ەسەپ قۋعان سولتۇستىكتىڭ دارىگەرلەرى ەر ازاماتتاردان ايەلگە ءتان دەرت تاپتى
سولتۇستىك قازاقستاندىق دارىگەرلەر وڭىردە تۇراتىن ەر-ازاماتتاردى تەكسەرىپ، تورتەۋىنەن ايەلدەردە عانا كەزدەسەتىن اۋرۋ بار دەپ تاپقان.
اق حالاتتىلاردىڭ ەسەبىنە سەنسەك، ناۋقاستاردىڭ ۇشەۋى جاتىر موينى، تاعى بىرەۋى ومىراۋ بەزى ىسىگىنە شالدىعىپتى.
«سىرقات» دەپ تانىلعان ەركەكتەردىڭ وزدەرىمەن سويلەسۋ، ارينە، مۇمكىن بولمادى. ولاردىڭ اتى-جوندەرى اتالعان جوق. ءبىراق وسىنداي بىلىققا جول بەرگەنى ءۇشىن اق حالاتتىلاردىڭ وزدەرى قازىر پروكۋرورلاردىڭ قاھارىنا ىلىككەن.
ولاردىڭ ويىنشا، بۇل جەردە ءبىر كىلتيپان بار. دارىگەرگە مۇلدەم قارالماعانداردى تىزىمگە ەنگىزگەن مەديتسينا قىزمەتكەرلەرى ولاردىڭ ءارقايسىسى ءۇشىن مەملەكەتتەن 3 مىڭ تەڭگەدەن اقشا العان. وسى اقشانى كوبەيتكىسى كەلگەن شىعار، اق حالاتتىلار قىزدى-قىزدىمەن تىزىمگە ەركەكتەردىڭ دە اتى-ءجونىن جازىپ، اۋرۋشاڭ قىلىپ قويىپتى.
گۇلميرا تاسبولات قىزى
«KTK» تەلەارناسى
