حايناندا قانداي قىزىقتار بار

الەمدە فلورا مەن فاۋنانىڭ ەڭ كوپ كەزدەسەتىن ارالى تۇگەل تروپيكالىق اعاشتار مەن جەمىستەرگە تولى. ەڭ ۇلكەن ماقتانىشى - كوكوس اعاشىن اياق اتتام جەردە كەزدەستىرۋگە بولادى.
وڭتۇستىك قىتاي تەڭىزى جاعاسىندا ورنالاسقان ارالدىڭ وڭتۇستىك ايماعى - سانيا قالاسى سوڭعى جىلدارى تۋريستەردىڭ ءسۇيىپ دەمالاتىن كۋرورتىنا اينالدى. الەمدەگى ەشبىر زاۋىت پەن ءتۇتىنى بۇرقىراعان ءوندىرىس ورنى جوق تازا قالا يالۋنۆان- شىعىس تەڭىزى، دادۋنحاي- قالانىڭ ورتالىعى جانە اكىمشىلىك ايماق، سانيابەي-دراكون بۇعازى دەپ اتالاتىن قويناۋلارعا بولىنەدى.
ۇشاقتان تۇسكەن بويدا تىنىسىڭىزدى اشىپ جىبەرەتىن تەڭىزدىڭ تاماشا ءيىسىن جۇتىپ، ءسىزدى ورحيدەيا گۇل ورامدارىمەن قارسى الاتىن قوناقجاي قىتايلاردىڭ كوركەم ارالىنا جول تارتاسىز. ارال- ەشقاشان سولمايتىن ورحيدەيانىڭ وتانى.
گۇلدەردىڭ پاتشاسى ەسەپتەلەتىن ورحيدەيانى كەز-كەلگەن دۇكەن مەن قوناق ۇيلەردەن كەزدەستىرە الاسىز. جىلدىڭ 300 كۇنى شاقشيىپ كۇن ۇرىپ تۇراتىن جاڭبىر سيرەك جاۋىپ، اۋاسى ەڭ ىلعال سۋبەكۆاتورلى ارالدا قىسقا جەڭ كويلەكتەرىڭىزدى كوبىرەك العانىڭىز ءجون. كوشەدە كەتىپ بارا جاتىپ سۋ تەرگە تۇسسەڭىز تاڭ قالماي، جاقىن ماڭداعى مانگو سۋسىنىن ءىشىڭىز.
مانگو مەن كوكوستىڭ تابيعي شىرىنىن كەز-كەلگەن قىتايلىق «اپايدان» تيىنعا ساتىپ الاسىز. شامامەن 1-2 دوللار.
بۇل جەمىس پەن كوكونىس ساتۋشىلاردى جاعاجاي مەن ايالدامالاردا كەزدەستىرە الاسىز، العىڭىز كەلمەسە دە تاۋارىن قويماي ۇسىناتىن ايەلدەردى جەرگىلىكتى حالىق "مۋسۋرماني" دەپ اتايدى ەكەن. ونىڭ ماعىناسىن سۇراي كەلە ول- مۇسىلماندار ەكەن. ءتىلى كەلمەگەن قىتايلار بۇل مۇسىلمان قىتايلار ەكەن. ال ولار بولسا وسىلايشا دالا كەزىپ ساۋدا جاساپ، كۇن كورەدى.
جالپى مۇنداعى تۇنىپ تۇرعان كەرەمەت تابيعي بايلىعىن پايدالانا بىلگەن قىتايلار 24 ساعات دەمالىسسىز جۇمىس ىستەگەنمەن، ءزاۋلىم تاپ-تازا قوناق ۇيلەردە قىزمەت كورسەتكەنمەن تۇرعىلىقتى حالىق لاس ءومىر سۇرەدى.
