قاراعاندىعا كومىردى وڭدەۋ جوباسى بويىنشا كەلىسىم جاساۋعا قىتايلىق ينۆەستورلار كەلدى
قاراعاندى وبلىسىنىڭ اكىمى نۇرمۇحامبەت ابدىبەكوۆپەن بولعان كەزدەسۋدە «كۋزنەتسكي» رازرەزىندە كومىردى كەشەندى وڭدەۋ بويىنشا جوبانى جۇزەگە اسىرۋ ماسەلەلەرى ءسوز بولدى.
«بۇگىن ءبىز جوبانىڭ قازىرگى جاعدايىن تالقىلاپ، الداعى ۋاقىتتا بىرلەسكەن جۇمىستىڭ ناقتى جوسپارىن انىقتاۋ ءۇشىن جينالدىق»، - دەدى ايماق باسشىسى.
جوبا وبلىس ەكونوميكاسىنىڭ وسۋىنە اسەر ەتۋى مۇمكىن، دەپ اتاپ ءوتتى ول.
«ينۆەستيتسيالاردىڭ جالپى سوماسى 2 ميلليارد دولاردى قۇرايدى. زاۋىت قۇرىلىسى ەكى كەزەككە بولىنگەن»، - دەپ حابارلادى «شينحۋا» كورپوراتسياسى باس ديرەكتورىنىڭ ورىنباسارى لانگ ينگ.
ونىڭ سوزىنە قاراعاندا، «كۋزنەتسكي» كومىر رازرەزىنىڭ تالداۋى جۇرگىزىلگەن. سونىڭ ناتيجەسىندە تەحنولوگيانى جاساۋ قاجەت. «تەرەڭدەتىلگەن ماركەتينگتى زەرتتەۋلەر جۇرگىزۋ جوسپاردا بار»، - دەپ قوستى كورپوراسيا وكىلى.
قارجىلاندىرۋ سحەماسى ازىرگە انىقتالعان جوق.
مامانداردىڭ ەسەپتەۋىنشە، جوبانىڭ جۇزەگە اسىرىلۋى وندىرىلگەن كومىردىڭ ءار تونناسىنان ەكونوميكالىق تيىمدىلىكتى 5-7 ەسە ۇلعايتۋعا مۇمكىندىك بەرەدى.
وبلىس اكىمدىگىنىڭ مالىمەتتەرى بويىنشا، زاۋىتتىڭ قۇرىلىسى ءۇشىن بۇقار جىراۋ اۋدانى «كۋزنەتسكي» كومىر رازرەزىنىڭ جانىندا ءۇش الەۋەتتى ورىن انىقتالدى. وندىرىستىك الاڭنىڭ شيكىزات بازاسىنا جاقىن بولۋى قاراستىرىلىپ جاتىر.
كەزدەسۋدە، سونىمەن بىرگە، جەرگىلىكتى حالىقتىڭ جوبا بويىنشا جۇمىسقا تارتىلۋى جانە وتاندىق ماتەريالداردى پايدالانۋ ماسەلەلەرى ءسوز بولدى. ايماق باسشىلارى ەكولوگيالىق تالاپتار مەن ستاندارتتاردى ساقتاۋ تالابىن ناقتىلاپ قويدى.
«ءبىز يننوۆاتسيالاردى ەنگىزۋمەن كومىر- حيميالىق ونەركاسىپتى دامىتۋعا قىزىعۋشىلىق ءبىلدىرىپ وتىرمىز جانە ءبىزدىڭ ىنتىماقتاستىعىمىز ەكى جاققا دا ءتيمىدى بولۋى مۇمكىن»، - دەدى ن. ابدىبەكوۆ.
ونىڭ سوزىنە قاراعاندا، كەزدەسۋ قورتىندىسى بويىنشا، ەكى تاراپتىڭ دا مىندەتتەرى انىقتالعان حاتتامالىق شەشىمگە قول قويىلادى.
ەسكە سالا كەتەيىك، 2013 - جىلدىڭ قىركۇيەگىندە ق ح ر ءتوراعاسى شي جينپيڭنىڭ قازاقستانعا جاساعان رەسمي ساپارىنىڭ بارىسىندا ىنتىماقتاستىق تۋرالى ءبىرقاتار ەكىجاقتى قۇجاتتارعا، سونىڭ ىشىندە، قاراعاندى وبلىسىنىڭ «كۋزنەتسكي» رازرەزىندە كومىردى كەشەندى وڭدەۋ بويىنشا جوبانى جۇزەگە اسىرۋ اياسىندا ءوزارا تۇسىنىستىك تۋرالى مەموراندۋمعا قول قويىلدى. «شينحۋا» كورپوراتسياسى جوبانى ق ر پرەزيدەنتى نۇرسۇلتان نازاربايەۆقا ونىڭ ق ح ر- عا وسى جىلدىڭ مامىر ايىندا جاساعان ساپارىنىڭ بارىسىندا تانىستىردى.
كومىردەن سينتەتيكالىق سۇيىق وتىن ءوندىرۋ جوسپارلانىپ وتىر. كاسىپورىن بەنزين، ديزەلدىك وتىن مەن جوعارى باعالى ءتۇرلى حيميالىق ونىمدەردى شىعارادى دەپ كۇتىلۋدە.
«شينحۋا» كورپوراتسياسى ق ح ر- داعى كومىردى ءوندىرۋ، بايىتۋ، كوكستاۋ جانە حيميالاۋ بويىنشا ءىرى جەكەمەنشىك كومپانيا بولىپ تابىلدى. سونىمەن بىرگە، وندا مەتاللۋرگيا، قۇرىلىس ماتەريالدارىمەن اينالىسىپ، قۇرىلىس ماتەريالدارىن، حيميالىق يندۋستريا ءونىمىن شىعارۋ قولعا الىنعان.
