يسلام كاريموۆتىڭ نەمەرەسى داۋلى سۇحبات بەردى

استانا. قازاقپارات - 21 - ماۋسىم كۇنى وزبەكستان پرەزيدەنتى يسلام كاريموۆتىڭ نەمەرەسى - اقپان ايىنان بەرى تاشكەنتتە قىزىمەن بىرگە ءۇي قاماۋىندا وتىرعان گۇلنارا كاريموۆانىڭ ۇلىنىڭ رەسەيلىك REN-TV تەلەارناسىنا بەرگەن ەكسكليۋزيۆتى سۇحباتى شىقتى.
None
None

تەلەارنانىڭ مالىمەتىنشە، بۇل وزبەكستان پرەزيدەنتىنىڭ ۇلكەن نەمەرەسىنىڭ العاشقى سۇحباتى.

سۇحبات بەرۋدى وزبەكستان پرەزيدەنتىنىڭ اتتاسى - كىشى-كاريموۆ ءوزى سۇراعان، - دەپ حابارلايدى Tengrinews.kz.

21 جاستاعى يسلام كاريموۆ "نەدەليا" باعدارلاماسىنىڭ جۇرگىزۋشىسى مارياننا ماكسيموۆسكاياعا اناسىنىڭ ءۇي قاماۋىندا وتىرۋى، وعان قاستاندىق جاسالۋىنىڭ سەبەبى جانە اناسى مەن قارىنداسىنىڭ بوستاندىعى ءۇشىن قالاي كۇرەسپەك ەكەنى جايلى ايتقان.

ودان وزگە، يسلام جۇرناليستەرگە بۇعان دەيىن ەشبىر ب ا ق-تا جاريالانباعان وتباسىلىق سۋرەتتەرىن كورسەتكەن. سۇحبات لوندوندا وتكەن (كاريموۆتىڭ ۇلكەن نەمەرەسى وكسفوردتا وقيدى) .

- ءسىز سوڭعى رەت اناڭىزدى قاشان كوردىڭىز؟

- مەن ونى سوڭعى رەت قاڭتار ايىندا تاشكەنتتە كوردىم.

- ونىڭ "تۆيتتەردەگى" اككاۋنتىنا قاراعاندا ول ءۇي قاماۋىندا وتىرعان سياقتى عوي؟

- مەنىڭ ونىمەن بايلانىسىم شەكتەۋلى، سوندىقتان دا ماسەلەنىڭ ەگجەي-تەگجەيىن بىلمەيمىن. ءبىر بىلەتىنىم، انام مەن قارىنداسىمدى ۇيدەن دە، ەلدەن دە شىعارماي وتىر. ءتىپتى قارىنداسىم وقۋىن جالعاستىرۋ ءۇشىن دە قايتا الماي وتىر ( ۇلى بريتانياعا).

- ءسىزدىڭ اناڭىزعا قانداي دا ءبىر رەسمي ايىپ تاعىلعان با؟

- جوق. مەن مۇنى بەيرەسمي ءۇي قاماۋى دەر ەدىم.

- ءسىزدىڭ اناڭىزدى وزبەكستان پرەزيدەنتىمەن بىرەۋلەر ۇرىستىرىپ وتىر دەگەن ءسوز راس پا؟

- مەن مۇنى ۇرىس دەمەس ەدىم، بۇل ونىڭ (وزبەكستان پرەزيدەنتىنىڭ) سىرتىنان جاسالىپ جاتقان جاعداي دەگەن بولار ەم. ەگەر جۋىق ارادا انامنىڭ مەنىمەن كەزدەسۋگە مۇمكىندىگى بولماسا، سونداي-اق ءوزىنىڭ ەمىن جالعاستىرا الماسا، وندا بولىپ جاتقان جاعدايدى ءجىتى تەكسەرۋ قاجەت بولادى.

وزبەكستان پرەزيدەنتىنىڭ نەمەرەسى وتكەن كۇز ايلارىندا اتاسىمەن بايلانىسۋعا مۇمكىندىگى بولعانىن ايتادى. ال 22 - جەلتوقسان - تۋعان كۇنىندە ونى پرەزيدەنتتىڭ ۇيىنە جىبەرمەي قويعان.

"بۇعان دەيىن ءبىز مەنىڭ تۋعان كۇنىمدى ونىڭ ۇيىندە (پرەزيدەنت كاريموۆتىڭ) اتاپ وتەتىنبىز. بۇل جولى سوندا كەلگەنىمىزدە، ءبىزدى ونىڭ ۇيىنە كىرگىزبەدى. ەشقانداي تۇسىنىك بەرمەستەن، تەك سونداي بۇيرىق بولعانىن عانا ايتتى. مەنىڭ ويىمشا، ول ءبىزدىڭ قانشا ۋاقىتتان بەرى ونىمەن كەزدەسە الماي جۇرگەنىمىزدى بىلمەيدى"، - دەيدى گۇلنارا كاريموۆانىڭ ۇلى.