ەگەر وسىناۋ وركەنيەت تابان باسىپ ۇلگەرمەگەن ارالعا دەمالام دەسەڭىز الدىمەن دادۋنحاي قالاسىنداعى ادەمى قوناقۇيلەر مەن ورتالىق ساۋدا ورىندارى ءسىزدى قىزىقتىرا قويعانمەن قالا ماڭىنداعى لاس جانە قوقىستى ورىندار جۋىق ارادا جيىركەنىش سەزىمىن ۇيالاتۋى مۇمكىن. سوندىقتان بۇل قالا تولىق رەلاكسقا بەرىلىپ دەمالام دەۋشىلەرگە ەمەس، قىتايلاردىڭ ىعى-جىعى شۋلى ءومىرىن كورەم دەۋشىلەرگە ارنالعان.
اسا قىمبات ەمەس، تىنىش جانە قاراپايىم قوناقۇيلەردە دەمالام دەۋشىلەر باتىل تۇردە سانيابەي قالاسىنا جول تارتسا بولادى. قوڭىر توپىراق پەن تىنىش تەڭىز جاعاسىندا جاتىپ، ەم قابىلدايمىن دەيتىن تۋريستەرگە بۇل جاعاجاي تاپتىرمايتىن ورىن.
ەگەر الەمدىك ۇزدىك تىزىمگە كىرەتىن قوناقۇيلەر مەن بايلىعى كوزگە ۇرىپ تۇرعان قالاسىن كورەم دەسەڭىز، جىل سايىن "الەم ارۋى" سايىسىنىڭ تۇراقتى ايماعىنا ارنالعان، حيلتون، شەراتون، سەنت رەدجيس، كراۋن پلازا، پۋلمان رەزورت اتتى دۇنيەنىڭ تۇكپىر-تۇكپىرىنەن كەزدەسەتىن قوناقۇيدە جاتىپ، اپپاق قۇمى مەن اسەم تەڭىزىنە ءتۇسىپ راقات الام دەسەڭىز، ەۋروپالىق اسحانادان ءدام تاتىپ، گولف تەبەم دەسەڭىز، وندا ءسىز ءۇشىن - يالۋنۆان ارالى قۇشاعىن جايادى. كورشىلەرىنەن قاراعاندا جوعارى تۇراتىن قالاعا قالتانى قالىڭداتىپ بارعان ءجون بولادى.
تەڭىز تاعامدارىن سۇيمەيتىندەرگە ماعان ۇقساپ قازى قايناتىپ سومكەلەرىڭىزگە سالىپ الۋلارىڭىزعا بولادى. كوپتەگەن ەۋروپالىق جانە ازيالىق ەلدەر سەكىلدى بۇل ەلدە دە ەت تاپشى جانە قىمبات. جىبىرلاعان قۇرت-قۇمىرسقا مەن جىلاننىڭ الۋان ءتۇرىن جەپ ەكزوتيكالىق اسحانانادان ءتام تاتا الاسىز.
ەت سەكىلدى مۇندا بيداي نانى دا تاپشى. تەك جۇگەرىنىڭ نانىن جەپ ازام دەۋشىلەرگە جاقسى ديەتا. نەمەسە جاقىن ماڭداعى دۇكەننەن كەرەكتى ازىق- تۇلىگىڭىزدى ساتىپ الىپ، قوناقۇيدەگى اس بولمەڭىزگە سۇيىكتى تاعامىڭىزدى دايىنداپ جەي الاسىز. دەگەنمەن بۇل سۇلۋ ارالدىڭ تروپيكالىق جەمىستەرىن جەمەۋگە بولمايدى: دراكون جەمىسى، مانگو، كوكوس ءسۇتى، تاعىسىن تاعى ءبىز تانىمايتىن جەمىس سەبەتىن قوناق بولىپ جايعاسقان بولمەڭىزگە سىيلىق رەتىندە دايارلاپ قويادى.
