استانادا عارىش اپپاراتتارىن قۇراستىرۋ- سىناۋ زاۋىتى سالىنادى

استانا. قازاقپارات - استانادا فرانسۋز كومپانياسىمەن بىرلەسە وتىرىپ، عارىش سالاسىنداعى تاعى ءبىر ماڭىزدى ستراتەگيالىق نىسان - عارىش اپپاراتتارىن قۇراستىرۋ- سىناۋ زاۋىتى سالىنادى.

بۇل تۋرالى بۇگىن ماجىلىستە قازاقستاندا عارىش سالاسىن قالىپتاستىرۋ تاقىرىبىنداعى ۇكىمەت ساعاتىندا ق ر ۇلتتىق عارىش اگەنتتىگىنىڭ ءتوراعاسى تالعات مۇسابايەۆ مالىمدەدى.

اگەنتتىك باسشىسىنىڭ ايتۋىنا قاراعاندا، «استانا - جاڭا قالا» ارنايى ەكونوميكالىق ايماعىندا سالىناتىن زاۋىت قازاقستانداعى ءىرى عارىشتىق ينفراقۇرىلىمدىق نىسانىنا اينالادى.

«قاراپايىم تىلمەن ايتساق، بۇل ۇلكەن زاماناۋي زاۋىتتا ءتۇرلى باعىتتاعى سپۋتنيكتەردى جوبالاۋ، قۇراستىرۋ جانە سىناۋ قالىپتاسادى. ول كەشەنگە ارنايى كونسترۋكتورلىق- تەحنولوگيالىق بيۋرو دا ەنەدى. قۇرىلىس 2015 - جىلى اياقتالىپ، ىسكە قوسىلادى» ، - دەدى ت. مۇسابايەۆ. ونىڭ سوزىنە قاراعاندا، مۇنداي ستراتەگيالىق نىساننىڭ بولۋى ەلىمىزدىڭ عارىش سالاسى قىزمەتىنە ۇلكەن سەرپىن بەرەدى. «قازاقستاننىڭ عارىش اپپاراتتارىن جوبالاۋ مەن قۇراستىرۋدىڭ نارىعىنا شىعۋىن دا قامتاماسىز ەتەدى» ، - دەدى ول.

اۆتور: قانات مامەتقازى ۇلى