شەتەلدىكتەردى قازاقستانعا زاڭسىز كىرگىزۋمەن اينالىسقان پاكىستان ازاماتىنا قاتىستى قىلمىستىق ءىس قوزعالدى

بۇل تۋرالى قالالىق پروكۋراتۋرانىڭ باسپا ءسوز قىزمەتى حابارلادى.
«اتالعان تۇلعا 10 جىل بويى بىرنەشە زاڭدى تۇلعالاردى تىركەۋ ارقىلى قازاقستانعا شەتەلدىك جۇمىسشىلاردى زاڭسىز شاقىرتۋمەن اينالىسقان. ول جالعان ۆيزالىق قولداۋ جاساۋمەن اينالىسقان. 2002-2013 - جىلدار ارالىعىندا ولار 1800 ۆيزالىق شاقىرتۋ جۇزەگە اسىرىپ، 95 شەتەلدىك ازاماتقا جۇمىس ۆيزاسىن اشىپ بەرگەن»، - دەلىنگەن حابارلامادا.
قالالىق پروكۋراتۋرانىڭ باسپا ءسوز قىزمەتىنىڭ حابارلاۋىنشا، زاڭدى تۇلعالاردى تىركەۋ كەزىندە ءبىرقاتار زاڭبۇزۋشىلىقتار ورىن العان. ناقتىراق ايتقاندا، باسشىلار تۋرالى مالىمەت، مەكەنجايى قاتە كورسەتىلگەن.
الماتى پروكۋراتۋراسى جاقىندا اتالعان 53 زاڭدى تۇلعانى مەملەكەتتىك تىركەۋدەن شىعارۋ تۋرالى شاعىم تۇسىرگەن بولاتىن.
قالالىق ارنايى مامانداندىرىلعان اۋدانارالىق ەكونوميكالىق سوتىنىڭ شەشىمىمەن پروكۋراتۋرانىڭ ارىزى تولىعىمەن قاناعاتتاندىرىلدى.
«وسىلايشا قازاقستانعا زاڭسىز ميگرانتتاردى كىرگىزۋمەن اينالىسقان كانال جويىلدى»، دەلىنگەن حابارلامادا.
اۆتور: گۇلميرا عوسمانالي