يسلام پايعامبارىنىڭ ەسىمىن كەلەمەجدەۋ كىم ءۇشىن قاجەت؟

ارعى تەگى كاشميرلىك، بومبەيدە مۇسىلمان وتباسىندا دۇنيەگە كەلگەن سالمان رۋشتي دەگەن جازۋشى 1988 - جىلى جارىق كورگەن « سايتاننىڭ ولەڭى» اتتى رومانىندا پايعامبارىمىزدى استارلى تۇردە كەلەمەجدەيمىن دەپ، بۇكىل مۇسىلمان قاۋىمىنىڭ قارعىسىنا ۇشىراپ، باسىمەن قايعى بوپ كەتكەنىن الەم بىلەدى.
ودان سوڭ (2005 - جىلى) دانيانىڭ « دجيللاندس پوستەن» دەگەن ءبىر ايماقتىق گازەتى جەرگىلىكتى سۋرەتشىنىڭ پايعامبارىمىزدى بەينەلەگەن كاريكاتۋرالىق سۋرەتتەرىن جاريالايمىن دەپ، باسى پالەگە قاپ كەشىرىم سۇراپ قۇتىلعانى بار. ەندى بولسا...
ءيا، ەندى، تاعى دا سول مۇسىلمان قاۋىمىنىڭ تىرەگى اسىل پايعامبارىمىز مۇحاممەد سالالوحۋ ءۋالايحي اسسالامنىڭ اتىنا كىر كەلتىرەتىن وقيعا پايدا بولدى. 2014 - جىلى جىلدىڭ ناۋرىز ايىندا Facebook الەۋمەتتىك جەلىسىنىڭ تۇركيالىق پايدالانۋشىلارى تاراپىنان جاريالانعان، استىنا «مۇحاممەد» ءسوزى بەدەرلەنگەن اياق كيىمنىڭ سۋرەتى جۇرتشىلىقتىڭ اشۋ-ىزاسىن تۋعىزدى. سۋرەتتى الەۋمەتتىك جەلىدە جاريالاعان ادام «جازدا ءۇي ىشىندە كيۋگە ارنالعان اياق كيىمنىڭ ساپاسى جاقسى بولعانى ءۇشىن ساتىپ العانىن جانە ونىڭ «Gezer» بەلگىسىمەن شىعارىلعانىن» ايتقان.
بۇل وقيعانى ەستىگەندەر اشۋ-ىزاعا بۋلىعىپ، وعان قارسى ءبىر شارا قودانباققا بەكىنگەن. ءسويتىپ پايعامبارىمىزدىڭ ەسىمىن ماسقارالاۋ نيەتىندە تابانىنا « مۇحاممەد» ءسوزى بەدەرلەنگەن اياق كيىمدەرگە قارسى «Bingol Birlik ve Beraberlik» قوعامى نارازىلىق تانىتۋشىلاردىڭ قولىن جيناۋدى باستاپ كەتتى. ازعانا ۋاقىتتىڭ ىشىندە نارازىلىق شاراسىن قولداپ، وعان قول قويعانداردىڭ سانى كوبەيە ءتۇستى. اتالعان اياق كيىمدەردى شىعارۋشى «Gezer» فابريكاسى «ءوز ونىمدەرىندەگى جازۋدى (اياق كيىم تابانىنداعى) كەيىننەن بىلگەندىگىن جانە سوڭىنان ءوز ونىمدەرىن قايتا جيناپ الۋعا شەشىم قابىلداعانىن» بىلدىرگەننەن كەيىن عانا مۇسىلمان قاۋىمىنىڭ نارازىلىعى ءسال باسىلعانداي بولدى. بولعان وقيعاعا وراي تۇركيا ب ا ق-تارىنا بەرگەن سۇحباتىندا «Gezer» فابريكاسىنىڭ باسشىلارىنىڭ ءبىرى ءدولماجيدىڭ ايتۋىنا قاراعاندا «فابريكادا 2200 دەي ادام جۇمىس ىستەيدى، ءاربىر ءونىم بىرنەشە تەكسەرۋدەن وتەدى. سوعان قاراماستان تابانىنا «مۇحاممەد» ءسوزى جازىلعان اياق كيىم نازاردان تىس قالعان. سەبەبى، اتالعان اياق كيىمنىڭ تاباندارى شەتەلدەن اكەلىنگەن».
- ءبىز اتالعان اياق كيىمنىڭ قالىبىن بۇزىپ تاستادىق جانە ساتىلعان، ساتىلۋعا تاراتىلعان اياق كيىمدەردى جيناپ الۋعا شەشىم قابىلدادىق.
«Gezer» - اياق كيىم فابريكاسى رەتىندە ءبىزدىڭ ۇلتتىق برەندىمىزدىڭ ايناسى دەپ بىلەمىز جانە مۇحاممەد سالالوحۋ ءۋالايحي اسسالامعا دەگەن شەكسىز قۇرمەتىمىزدى بىلدىرە وتىرىپ، سالعىرتتىعىمىز سەبەبىنەن كەتكەن قاتەلىكتەرىمىز ءۇشىن بارشا مۇسىلمان قاۋىمنان كەشىرىم سۇرايمىز، - دەدى دولماجي.
turkystan.kz