مۇندا تەڭىز سورپالارىنىڭ نەشە ءتۇرلىسىن ىشە الاسىز. ەڭ ءدامدىسى-مەدۋزا سورپاسى مەن اكۋلانىڭ ەتىنەن جاسالعان سورپا. ءبىلۋ كەرەك!: حايناندا قانداي قىزىقتار بار
حاينان ارالدارىنا قىدىرۋدى جوسپارلاعان بولساڭىز مىندەتتى تۇردە «مايمىلدار پاركىنە» جول تارتىڭىزدار. ادام تارىزدەس اقىلدى مايمىلدار سىزبەن امانداسىپ، ويناپ ءتىپتى سۋرەتكە دە تۇسە بىلەدى. ءبىلۋ كەرەك!: حايناندا قانداي قىزىقتار بار
ال جانىڭىزدى ارتىق كۇيزەلىس پەن اعزاڭىزداعى اۋرۋلاردى، تەرىڭىزدى كوركەيتەم دەسەڭىز راديوندى جانە ناتريي- كاليلى تەرمالدى سۋلارعا تۇسسەڭىز بولادى.
حاينان ارالدارىنىڭ قىتاي مەملەكەتىنىڭ باسقا قالالارىنان تاعى ءبىر ارتىقشىلىعى- ەڭ تازا جانە ءدامدى شايدى ءوسىرۋى. مۇندا كوك شايدىڭ الۋان تۇرىنەن باستاپ، ء«سۇت شايلارى» ، «دراكون كوزدەرى» ، جەمىس-جيدەكتى شايلەردەن «شاي ۇيشىگىنەن» بارىپ ءىشىپ كورۋگە جانە جىلدار بويى ساقتالىپ پرەستەلگەن شايلەرگە دەيىن ساتىپ الا الاسىز. شاي قايناتۋدىڭ ارنايى تەحنولوگياسى مەن شاي ءىشۋ ءداستۇرىن كوزىڭىزشە سيرك شەبەرلەرى ىسپەتتى شوۋ جاساپ كورسەتەدى. تاۋاردىڭ ءتىپتى ارنايى سەرتيفيكاتىن بەرەدى. ويتكەنى قىتايدا شايدىڭ دا وزگە تاۋاردىڭ جالعان كوشىرمەلەرى كوپ، تەك مۋنيتسيپالدى دۇكەندەردەن عانا شىنايىلىعى راستالعان قۇجاتتى تالاپ ەتە الاسىز.
قىتاي حالقىنىڭ عاسىرلار بويى الەم تامسانىپ تانىمال اتانعان ۇلكەن ونەرى ول- جىبەك ماتاسى. جىبەك ماتاسى جاسالاتىن جىبەك قۇرتىن كورىپ، ءتىپتى قۋىرىپ جەيمىن دەسەڭىز دە بولادى، جىبەكتەن جاسالعان تريكوتاج كيىمدەر مەن كورىكتى جامىلعىلاردى «جىبەك فابريكاسىنان» ساتىپ الا الاسىز. مۇندا دا ساپا سەرتيفيكاتى بار. كوزدىڭ جاۋىن الاتىن جۇمساق اسەم ماتالاردىڭ ەڭ ۇلكەن تاڭداۋى وسىندا.
حاينان ارالدارىنىڭ تاعى ءبىر تاماشا ماقتانىشتارىنىڭ ءبىرى- مەرۋەرت تاستارى. تەڭىز تۇبىنەن تەرىلىپ الىنىپ، ارنايى ادىسپەن تەك قولمەن تازالاناتىن تاستاردىڭ ەڭ قۇندىسى- قارا مەرۋەرت پەن سارى مەرۋەرت تاستار ءدال وسى ارالداردا وڭدەلىپ بۇكىل الەمگە تارايدى. ءبىز بارعان فابريكانىڭ بۇل اشەكەي بۇيىمداردى حيلاري كلينتون، ۇلى بريتانيا پاتشايىمدارى مەن حانشايىمدارى، قىتاي مەملەكەت باسشىلارىنىڭ ايەلدەرى تۇراقتى قوناقتارى ەكەن.
