قىتاي ەلىنىڭ ەكونوميكاسى الداعى ۋاقىتتا وسە تۇسەدى

مۇنداي مالىمدەمەنى قىتاي پرەمەر- ءمينيسترى لي كىشياڭ ۇلى بريتانياداعى رەسمي ساپارى كەزىندە جاساعان.
ول ءوز سوزىندە «جاپپاي قىزىقتىرۋ شارالارىنىڭ ورنىنا قىتاي بيلىگى «اقىلدى جانە ماقساتتى ارەكەتتەرگە» سۇيەنەدى. «ال ەكونوميكانى قولداۋ جالعاسا بەرمەك»، - دەگەندى ايتتى. پرەمەر سونىمەن قاتار بۇعان دەيىنگى ءبىرقاتار ساراپشىلاردىڭ قىتاي ەكونوميكاسىنىڭ ءوسۋ دەڭگەيى باياۋلايدى دەگەن ءسوزىن تەرىسكە شىعاردى.
لي كىشياڭ، ق ح ر پرەمەر- ءمينيسترى:
قىتاي ۇكىمەتى ەكونوميكالىق ءوسىمنىڭ 7,5 پايىزدان تومەندەپ كەتپەۋىن قاداعالاپ وتىرادى. بۇل جاڭا جۇمىس ورىندارىن اشۋعا قاجەتتى دەڭگەي. ەلدەگى باعا جىلىنا 3,5 پايىزدان ارتىق قىمباتتامايدى.
قىتاي پرەمەرىنىڭ مالىمدەمەسى قارجى نارىعىنداعى ارىپتەستىككە ارنالعان جيىندا ايتىلدى. ءدال وسى شارادا ۇلى بريتانيانىڭ قارجى ءمينيسترى قىتاي يۋانىنىڭ ءوسىمى دوللاردان كەم تۇسپەي وتىرعانىن ءسوز ەتتى. ونىڭ سوزىنشە، يۋان قۇنىنىڭ كوتەرىلۋى الداعى ون جىلدىقتا الەمدىك قارجى سالاسىنا ايتارلىقتاي وزگەرىس اكەلەدى.
ال امەريكا ەكونوميكاسىنىڭ وسى جىلعا جاسالعان دولبارى كوڭىل كونشىتپەيدى. فەدەرالدى رەزەرۆتىك جۇيەنىڭ سارسەنبى كۇنى كەلتىرگەن دەرەگىنە ساي، بۇل ەلدىڭ ەكونوميكالىق ءوسىمى بيىل ءبىرشاما باسەڭدەيدى. دەگەنمەن الداعى ەكى جىلعا ارنالعان بولجام جاقسى. سونداي- اق، جۇمىسسىزدىق ماسەلەسى دە وڭتايلى شەشىلەتىن بولادى. ءبىرىنشى توقساندا ا ق ش- تىڭ ىشكى ءونىمى 1 پايىزعا ازايدى.
«استانا» ارناسى