الماتى- الاكول باعىتىندا اۋە رەيسىن اشۋ قاراستىرىلۋدا

بۇل تۋرالى الماتى وبلىسىنىڭ اكىمى اڭسار مۇساحانوۆ «نۇر وتان» پارتياسىنىڭ وبلىستىق فيليالىندا وتكىزگەن قوعامدىق قابىلداۋى بارىسىندا ايتتى، دەپ حابارلانعان الماتى وبلىسى اكىمىنىڭ رەسمي سايتىندا.
پارتيانىڭ وبلىستىق فيليالىنىڭ ءتوراعاسى الاكول اۋدانىنان كەلگەن وبلىستىق ءماسليحاتتىڭ دەپۋتاتى قاناتحان ءنۇسىپوۆتىڭ «ءۇشارال- دوستىق» تاس جولىن جوندەۋ تۋرالى ساۋالىنا جاۋاپ بەرگەندە اتالعان اۋە رەيسى جازعى دەمالىس ماۋسىمىندا قىزمەت كورسەتەدى دەپ جوسپارلانىپ وتىرعانىن تىلگە تيەك ەتتى.
سونىمەن قاتار ق. ءنۇسىپوۆ بەسكول اۋىلىنداعى بۇرىنعى مادەنيەت ءۇيىنىڭ عيماراتىن قالپىنا كەلتىرىپ، پايدالانۋعا بەرۋ تۋرالى ۇسىنىسىن دا ءبىلدىردى. سونداي- اق دوستىق بەكەتىنەن قىتايعا 1 كۇندىك ۆيزاسىز رەجىم بار ەكەنىن، ءبىراق بۇل تىم از ۋاقىت بولعاندىقتان، كوپتەگەن ازاماتتار كورشى مەملەكەتكە شىعىس قازاقستان ارقىلى كىرىپ جاتقانىن تىلگە تيەك ەتتى. سەبەبى، ولاردا 3 كۇندىك ۆيزاسىز رەجىمگە رۇقسات ەتىلگەن.
جۇزدەسۋدە ءوڭىر باسشىسى الداعى 2015 - جىلى مادەنيەت ءۇيىنىڭ جوندەلىپ، ەلدىڭ يگىلىگىنە ۇسىنىلاتىنىن ايتتى.
«الاكولدە حالىق تەاترىن قۇرىپ جاتقانىن كوردىم. ونى ءبىز قولدايمىز، مۇمكىندىگىنشە قارجىلاي قولداۋ كورسەتەمىز» ، - دەدى ا. مۇساحانوۆ.
جالپى قوعامدىق قابىلداۋعا جازىلعان 8 ازامات بالا سانىنىڭ ارتۋىنا بايلانىستى شەلەك اۋىلىندا مەكتەپ، قارعالى اۋىلىندا بالاباقشا اشۋ، اۋىل شارۋاشىلىعى بويىنشا جاركەنت وڭىرىندەگى كانالدى جوندەۋ سياقتى نەگىزىنەن الەۋمەتتىك ماسەلەلەر كوتەردى.
جيىندا ءسوز بولعان باسقا دا ماسەلەلەردىڭ ءبىرقاتارى شەشىمىن تاپسا، كەيبىرىنە زاڭ اياسىندا زەردەلەپ، مۇمكىندىكتەرى قاراستىرىلاتىنى ايتىلدى.