تەك اشەكەي بۇيىمداردى عانا ەمەس، سونىمەن قاتار مەرۋەرتتەن جاسالعان كرەم كوسمەتيكالاردى، وپا دالاپتاردى دا الا الاسىز. بۇل قۇندى كرەمدەر ءسىزدى اعارتىپ قانا قويماي، ۇزاق جىلدار بويى جاس كورىنۋىڭىزدىڭ كەپىلى بولا الادى. ارنايى قابىرعاعا ىلىنگەن الەم سۇلۋلارىنىڭ وسى قىمبات كوسمەتيكانى قولدانۋ ارقىلى سۇلۋلانعان سۋرەتتەرىن دە كورە الاسىز.
مۇندا دا ساپا سەرتيفيكاتىن تالاپ ەتۋدى ۇمىتپاڭىز، ەگەر سىنعان نەمەسە كەلەسى جىلى ۇناماي قالعان جاعدايدا، كەلەسى كەلگەن ساتىڭىزدە جاڭا بۇيىمعا وپ-وڭاي اۋىستىرىپ الا الاسىز.
ەكسكۋرسيالاردىڭ ىشىندە تاعى ەڭ تانىمدىسى- اكۋلا ورتالىعى بولدى. مۇندا ءسىز اكۋلانىڭ مايىنان جاسالعان ءدارى مەن كوسمەتيكانى ءوز كوزىڭىزبەن تاماشالاي الاسىز. الەمدەگى ەڭ قىمبات اكۋلا مايىنىڭ ەمدىك قاسيەتىن قىتايلار جىلدار بويى دامىتىپ، زەرتتەپ نارىققا شىعارۋدا. ول- گاستريت، يازۆا، توقىشەك پەن ءوت اۋرۋلارىندا تاپتىرماس ەم بولا الادى. بۇل ورتالىقتا ءسىز اكۋلا ەتىنەن جاسالعان كامپيتتى دە جەي الاسىز، اكۋلانىڭ ەتىنەن ەزىلىپ جاسالعان كامپيت پەن كۇلشەنىڭ ارتىنان سوڭ، اكۋلا سورپاسىن ءىشىپ جىبەرسەڭىز، ءدامى اۋىزىڭىزدان ۇزاق ۋاقىت كەتپەيدى.
حاينان ارالدارى ءوزىنىڭ شيپاگەرلىك تۋرلارىمەن ايگىگە اينالعان.
ارالعا كەلۋشى تۋريستەردىڭ دەنى نەگىزىنەن ورتا جاستاعى مەن زەينەتكە شىققان كىسىلەر. ەمدىك ماقساتتا كەلۋشىلەردى مۇندا ءداستۇرلى قىتاي ماسساجى مەن ءشوپ دارىلەرمەن ەمدەيدى. ەمنەن شىعىپ جاعاجايدا جاتىپ دەمالۋ- بويىڭىزدى تازارتىپ، ويىڭىزدى سەرگىتەدى. ەڭ جاقسى دارىگەرلەر مەن ورتالىق مۇندا - اسكەري مەكەمە بولىپ ەسەپتەلەدى. اسكەري گوسپيتالدە جاتىپ-اق بولمەنى جالعا الىپ، ەم قابىلداپ دەمالۋىڭىزعا بولادى.
حاينان ارالدارى جابايى تابيعاتى تاڭقالدىرماي قويمايتىن تاڭعاجايىپ ايماق. ءالى اشىلماعان تىلسىم تۇستارى كوپ. وسىناۋ جاراتقاننىڭ بىزگە سىيلاعان كورىكتى جەرلەرىن اربىرىڭىزگە كورۋگە بۇيىرسىن.
Blogtime
ازىرلەگەن: بەيسەن سۇلتان ۇلى