"پرەزيدەنتتىڭ وتباسى توڭىرەگىندە نە بولىپ جاتقانىن بىلمەۋى مۇمكىن بە؟" دەگەن ساۋالعا كىشى- كاريموۆ "مەنىڭ پايىمداۋىمشا، بازبىرەۋلەر قۋلىق ارەكەت جاساپ، ولاردى ءبىر-بىرىنە قارسى قويىپ، اراسىنا وت جاقپاقشى" دەيدى. "ءبىزدىڭ دۇشپاندارىمىز وعان بولعان جاعدايلاردى كەرىسىنشە ايتىپ جەتكىزۋى مۇمكىن. ەگەر ونىمەن بايلانىسسام نە وسى باعدارلامانى كورسە، ودان كەيىن ول ءتيىستى شەشىم قابىلداپ، جاعدايدى تۇزەيدى دەپ ويلايمىن" دەيدى پرەزيدەنتتىڭ نەمەرەسى.

كىشى كاريموۆ "Twitter"- دەگى جازىلعان، بىرەۋلەردىڭ اناسىن ۋلاماق بولعانى جايلى اقپاراتتى راستادى. سونىمەن بىرگە، ونىڭ سوزىنە قاراعاندا، ول دا قاسكويلەردىڭ نىساناسىنا ىلىككەن.

"بۇل بۇدان ەكى جىل بۇرىن بولعان ەدى. انامدى زورعا امان الىپ قالدى. مەن قاتتى ۋلانباعان ەكەم. ءبىز ەم قابىلدادىق. مەن ءبىر جارىم جىل، ال انام ءالى دە ەمىن جالعاستىرىپ ءجۇر. سوڭعى ماعلۇماتتارعا قاراعاندا، قازىرگى ۋاقىتتا ەمىن جالعاستىرۋ ءۇشىن قاجەتتى ءدارى-دارمەك الۋعا ونىڭ مۇمكىندىگى جوق" دەيدى گۇلنارانىڭ ۇلى.

- ال اتاڭىز قاستاندىق جاسالعانى جايلى بىلە مە؟

- ءيا، ول بىلەدى. ول قاتتى ۋايىمدادى. مەنىڭشە قاسكويلەردىڭ باستى ماقساتى انامدى ۋلاۋ بولعان، ال مەن جاعدايدىڭ قۇربانى بولدىم.

باعدارلاماعا گۇلنارا كاريموۆانى جاقتاپ، پرەزيدەنت وتباسىمەن تانىس، ءانشى جانە مەملەكەتتىك دۋمانىڭ دەپۋتاتى يوسيف كوبزون قاتىستى. ول ورىن العان جاعدايعا قىنجىلىس تانىتىپ، گۇلنارا كاريموۆانىڭ قىزى يماننىڭ دەنساۋلىعىنا الاڭدايتىنىن جەتكىزدى. ونىڭ ايتۋىنا قاراعاندا، يمان جۇرەك اۋرۋىنا شالدىققان. ءانشى وزىندەگى سياقتى يمانعا دا كارديوستيمۋلياتور ورناتىلعانىن جەتكىزدى جانە ونى اي سايىن باقىلاۋدا ۇستاپ وتىرۋ قاجەت ەكەنىن ايتتى.

"تاڭقالارلىق جاعداي، ونى قالاي شىعارمايدى؟ قاجەت بولسا ول جايلى مەن يسلام كاريموۆپەن سويلەسىپ، نەمەرەسىنىڭ دەنساۋلىعىنا كوڭىل اۋدارۋ قاجەت ەكەنىن ايتامىن جانە ونى ەم الۋعا جىبەرۋدى سۇرايمىن" دەدى كوبزون.

وزبەكستان پرەزيدەنتىنىڭ نەمەرەسى گۇلنارا كاريموۆانىڭ كاسىپورىنىندا ىستەيتىن قىزمەتكەرلەردىڭ جانە دوستارىنىڭ قاماۋعا الىنعانىن دا راستادى. "اناممەن بايلانىسى بار كوپتەگەن ادامدار جانە ونىڭ دوستارى قاماۋعا الىنعان نە ءىز-ءتۇسسىز جوعالعان. قازىرگى ۋاقىتتا 30 عا تارتا ادام جوعالعان" دەپ اعىنان جارىلدى تەلەارنا سۇحباتشىسى.

