قۇنانباي تۋرالى فيلم تۇسىرىلمەك

استانا. قازاقپارات - ابايدىڭ اكەسى - قۇنانباي تۋرالى جاڭا كوركەم فيلم تۇسىرىلەتىن بولدى. جوباعا دوسحان جولجاقسىنوۆ رەجيسسەر بولماق، دەپ حابارلايدى kinostan.kz.

ءتۇسىرىلىم بيىل 1 - شىلدەدەن باستاپ شىعىس قازاقستان وبلىسىنىڭ اباي اۋدانىندا جۇرگىزىلەدى.

فيلمگە وتاندىق كينواكتەرلەر مەن شىعىس قازاقستانداعى تەاترلاردىڭ ارتىستەرى تارتىلماق.

ءتۇسىرىلىم جۇمىستارى 1 - قىركۇيەكتە اياقتالادى دەپ جوسپارلانعان. فيلمنىڭ قاشان جارىققا شىعاتىنى بەلگىسىز.

ابايدىڭ اكەسى 1804 -جىلى بەلگىلى ءبيدىڭ وتباسىندا دۇنيەگە كەلگەن. ول اقىلى مەن زەرەكتىگىنىڭ ارقاسىندا جاقسى ساياساتكەر بولدى. قۇنانباي العاشقىدا اۋىلباسى، بولىستىقتان باستاپ، قارقارالى ۋەزىنىڭ اعا سۇلتانى شەنىنە دەيىن كوتەرىلدى.

ەسكە سالا كەتەلىك، بۇل جوبا د. جولجاقسىنوۆتىڭ ەكىنشى رەجيسسەرلىك جۇمىسى بولماق. 2009 - جىلى ول "ءبىرجان سال" فيلمىن تۇسىرگەن ەدى. وندا باستى ءرولدى ءوزى سومداپ شىقتى.