مارادونا مەسسيدەن كەشىرىم سۇرادى

استانا. قازاقپارات - ⅩⅩعاسىردىڭ اتى اڭىزعا اينالعان فۋتبولشىسى ارگەنتينالىق ديەگو ارماندو مارادونا فۋتبولدان الەم چەمپيوناتى بارىسىندا بىرنەشە ءىرى تەلەارنالاردا ساراپشىلىق جاساۋدا. بۇل تۋرالى rg.ru سايتى حابارلادى.
None
None

مارادونا چەمپيوناتتىڭ برازيليادا ءوتىپ جاتقانىنا قاراماستان، ۇيىمداستىرۋشىلاردى سىناپ، برازيليالىقتارعا قاتىستى كوڭىلگە تيەتىن بولجامدار جاساۋدان باس تارتپاي وتىر.

«مەنىڭ ويىمشا، فيفا مەن جەرگىلىكتى ۇيىمداستىرۋ كوميتەتى نارازىلىق شارالارىنا كوپ كوڭىل اۋدارىپ، جانكۇيەرلەر مەن فۋتبول جايىن ۇمىتىپ كەتكەن سياقتى. ماتچتاردا بوس ورىن قالىپ قويۋعا قالاي عانا جول بەرىپ وتىر؟ ! ولار ويىن تۋرالى ەمەس، تەك وزدەرىنىڭ قارا باستارىنىڭ پايداسىن عانا ويلايدى» ، - دەيدى ول.

سونىمەن قاتار، ديەگو ارماندو ارگەنتينا قۇراماسىنىڭ العاشقى ويىنى وزىنە قاتتى ۇناعانىن ايتىپ، ءتىپتى ليونەل مەسسيدەن كەشىرىم سۇراعان.

«ارينە، بارلىعىمىز كەرەمەت جارقىن باستاما كۇتتىك، دەگەنمەن، ەڭ باستىسى ناتيجە بار. كوماندا جەڭىپ كەلەدى، سوندىقتان ول جەڭىستىڭ قالاي كەلگەنى ماڭىزدى ەمەس. ەندىگى جول جەڭىلدەي تۇسەدى» ، - دەپ اتاپ ءوتتى ول.

ال ويىنشىلار تۋرالى ايتا كەلىپ مارادونا مەسسيگە ەرەكشە ىقىلاسىن بىلدىرگەن.

«ويىنشىلارعا كەلەر بولساق، مەسسيدىڭ الدىندا باسىمدى يەمىن. مەن ونىڭ ەل قۇراماسىنىڭ ساپىندا كورسەتىپ جۇرگەن ونەرىن ءجيى سىنايتىن ەدىم، ءبىراق ليونەل ءوزىنىڭ مىقتى فۋتبولشى بولىپ وسكەنىن دالەلدەدى. سوندىقتان مەن ودان كەشىرىم سۇراپ، ەكى بەتىنەن كەزەك سۇيۋگە ءازىرمىن. بۇل جىگىت چەمپيوناتتا ءبىزدىڭ كوماندانى جەڭىسكە جەتكىزۋگە قابىلەتتى. شەشۋشى ويىندا ءبىز برازيليانى شاڭ قاپتىرامىز دەگەن ۇمىتتەمىن. بۇل مەنىڭ جاتسام- تۇرسام ويلايتىن ءبىر عانا ارمانىم!» ، - دەدى مارادونا.

 

اۆتور: ءابۋ- اسقار مەكەش ۇلى 

سوڭعى جاڭالىقتار