"ءبىز ازىرشە بۇل ءىستىڭ ارتىندا كىم تۇرعانىن بىلمەيمىز. ءبىزدىڭ ويىمىزشا ول ادام ەلدە بەدەلدى قىزمەت اتقاراتىن تۇلعا بولۋى ءتيىس. مەنىڭ ويىمشا، بۇل كەلەسى جىلى وتەتىن پرەزيدەنت سايلاۋى الدىندا جاعدايدى تۇراقسىزداندىرۋ ماقساتىندا ادەيى جاسالىپ وتىرعان ءىس" دەدى كىشى-كاريموۆ.

- ءسىزدى كادىمگى "التىن جاستاردىڭ" وكىلى دەيدى. ءساندى كولىكتى جاقسى كورەسىز. ءتىپتى ءسىزدىڭ قىمبات، باعالى كولىكتەر كووللەكتسياڭىزدى تارتىپ الماق تا بولعان دەسەدى.

- بىرىنشىدەن، مەندە اۆتوكولىك كوللەكسياسى بولعان ەمەس، ەكىنشىدەن، مەنىڭ انام وتە قاتال. بۇرىن ونى تۇسىنبەيتىنمىن، ال قازىر سول ءۇشىن وعان العىسىم شەكسىز. مەن ءوزىمدى "التىن جاستاردىڭ" وكىلىمىن دەپ سانامايمىن.

- ساۋالدى توتەسىنەن قويعانىما كەشىرىڭىز، سوندا ءسىز ۇلى بريتانيادا قانداي اقشاعا كۇن كورىپ ءجۇرسىز؟

- بەلگىلى ءبىر مولشەردە انامنىڭ بەرگەن اقشاسى بار. قازىر مەنىڭ وقۋعا تولەيتىن قارجىدان وزگە شىعىنىم جوق.

- ءسىزدىڭ تاربيەڭىزگە اتاڭىز قاتىستى ما؟

- ءيا، بەلگىلى ءبىر جاسقا دەيىن. كەيىنەن انامنىڭ جۇمىسىنا بايلانىستى ءبىز ءبىر قالدان ءبىر قالاعا كوشىپ جۇرگەن سوڭ اتاممەن سويلەسۋدىڭ دە ءساتى تۇسپەيتىن. ول مەنىڭ ومىرىمە جانە تۇلعا بولىپ قالىپتاسۋىما ۇلكەن ۇلەس قوستى. ءتىپتى اتا-انام اجىراسقان سوڭ ول ماعان ءوزىنىڭ تەگىنە جازىلۋعا رۇقسات بەردى.

كىشى يسلام كاريموۆ اناسى گۇلنارا مەن ونىڭ ءسىڭلىسى اراسىنداعى قارىم-قاتىناس جايلى ەشتەڭە دەمەدى. دەسە دە ولاردىڭ اراسى جاقسى ەمەس ەكەنىن ايتتى.

سونىمەن قوسا، كىشى كاريموۆ وزبەكستان پرەزيدەنتىنىڭ وتباسىندا ورىس تىلىندە سويلەيتىنىن ايتقان. سونداي-اق وعان ءدىني نانىمدا ەركىندىك بەرىلىپ، ول يسلام ءدىنىن تاڭداعانىن جەتكىزدى. ودان وزگە ول ءبىلىم الۋ ءۇشىن وكسفوردتى ءوزى تاڭداعانىن ايتتى. قاستاندىق جاسالعاننان كەيىن ول ساباعىنا كۇزەتپەن باراتىن بولعان، سونداي-اق، كۋرستاستارىنىڭ قانداي وتباسىنان شىققانى جايلى سۇراقتارىنان قاشادى ەكەن. وعان قوسا ول قازىر اتاسىنىڭ قانداي شەشىم قابىلدايتىنىن، بۇل جاعدايدىڭ نەمەن بىتەتىنىن كۇتەتىنىن ايتقان.

كىشى يسلام كاريموۆ 1992 - جىلى تۋعان. اكەسى - مانسۋر ماكسۋدي، اۋعانستاننىڭ ەتنيكالىق وزبەگى، ا ق ش ازاماتى. گۇلنارا كاريموۆامەن 1991 - جىلى وتباسىن قۇرعان. گۇلناراعا ۇيلەنگەن سوڭ كۇيەۋى وزبەكستانداعى Coca-Cola كومپانياسى وكىلدىگىنىڭ ديرەكتورى قىزمەتىنە تاعايىندالعان. مانسۋر مەن گۇلنارا 2001 - جىلى اجىراسقان.

Tengrinews.kz7

سوڭعى جاڭالىقتار