يماندى بالعىندار بايگەگە ءتۇستى

مىنە، ماۋسىم ايىندا باستاۋ العان ساۋات اشۋ كۋرستارى دا ءتامام بولىپ، بالالاردىڭ ءبىلىم دەڭگەيىن سىناپ، باعالاۋ ءۇشىن بۇگىن «ازىرەت سۇلتان» مەشىتىندە ءبىلىم سايىسى ءوتتى،
دەپ حابارلايدى muslim.kz.
«بىلىمگە قۇشتار يماندى جاس» سايىسىندا جازعى كۋرستا ءبىلىم دەڭگەيى مەن العىرلىعىمەن كوزگە تۇسكەن استانا قالاسىنىڭ 7 مەشىتى مەن «نۇر استانا» ورتالىق مەشىتىنە قاراستى يسلام ورتالىعىندا ءتالىم العان شاكىرتتەر سىنعا ءتۇستى.
«تانىستىرۋ» ، «يسلام تاريحى» ، «يمان نەگىزدەرى جانە عيبادات» جانە «ءارتۇرلى تاقىرىپتار» اتتى 4 كەزەڭنەن تۇراتىن ءبىلىم باسەكەسىندە بالالار بىرىنەن ءبىرى وتكەن العىر، بىلىمگە قۇشتار ەكەندىكتەرىن بايقاتتى. جارىس ەرەجەسى بويىنشا ءار اينالىمدا تاقىرىپقا سايكەس ەكراندا تاڭداعان ۇياشىقتاعى ساۋالدارعا جاۋاپ بەرە وتىرىپ، سوڭىنان جيناقتالعان ۇپايى تومەن بولعان ەكى قاتىسۋشى ويىننان شىعىپ وتىرادى.
قازىلاردىڭ ورتاق شەشىمىمەن 1- ورىندى «تولەباي» مەشىتىنەن كەلگەن ادىلەت جيەنعاليەۆ الىپ، وعان بىلعارى قاپتامالى ۇلكەن قۇران كىتابى، «ءدىن مەن ءداستۇر» كىتابى جانە ارنايى ماراپات قاعازى تابىستالدى. ەكىنشى جانە ءۇشىنشى ورىنعا «نۇر استانا» ورتالىق مەشىتىنىڭ شاكىرتى امان مۇحتاربەك پەن «ازىرەت سۇلتان» مەشىتى اتىنان قاتىسقان نۇرسۇلتان نۇربولوۆ لايىقتى دەپ تانىلىپ، بىلعارى قاپتامالى قۇران كارىم، «ءدىن مەن ءداستۇر» كىتاپتارى مەن ارنايى ماراپات قاعازدارىنا يە بولدى. وزگە قاتىسۋشىلار دا قۇران كارىم، «ءدىن مەن ءداستۇر» كىتاپتارى مەن ارنايى سىيلىقتارمەن ماراپاتتالدى.