قازاقستاننىڭ ەكى مادەنيەت قايراتكەرىنە «استانا قالاسىنىڭ قۇرمەتتى ازاماتى» اتاعى بەرىلدى

استانا. قازاقپارات - استانانى دامىتۋعا سىڭىرگەن ەڭبەكتىڭ باستى دالەلدەرىنىڭ ءبىرى - «استانا قالاسىنىڭ قۇرمەتتى ازاماتى» اتاعىنا يە بولۋ. وسىعان دەيىن، بۇل بەلگىمەن ەلوردانىڭ تانىمال تۇلعالارى ماراپاتتالعان.

 اتاپ ايتقاندا، مەملەكەت باسشىسى نۇرسۇلتان نازاربايەۆ، ك س ر و حالىق ءارتىسى بيبىگۇل تولەگەنوۆا، قازاق ۇلتتىق مۋزىكا اكادەمياسىنىڭ رەكتورى ايمان مۇساقوجايەۆا جانە ت. ب.

بۇگىن بەسىنشى شاقىرىلىمداعى قالالىق ءماسليحاتتىڭ كەزەكتى سەسسياسىندا ەلىمىزدىڭ ەكى مادەنيەت قايراتكەرىنە - «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى تولەگەن مۇحامەدجانوۆ پەن قازىرگى زامانعى ونەر مۇراجايىنىڭ ديرەكتورى نەللي شيۆريناعا «استانا قالاسىنىڭ قۇرمەتتى ازاماتى» اتاعىن بەرۋ تۋرالى شەشىم قابىلداندى، دەپ جازادى astana.gov.kz.

«ءبىر جاعىنان ماعان وتە قۇرمەتتى ءارى جاۋاپتى مىندەت جۇكتەلىپ وتىر، قازاقستان رەسپۋبليكاسى مەن ەلوردانىڭ مادەنيەتى مەن ونەرىن دامىتۋعا وراسان قوسقان ۇلەسى ءۇشىن مۇحامەدجانوۆ تولەگەن مۇحامەدجان ۇلى مەن شيۆرينا نەللي ۆيكتوروۆناعا «استانا قالاسىنىڭ قۇرمەتتى ازاماتى» اتاعىن بەرۋ» ، - دەدى استانا قالاسى اكىمىنىڭ ورىنباسارى ەرسايىن ناعاسپايەۆ.

 ايتا كەتەيىك، تولەگەن مۇحامەدجانوۆ - ق ر مەملەكەتتىك سىيلىعىنىڭ لاۋرەاتى، ق ر ەڭبەگى سىڭگەن قايراتكەرى، «پاراسات» وردەنىنىڭ كاۆالەرى، «مادەنيەت» اتالىمىندا «جىل ادامى -2012» حالىقارالىق سىيلىعىنىڭ يەگەرى.

نەللي شيۆرينا - «مادەنيەت قايراتكەرى» ءتوس بەلگىسىمەن، «شاپاعات» ، «ق ر تاۋەلسىزدىگىنە 10 جىل» مەدالدارىمەن ماراپاتتالعان، باسقا دا مەرەيتويلىق ناگرادالاردىڭ يەگەرى، پولشا رەسپۋبليكاسىنىڭ ەڭبەك سىڭىرگەن مادەنيەت قايراتكەرى.