيىن جەتۋى مۇمكىن.
«بۇل رەتتە ومبى (رەسەي) - ەرتىس (قازاقستان) - اتاسۋ (قازاقستان) - الاشانكاۋ (ق ح ر) تاسىمالداۋ باعىتى بويىنشا ماگيسترالدىق قۇبىرلار جۇيەسىنە قول جەتكىزۋ قۇقىعىن قامتاماسىز ەتەدى. مۇناي تاسىمالداۋعا ارنالعان تاريف بەس جىلعا بەكىتىلەدى. مۇنايدى تاسىمالداۋ باعىتى بويىنشا تاسىمالدانعان مۇنايدىڭ ءاربىر تونناسى ءۇشىن ا ق ش دوللارىمەن ەسەپ ايىرىسۋ قاراستىرىلادى»، - دەيدى مۇناي جانە گاز ءمينيسترى ۇزاقباي قارابالين.
ونىڭ ايتۋىنشا، قازاقستان تاراپى تاسىمالداۋ باعىتى بويىنشا مۇنايدى تاسىمالداۋ جونىندەگى قىزمەتتەرگە نولدىك مولشەرلەمەمەن قوسىلعان قۇن سالىعىن سالۋدى كوزدەيدى. بۇل رەتتە قازاقستان تاراپى ەلىمىزدىڭ سالىق زاڭناماسىنا سايكەس، قوسىلعان قۇن سالىعىن قايتارۋ ءۇشىن مۇنايدى تاسىمالداۋ جونىندەگى قىزمەتتەردى حالىقارالىق تاسىمال رەتىندە قاراستىرادى.